Praha (dpa/SN). Čěski prezident Miloš Zeman je namjet prezentował, kak móhła­ so knježerstwowa kriza w kraju rozrisać. Po jeho słowach byštaj so­cialdemokratiski ministerski prezident Bohuslav Sobotka kaž tež liberalno-populistiski financny minister Andrej Babiš wotstupić dyrbjałoj. „Hdyž staj zadźěrakaj skónčnje preč a zwada skónčena, móže knježerstwo hač do kónca wólbneje doby dale dźěłać“, rjekny 72lětny Zeman powěsćerni ČTK do swojeho wopyta w Chinje.

Sobotka reagowaše hněwny na wuprajenje Zemana. Tón dyrbjał skónčnje swowje winowatosće spjelnić a Babiša kaž žadane­ pušćić, rjekny Sobotka na swojim wopyće w Luxemburgu. Hewak chcył na wustawowym­ sudnistwje skoržić. Tak by so knježerstwowa kriza na wustawu krizu rozšěriła. Socialdemokrat Babišej wumjetuje, zo je so jako předewzaćel płaćenju­ dawkow wuwinył a zo swoje medijowe předewzaća w politiskim boju zasadźa. Zawčerawšim, srjedu, je w Praze 30 000 ludźi přećiwo Babišej demonstrowało. Zdobom prezidenta Zemana namołwjachu, wustawu kraja dodźeržeć a so do politiki njetykać.

Smjerć pólskeje turistki w Egyptowskej dotal njewujasnjena

Waršawa. Mysteriozna smjerć młodeje pólskeje turistki w Egyptowskej je tele dny aktualna tema w zjawnosći a w medijach susodneho kraja.

27lětna Zgorzelečanka Magdalena Żuk bě 25. apryla do Egyptowskeje wotlećała. Jeje přećel dyrbješe jězbu krótkodobnje wotprajić, dokelž bě pućowanski pas wotběžany. Pjeć dnjow pozdźišo młoda Pólka w chorowni dowoloweho centruma Hurgada na sćěhi wšelakich ćežkich zranjenjow zemrě.

Při přepytowanju jeje smjerće so spěšnje wukopa, zo je wjace prašenjow hač wotmołwow. Hižo dwaj dnjej po tym zo bě do Egyptowskeje dolećała, so wona telefonisce pola přećela w Pólskej přizjewi. Naležnje jeho prošeše, zo by spěšnje po nju přijěł a ju wote­wzał, dokelž je we wulkim žiwjenskim straše. Nadrobnosće nochcyše abo njesmědźeše přeradźić. Analyza telefonata, kotryž bě přećel nahrawał, wunjese, zo je Magdalena wot arabskich mužow wobstupjena, kotřiž jej hroža, zo njesmě přewjele rjec.

NJEMANDŹELSKICH dźěći je so w Čěskej loni telko narodźiło kaž nihdy do toho. Njewoženjenym poram resp. samostejacym maćerjam je dobrych 54 700 nowonarodźenych z cyłkownje 112 700 – tohorunja najwjac w minjenych šěsć lětach – na swět přišło, tuž bjezmała 49 procentow dźiwajo na 57 900 porodow wudatych maćerjow. Tole wuchadźa z najno­wšeho wozjewjenja Čěskeho sta­tistiske­ho zarjada (ČSÚ), publikowaneho w medijach kraja. Statistika zdobom wupoka­- zuje, zo podźěl dźěći njewudatych maćerjow z kóždym lětom přiběra. Lěta 1990 bě so zwonka mandźelstwa 11 200 dźěći narodźiło, dwaj lětdźesatkaj pozdźišo hižo 47 200. „Za čas socializma njeje jich podźěl nihdy wosom procentow přesahował“, konstatuje ČSÚ we wozjewjenju. Předsydka knježerstwoweho wuběrka za prawa dźěći Klára Šimáčková-Laurenčiková wustupuje za to, zo měł stat w swojej swójbnej politice wšitke dźěći podpěrować, nic jenož te z mandźelstwow. „Dźěći njewoženjenych maja samsne prawa kaž dźěći woženjenych. Wšitke naprawy bychu dyrbjeli na runosć prawow dźěći dźiwać“, sej wona žada.

Uniwersita Viadrina počesći němsko-pólsku knižnu komisiju

Frankfurt n. W. (RD/SN). Myto Viadriny Europskeje uniwersity w Frankfurće nad Wódru spožča lětsa němsko-pólskej komisiji za šulske knihi.

Gremij mytuja po tymle puću „za dlěje hač 40 lět trajace zasadźenje, wučbnicu za Němsku a Pólsku zdźěłać, kotraž stawizny wobeju krajow zwobraznja. Lěta 1972 załožena komisija je hač do dźensnišeho centralna platforma kooperacije za stawiznarjow a zemjepisnych fachowcow wobeju krajow. Wona ze swojim dźěłom­ k tomu přinošuje, šulerjam susodny kraj z jeho stawizniskimi nazhonjenjemi zbližić.“ Tole piše prezident Viadriny­ prof. dr. Alexander Wöll we wopodstatnjenju mytowanja.

Prěnja kniha zwjazka „Europa – Naše stawizny“ bě loni wušła. Wona je za sekundarny schodźenk I myslena. Cyłkownje štyri zwjazki stawizniskich wučbnicow chcedźa šulam w Němskej a Pólskej přewostajić a je hač do lěta 2020 přepo-dać. Šulske knihi wopřijimaja pra- a zažne stawizny runje tak kaž načasne hač do spočatka 21. lětstotka.