Raz tak raz hinak
Praha (ČŽ/K/SN). Bychu-li w Čěskej nětko sejm wolili, by wólby ze 24,5 procentami koalicija Piraća/STAN dobyła, kaž wuchadźa z junijskeho zwěsćowanja agentury Kantar. Druhe městno by koalicija Spolu (ODS, KDU/ČL-TOP) 09) z 23,5 procentami wobsadźiła, a hibanje ANO by z 21,5 procentami třeće městno docpěło. Do sejma zaćahnyłoj byštej tež SPD z 12,5 procentami a hibanje Přísaha ze šěsć procentami. Pod pjeć procentami byštej wostałoj KSČM a dotal sobu knježaca ČSSD a byštej tak sejm misnyłoj. Analytikarjo Kantara wuzběhuja, zo je koalicija Piraća/STAN porno meji dwaj dypkaj zhubiła, zo zamó ANO měsacy trajacy spad zaborzdźić a zo bychu komunisća prěni raz zwonka parlamenta wostali.
Hinaši wobraz skići wuslědk junijskeho naprašowanja agentury CVVM. Po njej by ANO ze 24,5 procentami wólby dobyło, koaliciji Piraća/STAN a Spolu byštej z 22,5 a 19,5 procentami so z druhim a třećim městnom spokojić dyrbjałoj. Do sejma zaćahnyłoj byštej nimo SPD tež komunisća a socialdemokraća.
Arcybiskop nětko wjesnjanosta
Waršawa (JBR/SN). Wulku medialnu sensaciju w Pólskej je zbudźił arcybiskop Leszek Sławoj Głódź. Po postajenju Vatikana ze wšeho nabožneho skutkowanja wuzamknjeny njesmě wón hižo dlěje w Gdańšćanskim biskopskim palaisu bydlić, dokelž bě pady znjewužiwanja dźěći přez duchownych w swojej diecezy zatajił. Chcyjo nochcyjo poda so tuž do swojeje ródneje wsy na wuchodźe kraja. Tam ma hotowy luksusowy statok a dwaceći hektarow polow a lěsow.
Dołho wšak jeho nanuzowana izolacija trała njeje. Swěrni wobydlerjo wuzwolichu jeho za swojeho wjesnjanostu, a 76lětny wuměnkar „knježi“ nětko nad 36 dušemi. Wjesnjenjo pak dyrbja jeho dale „ekscelenca“ mjenować a „smědźa“ jeho ruku z biskopskim pjeršćenjom košić. Financnje so jemu jara derje dźe – wšako dóstawa wysoku rentu generala, dokelž je tež jako wojerski biskop dźěłał. Wužiwarjo interneta nětko namjetuja, zo měli wjesnjenjo za Leszeka Sławoja Głódźa palenc palić. Jich nowy wjesnjanosta dźě bě w cyrkwinskich kruhach jako wulki lubowar „mócnych napitkow“ znaty a bu „bleška“ („flaszka“) mjenowany.
Za wopory tornada so modlili
Marek Krawc rozprawja wo aktualnje rozjimanych temach w Čěskej
Praha. Pomocna organizacija „Čłowjek w nuzy“ trochuje, zo bědźi so přibližnje 1 600 domjacnosćow we wobwodomaj Břeclav a Hodonín z wosudnymi sćěhami ničaceho tornada. Wobydlerjo domapytanych gmejnow trjebaja stajnje hišće twarske materialije, podpěru dobrowólnych pomocnikow a psychologisku pomoc. „Ličba potrjechenych swójbow je wo wjele wjetša, hač sym sej předstajił“, praji Václav Kučera, nawoda pomocneje organizacije. Statikarjo su mjeztym zwěsćili, zo dyrbja 180 chěžow spotorhać. Dieceza Caritas Brno skedźbnja na to, zo trjebaja wobydlerjo jara wobškodźenych komunow dołhodobnu pomoc. Za wopory a potrjechenych grawoćiweje přirodneje katastrofy na južnej Morawje modlachu so póndźelu čěscy wěriwi před baziliku w morawskim měsće Velehrad. Tam swjećeše kardinal Dominik Duka Božu mšu we wobłuku statneho swjateho dnja k česći słowjanskeju japoštołow Cyrila a Metoda. 15 000 putnikarjow wobdźěli so na kemšach pod hołym njebjom.
Maas přećiwo izolaciji Ruskeje
„Njepłaćimy ani złotówki“
Zwada mjez Pólskej a Israelom wotškódnjenja woporow holocausta dla
Waršawa. Diplomatiski konflikt mjez Pólskej a Israelom je so znowa přiwótřił. Pólski wulkopósłanc w Israelu Marek Magierowski dyrbješe minjenu njedźelu do israelskeho wonkowneho ministerstwa přińć. Wonkowne ministerstwo we Waršawje je sej nazajtra, póndźelu, israelsku wulkopósłanču Tal Ben-Ari Yaalon na raport skazało. Přičina zwady je změna zakonja wo prawniskim postupowanju w naležnosći wotškódnjenja woporow holocausta, kotruž bě prěnja komora pólskeho sejma wčera tydźenja wobzamknyła. W njej mjez druhim rěka, zo njemóže po 30 lětach nichtó wjace rozsudy pólskich zarjadow sudnisce do prašenja stajeć. Nowemu zakonjej dyrbi senat, druha komora parlamenta, hišće přihłosować.
Ze žiwjenjom spokojom byli
Praha (ČŽ/K/SN). Ze swojim žiwjenjom spokojom bě loni něhdźe 80 procentow čěskich ludźi, njedźiwajcy mnohich wobmjezowanjow a w zwisku z naprawami přećiwo koronapandemiji. To wuchadźa z wotpowědneho naprašowanja, kiž je agentura STEM přewjedła.
Kategorija spokojnosć implikuje wězo diferencowane stopnje. Tak bě 15 procentow ludźi ze swojim žiwjenjom „jara spokojom“ a 68 procentow „skerje spokojom“. 13 procentow woprašanych měješe so za „skerje njespokojom“, štyri procenty za „njespokojom“. Porno lětu 2019 je mnóstwo „jara spokojnych“ a kaž tež „jara njespokojnych“ wo štyri procenty zrostło a mnóstwo „skerje spokojnych“ a „skerje njespokojnych“ za to w samsnej měrje spadło.
Sobudźěłaćerjo agentury STEM su so tež za tym wobhonjeli, kak ludnosć staw demokratije w Čěskej hódnoći. 20 procentow woprašanych je jón jako „wuběrny“ posudźiło, štyri procenty mjenje hač lěta 2019. Jako „dobru“ posudźi kwalitu demokratije w kraju 37 procentow woprašanych, štož je porno předchadźacemu lětu samo minus wosom procentow.
Přemóžaca solidarita
Marek Krawc rozprawja wo aktualnje rozjimanych temach w Čěskej
Praha. Po ničacym tornadźe w juhomorawskim Hodonínskim wobwodźe minjeny štwórtk pjelnja zrudźace powěsće wo dóńtach jednotliwych swójbow w potrjechenych gmejnach dźeniki susodneho kraja. Sydom čłowjeskich žiwjenjow je sej strašne njewjedro žadało. Po grawoćiwej katastrofje dožiwjeja naši južni susodźa jónkrótnu solidaritu a pomoc ludźi samo z wukraja. Tak nazběrachu po cyłej Čěskej hač do póndźele 850 milionow krónow (32 milionow eurow) za prěnju pomoc potrjechenym wobydlerjam a za nowonatwar zapusćenych wsow. Tale suma je samo wyša hač nazběrane pjenjezy za podpěru potrjechenych wot zahubnych přepławjenjow 1997, jako składowachu 800 milionow krónow.
Pomoc woporam tornada w Čěskej
Praha (dpa/SN). Reagujo na zahubny tornado na juhowuchodźe Čěskeje je knježerstwo w Praze hnydomnu pomoc za wopory njewjedra wobzamknyło. Kóždy škodowany wobsedźer domu dóstanje přeličene nimale 80 000 eurow a ma prawo na kredit z wosebje niskej danju. To je ministerka za regionalne wuwiće Klára Dostálová wčera w Praze připowědźiła. Tež předewzaćeljo a ratarjo móža z pjenježnej pomocu a dawkowymi wolóženjemi ličić.
Ćežke njewjedro bě sej minjeny štwórtk wječor šěsć smjertnych woporow žadało. Mjez mortwymi je tež dwě lěće stare dźěćo. Wjace hač 200 ludźi je so zraniło. Čěski minister za strowotnistwo Adam Vojtěch je medicinske nuzowe mustwo do potrjecheneje kónčiny na južnej Morawje pósłał. Při rumowanskich dźěłach dochadźa zas a zaso k dalšim zranjenjam.
Tornado bě 26 kilometrow dołhu a 500 metrow šěroku čaru zapusćenja zawostajił. W sydom wsach je wón 1 200 domow wobškodźił abo dospołnje zničił. Sta wohnjowych wobornikow, wojakow a dobrowólnych pomocnikow tam škody wotstronjeja a milinowody wuporjedźeja.
„K přećelstwu zasudźenej“
Pólske echo na 30. róčnicu pólsko-němskeho zrěčenja wo dobrym susodstwje
Waršawa. Chětro nadrobnje a wobšěrnje rozprawjeja pólske medije wo zarjadowanjach k njedawnej róčnicy, kotraž je Polakam jara wažna. Něhdyši němski zwjazkowy kancler Helmut Kohl a tehdyši pólski ministerski prezident Jan Krzysztof Bielecki běštaj 17. junija 1991 pólsko-němske zrěčenje „Wo dobrym susodstwje a přećelskim zhromadnym dźěle“ podpisałoj. Dojednanje garantuje mjez druhim wěste wobstaće němsko-pólskeje mjezy, štož je Polakam po stawizniskich dožiwjenjach bytostne.
Mało akceptancy
Bratislava (SŽ/K/SN). Nětčiša politiska elita Słowakskeje wočiwidnje žanu wulku nahladnosć mjez ludnosću nima. To da so z naprašowanja sćěhować, přewjedźeneho wot agentury Focus.
