Premier: Pobrachuje dowěra
Pólska knježerstwowa koalicija rozpadnyła – USA reaguja na nowy zakoń
Waršawa. Chětro njewočakowano rěčnik knježerstwa pólsku zjawnosć minjenu wutoru informowaše, zo je knježerstwowa koalicija kraja rozpadnyła. Kriza bě wudyriła, po tym zo je ministerski prezident Mateusz Morawiecki jednoho ze swojich zastupnikow, Jarosława Gowina, pušćił. Gowin bě na to wšěch swojich sobudźěłaćerjow zwołał a zdźělił, zo je zhromadne dźěło z knježacej narodno-konserwatiwnej stronu Prawo a sprawnosć (PiS) skónčene. W tym zwisku Polacy zhonichu, zo wobsteja napjatosće mjez PiS a Gowinom, kiž poměrnje mału stronu Dorozumjenje nawjeduje.
Premier Morawiecki je minjene měsacy po cyłym kraju jězdźił a ludźom program nowonatwara po skónčenju koronakrizy „Pólski porjad“ předstajał. Při tym wón twjerdźeše, zo budźe natwar bjez nowych dawkow móžny. Gowin so tomu spjećowaše, skedźbnjejo na to, zo program PiS k masiwnym zwyšenjam płaćiznow powjedźe a na kóncu k nowym dawkam.
Prěnje kiće wina za nowy sławny burčák, kotryž mjenuja w ...
Koalicija nimo
Kritikarjo Babiša nadběhowali
Marek Krawc rozprawja wo aktualnje rozjimanych temach w Čěskej
Tak sej Andrej Babiš zazběh wólbneho boja w Průhonicach pola Prahi zawěsće předstajał njeje. Za městnosć swojeho prěnjeho zjawneho wustupa we wobłuku lětušich wólbow bě sej wón městačko Průhonice wuzwolił, hdźež ze swojej swójbu bydli. Tam chcyše přiwisnikam swojeje politiki sobotu popołdnju swoju nowu knihu „Sdílejte, než to zakážou“ (Dźělće, prjedy hač to zakazaja) předstajić, a awtogramy kaž tež darmotny lód mjez podpěraćelemi rozdźěleć.
22 stron nastupi k wólbam
Praha (ČŽ/K/SN). K wólbam sejma spočatk oktobra je 22 zeskupjenjow lisćiny swojich kandidatow předstajiło, štož je dźewjeć mjenje hač před štyrjomi lětami. Z kandidatnej lisćinu wustupuja wšitke strony, kiž maja po naprašowanjach šansu, do sejma so dóstać. ANO, SPD, ČSSD a KSČM kandidatow samostatnje prezentuja. ODS, KDU-ČSL a TOP 09 nastupja porno tomu zhromadnje w koaliciji z mjenom Spolu, a do koalicije su so tež Piraća a Starosća zwjazali. Z njeparlamentnych politiskich subjektow su Trikolora, Soukromnicy (Priwatnicy) a Svobodni koaliciju załožili a zhromadnych kandidatow nastajili. Na wólbach wobdźěla so tež nowe cyłki, tak hibanje Prameny (Žórła) a hibanje Přisaha, załožene wot wusłuženeho policista. Mjez nowačkami je nic naposledk hibanje Otevřeme Česko normálnímu životu, kiž wustupuje přećiwo naprawam k zamjezowanju koronawirusoweje pandemije.
Wjetšina stronow wolerjam lubi, zo nochce dawki zwyšić a zo dawkowy system zjednori. Někotre strony propaguja tež zniženje nadhódnotoweho dawka na cyrobizny a ekologiske produkty.
Pólska zjawnosć rozhorjena
Politikarjo zwyšeja sej mzdy wosrjedź koronapandemije
Waršawa. Takrjec přez nóc su sej zapósłancy pólskeho parlamenta minjeny kónc tydźenja swoje mzdy chětro zwyšili. Dźeń pozdźišo bě noworjadowanje hižo w zakonskim łopjenu wozjewjene a je tak płaćiwe. Prezident kraja Andrzej Duda je ze swojim podpismom mzdy parlamentnikow zwyšił, złožujo so na zakoń z lěta 2002. Praktisce to rěka, zo dóstanje 460 zapósłancow sejma a 100 čłonow senata wot 1. awgusta měsačnje 60 procentow wjace pjenjez, město dotal 8 000 nětko 13 000 złotych (3 250 eurow). Takrjec z ryzy dźakownosće chcedźa zapósłancy nětko tež mzdu prezidenta zwyšić. Wjace płaćić budu tohorunja ministerskemu prezidentej, ministram, měšćanostam a čłonam měšćanskich radow. Tež předchadnicy prezidenta Dudy – Bronisław Komorowski, Aleksander Kwaśniewski a Lech Wałęsa – móhli z toho profitować.
Spodźiwne přećelstwo
Waršawa (JBR/SN). Pólska kupi 250 tankow wot USA. Z tajkej informaciju překwapištaj njedawno Jarosław Kaczyński, nawoda knježaceje strony PiS (Prawo a sprawnosć), a minister wobory Mariusz Błaszczak. Cyłkowny logistiski paket z municiju ma 23,3 miliardy złotych płaćić – to je połojca lětneho budgeta zakitowanskeho ministerstwa. Błaszczak wšak argumentuje, zo „najmoderniše tanki swěta móžneho njepřećela na wuchodźe kraja nastróža. Štó to je, dźě kóždy wĕ.“ A Kaczyński zwěsća: „Pjenjezy namakamy z hinašeho žórła.“
Nowinarjo so dźiwaja: Na jednym boku chce knježerstwo wot USA, kotrež su „najwjetša zaruka pólskeje wěstoty“, wojersku podpěru. Na tamnym boku ameriski telewizijny sćelak TVN, kotryž na wšě 20 lět w Pólskej wusyła, najprjedy raz žanu dalšu dowolnosć wjac njedóstanje.
Wopřijeće „USA – najwjetši přećel Pólskeje“ so w zjawnosći mjeztym hižo njejewi. A to wot časa prezidentstwa Joewa Bidena, kotremuž je po wólbnym dobyću loni w nowembru pólski prezident Andrzej Duda jako posledni gratulował.
Při zražce wosoboweju ćahow w Čěskej stej dźensa rano ...
Tenistce złoto za kraj dobyłoj
Marek Krawc rozprawja wo aktualnje rozjimanych temach w Čěskej
Praha. Dwójna olympiska dobyćerka w mjetanju hlebije Barbora Špotáková je zaćah do olympiskeho finala bohužel zapasła. W kwalifikaciji njezamó znata čěska atletka na swoje dotalne wukony nawjazać a docpě jeničce 14. městno. Přiwšěm smědźa so naši južni susodźa nad złotej medalju wjeselić. Tenisowej hrajerce Barbora Krejčíková a Kateřina Siniaková stej so njedźelu w finalnej hrě ze 7:5 a 6:1 přećiwo Belindźe Bencic a Viktoriji Golubić ze Šwicarskeje přesadźiłoj. Tak ma Čěska republika nětko swoju wosmu olympisku medalju.
Pólska kritizuje Běłorusku
Waršawa (dpa/SN). W padźe běłoruskeje sportowče na olympiskich hrach Kristiny Timanowskeje je sej pólski ministerski prezident Mateusz Morawiecki konsekwency za nawodnistwo w Minsku žadał. Wón rěčeše wo „kriminelnym pospyće, sportowču zawlec, kotraž je běłoruskemu režimej napřećo kritisce nastajena“. Běłoruska běharka bě so tele dny po informacijach opozicije hrožacemu zawlečenju wuwinyła. Wona je mjeztym wot pólskeho wulkopósłanstwa w Tokiju humanitarny wizum dóstała. Hišće tutón tydźeń wočakuja Timanowskaju we Waršawje. Pólski wulkopósłanc w Japanskej Paweł Milewski zdźěli po zetkanju z Běłorusowku: „Wona je wučerpana, wustróžana a jara dźakowna za našu pomoc w tymle ekstremnje ćežkim času w swojej sportowej karjerje.“
Mjeztym je Mjezynarodny olympiski komitej formelne přepytowanje zahajił, namołwjejo běłoruski olympiski komitej, hišće dźensa stejišćo zapodać.
