Praha (ČŽ/K). Produkcija awtow w Čěskej je minjeny kwartal nowy rekord docpěła. Tak bu 3 807 342 wozydłow zhotowjenych, štož je přirost wo 10,7 procentow porno samsnemu časej lońšeho lěta. Na eksport je 359 765 eksemplarow šło, tuž dźesaćina wjace hač prěnje tři měsacy 2016. Na domjacych wikach zwyši so wotbytk wo 13,7 proc. Tele ličby publikuje Zjednoćenstwo awtomobiloweho přemysła (AutoSAP). Mladoboleslavska Škodowka sama je produkciju wo 19 proc. zwyšiła a 32 327 awtow zhotowiła. Hyundai naprodukowa 98 100 awtow, štož je wosom procentow přibytka. Zawod Peugeot-Citroën wopušći 56 915 wozow, to je dźesaćina mjenje hač w 1. kwartalu 2016. „Nam je so zaso wobkrućiło, štož bě hižo loni płaćiło, mjenujcy zo naše awtomobilownje industrijnu produkciju ćahnu“, rjekny prezident AutoSAP Bohdan Wojnar. Jich wuslědki wuskutkuja so přewšo pozitiwnje na dźěłowe wiki. Produkcija awtow je tuchwilu tak dynamiska, dokelž su wozydła dale po cyłej Europje wulce prašane. Zwjeselace tohorunja je, zo je tež produkcija nakładnych awtow Tatra rozrostła, praji Wojnar.

Waršawa (dpa/SN). Zastupnicy hospodarstwa Němskeje a Pólskeje wobhladuja póndźelu so zahajace Hannoverske wiki jako šansu. „Je to dobra składnosć, nahladnosć Pólskeje zaso polěpšić“, rjekny Katarzyna Soszka-Ogrodnik, rěčnica Němsko-pólskeje industrijneje a wikowanskeje komory (AHK) powěsćerni dpa we Waršawje. Pólska je lětsa partnerski kraj wikow. Po nastupje noweho narodnokonserwatiwneho knježerstwa w lěće 2015 bě kraj mjez wukrajnymi inwestorami na atraktiwnosći zhubił. Zakonske změny noweho knježerstwa běchu předewzaćelow znjeměrnili, kotřiž njejsu na to w Pólskej dale inwestowali.

Wuhlady za tute lěto pak su po měnjenju fachowcow zaso pozitiwne. Přede­wšěm wočakowane spěchowanske srědki EU, kotrychž prud bě nachwilnje přetor­hnjeny, nowym inwesticijam polěkuja, je sej Soszka-Ogrodnik wěsta. Na industrijnej přehladce w Hannoveru móže so Pólska ze swojeje inowatiwneje a moderneje stronki prezentować. Tež tam je minjeny čas wjele nowych firmow nastało.

Praha (ČŽ/K). Wjetšinje čěskich ludźi je zhromadna europska měna euro hódź, financny minister Andrej Babiš pak wo njón njerodźi. W diskusiji na Karlowej uniwersiće pokaza wón na to, zo je króna za Čěsku wužitniša. Z njej by kraj w ewentualnej­ dalšej hospodarskej krizy skerje wobstać móhł. „W europasmje nochcył ja tež tohodla być, dokelž njebych chcył rukować za grjekske ani za italske banki“, šef hibanja ANO dale praji. Wón přizna, zo je zhromadna měna była spočatnje dobry projekt a zo tež nětko někak funguje, prašenje wšak je „što potom,­ hdyž přińdźe kriza?“. Wěstotu skića to swójska měna. Předsyda opozicionelneje strony TOP 09 Miroslav Kalousek so porno tomu za to wupraji, euro přiwzać nanajručišo, a to z politiskich přičin. „TOP 09 je za to, zo by Čěska w spěšnišim dźělu Europy była, z pomałšeho ničo njewuskoči.“ Europasmo po jeho­ přeswědčenju Europu dźěli do spěšneho a do pomałšeho dźěla. Štóž w EU zhromadnu měnu nima, bywa w hinašej kategoriji hač staty europasma.

Hans-Jörg Schmidt rozprawja z Prahi za Serbske Nowiny

Praha. Přez jutry je zaso šwarna ličba ćěkancow ze Sewjerneje Afriki přez Srjedźne morjo do Europy přijěła. Samsny čas je so Čěska rozsudźiła, přichodnje scyła žanych ćěkancow wjace do kraja njedać.

Poprawom měješe kraj po woli Europskeje unije 1 600 ćěkancow hospodować, kotrež hižo dlěši čas w italskich abo grjekskich lěhwach na to čakaja, zo jich w druhich krajach EU zaměstnja. Dotal je runje dwanaće wosobow oficialnje přišło. Lěhwa ćěkancow su prózdne. Češa rěča wšak tak a tak wo „lěhwa za wotsunjenje“. Tam ćěkancow kaserněruja, kotřiž běchu do kraja přišli a kotrychž běchu něhdźe w kraju lepili. Po čěskim zrozumjenju jedna so wo ilegalnych, dokelž su po puću do Němskeje bjez dowolnosće do kraja přišli. Tole płaći tam jako chłostajomny njeskutk. Češa maja tuž wulki zajim, jich spěšnje wotbyć.