Čěska wobara so němskej milinje
Praha (dpa/SN). Čěska je blisko mjezy k Němskej hoberskej transformatoraj stajiła, zo by prud ekomiliny z Němskeje regulować móhła. Hač do srjedź lěta matej dwaj dalšej tak mjenowanej fazowej suwakaj slědować, kaž čěski energijowy zastaraćel ČEPS w Praze zdźěli. Tak chcedźa wěstotu milinoweje syće zaručić, piše nawoda ČEPS Jan Kalina. Transformatory dźěłaja kaž wentil, zo bychu njeplanowanemu prudej miliny z němskich wětrnikow a solarnych připrawow, je-li trjeba, zadźěwali.
Kóždy z nowych transformatorow při přepinarni w sewjeročěskim Hradecu u Kadaně waži 300 tonow. Hradec je přez milinowód z přepinarnju w sakskej Kamjenicy-Röhrsdorfje zwjazany. Kóšty za transformatory, kotrež je Čěska w Italskej kupiła, wučinjeja 75 milionow eurow, kaž rěkaše.
Spochi rozmnožace so mnóstwo ekomiliny wjedźe k tomu, zo je dźeń a wjace miliny z wobnowjomnych energijow w syći. To tłóči na płaćizny miliny a milinowe syće stajnje zaso přećeža.
Přichod muzeja njewěsty
Mjenje požadarjow azyla
Němskorěčny tydźenik wuchadźeć přestał
Praha. Štwórć lětstotka je nowina Prager Zeitung w čěskej stolicy wuchadźała. Wona mjenowaše so tež „tydźenik ze srjedźizny Europy“. W běhu 25 lět je zwjetša čěšćinu njewobknježacych čitarjow we wukraju wo politice, hospodarstwje, kulturje, turizmje a stawiznach Čěskeje republiki wobšěrnje, dokładnje a w liberalnym zmysle informowała.
„Agresija nětko riskantniša“
Pólska ameriskich wojakow za škit přećiwo Ruskej wutrobnje witała
Waršawa. Z wulkej swjatočnosću witachu w Pólskej minjenu sobotu 3 500 wojakow USA, kotrychž bě wojerski zwjazk NATO pósłał, zo bychu kraj před móžnym nadpadom Ruskeje škitali. Jedna so wo tankowu jednotku, kotraž bě dotal w zwjazkowym staće USA Colorado zaměstnjena.
Na swjatočnosći w zapadopólskim Żaganju wobdźělištaj so ministerska prezidentka Beata Szydło a zakitowanski minister Antoni Macierewicz. Premierka Szydło z chwalbu njelutowaše: „Je to wulki dźeń, zo móžemy na pólskej zemi reprezentantow najsylnišeje a najwulkotnišeje armeje swěta witać.“ Minister Macierewicz rjekny: „Smy lětdźesatki na was čakali. Móžna agresija Ruskeje je za Krjeml nětko wo wjele riskantniša.“
Zarjadowanja podobneho razu wotměchu so w 15 dalšich městach, mjez druhim we Waršawje, Krakowje, Katowicach a Wrócławju. Orchester wójska hraješe wojersku hudźbu a poskićeše wobydlerjam hrochowu poliwku. Přez wulke widejosćěny běchu originalnje z centralnej swjatočnosću w Żaganju zwjazani.
Deklaracija zakład poćahow
Bal na hrodźe
Praha (ČŽ/K). Čěski prezident Miloš Zeman wuhotuje tež lětsa zaso na Praskim hrodźe hromadźe z mandźelskej Ivetu tradicionalny karitatiwny bal. Wosobny swjedźeń budźe pjatk, 20. januara, po zwučenym wašnju w Španiskej žurli a susodnych rumnosćach, informowaše rěčnik hłowy stata Jiří Ovčáček medije kraja. Za zastupny lisćik na ekskluziwne zarjadowanje dyrbi hósć 8 000 krónow płaćić. Z nim wšak je jeho wobsedźer awtomatisce na zboha „šćedriwej tomboli“ wobdźěleny, Ovčáček přispomni. Kajke nahladne myta su tónkróć wočakować, pak wón njepřeradźi. Loni su wopytowarjo bala móhli dobyć wječer z prezidentskim porom, wulět na olympiske hry do Rio de Janeira, lěto darmotneho wužiwanja Škody Fabia a dalše drohotne myta. Wwunošk bala dóstanje Zemanec załožba. Z njej prezident mjez druhim pomha Fondsej wohroženych dźěći, prěnja dama kraja ze swojeje strony podpěruje na přikład starownje.
Na balu, na kotryž wočakuja něhdźe 400 prominentnych, wustupja spěwarjo Petra Janů, solisća Petr Kolář, Janek Ledecký kaž tež Michal David.
Zhromadnje doprědka hladać
Před 20 lětami němsko-čěsku deklaraciju wujednanja podpisali
Praha (dpa/SN). Dwaj milionaj Němcow kóžde lěto Čěsku republiku wopytuje. Tež wikowanje spochi přiběra: Třećinu wšitkich eksportow woža Češa mjeztym do Němskeje. Dźensa móže sej lědma hišće štó předstajić, kak wobćežne a dołhodobne tajne jednanja běchu, zo by k němsko-čěskej deklaraciji wujednanja dóšło. Před 20 lětami, 21. januara 1997, móžachu dokument skónčnje podpisać.
Surowosće knjejstwa nacijow běchu mjez Čechami hłuboke rany zawostajili. Na tamnym boku so w Němskej tójšto sudetskim Němcam za swojej domiznu styskaše. Něhdyši zwjazkowy kancler Helmut Kohl (CDU) tuž při podpisanju dokumenta w Praskim Liechtensteinskim palaisu namołwješe, čertowski kruh mjez- sobnych wumjetowanjow přełamać.
„Pogromowa atmosfera“
W Pólskej žołma namócnosćow přećiwo wukrajnym hosćencarjam wudyriła
Waršawa. Pólska je prěnje dny noweho lěta žołmu brutalnych namócnosćow přećiwo wukrajnikam dožiwiła. Swoje wuchadźišćo mějachu nadpady silwester w Ełku, měsće ze 60 000 wobydlerjemi na sewjeru kraja njedaloko litawskeje mjezy. Tam dóńdźe k rozestajenju mjez wopitymi pólskimi młodostnymi a algeriskim hosćencarjom, kiž předawaše kebab. Rozestajenje wuwjercholi w bijeńcy, při kotrejž z Tuneziskeje pochadźacy kuchar jednoho z pólskich młodostnych z nožom zakłó. Dźeń po tym dóńdźe k masiwnym nadpadam Polakow na hosćency wukrajnych mějićelow po wšěm kraju. Nadpadnicy atakowachu durje a wukładne wokna z kamjenjemi a bencinowymi blešemi. Do někotrych barow so zadobychu a je dospołnje rozbichu. Namócnosće registrowachu mjez druhim tež we Wrócławju, Legnicy a Lubinje. Medije rěča mjeztym wo „pogromowej atmosferje“.
Pjerjestrojka trěbna njebyła
Praha (ČŽ/K). Něhdyši předsyda Komunistiskeje strony Čěskosłowakskeje, 94lětny Miloš Jakeš, wupraja so w rozmołwje z ruskej internetnej nowinu Gazjeta.Ru wo podawkach w Sowjetskim zwjazku po nastupje Michaila Gorbačowa jako generalneho sekretara tamnišeje komunistiskeje strony. A wón měni: Politika pjerjestrojki poslednjeho sowjetskeho nawody njebě trěbna.
