Praha (dpa/SN). W Čěskej republice chcedźa wućeženje swojich krematorijow po cyłym kraju koordinować. To je nutřkowny minister Jan Hamáček wčera po posedźenju centralneho krizoweho staba připowědźił. Wulkeje ličby na koronawirus zemrětych dla su institucije w nimale wšitkich regionach wućežene.

Najhórše je połoženje w morawsko-šleskim zarjadniskim regionje, hdźež su hranicu poćežowanja hižo překročili. Z tamnišeho industrijneho města Ostrava chcedźa nětko połsta ćěłow za spopjelenje do 150 kilometrow zdalenych Hustopeč dowjezć. „Tak chcemy tež w druhich padach postupować“, socialdemokrat připowědźi. Najwjetše swobodne kapacity maja hišće w stolicy Praze.

Tuchwilu maja w susodnym kraju ­nowy rekordny staw koronainfekcijow. Wčera běchu zamołwići 17 278 padow w běhu 24 hodźin zličili, telko kaž hišće nihdy wob dźeń. Po nowym šćěpjenskim planje knježerstwa ministerskeho prezidenta Andreja Babiša chcedźa najprjedy raz ludźi, staršich hač 80 lět, a strowotniski personal šćěpić, hakle po lěću tamnych wobydlerjow.

Marek Krawc rozprawja z čěskeje stolicy za Serbske Nowiny

Praha. Viktorie – dobyćerka – je mjeno prěnjeho dźěsća, kotrež je w nowolětnej nocy w Plzeňskej chorowni na swět přišło. Snano budźe nam mjeno holčki předznamjo za lěto 2021.

Mnozy Češa su nowe lěto měrliwje witali. Někotři wobydlerjo drje protesto­wachu posledni wječor stareho lěta na Praskim Wjacławskim naměsće hišće raz přećiwo naprawam knježerstwa. Tež w dalšich městach přewjedźechu mjeńše protestne akcije přećiwo tuchwilnym postajenjam a statnej karantenje. Hewak pak wostachu ludźo doma a swjećachu ze swójbnymi. Poslednju nóc lěta 2020 płaćeše mjenujcy po cyłym kraju wot 21 hodź. kruty zakaz přebywanja zwonka bydlenja. Na mnohich městnach Čěskeje njesmědźachu přiwisnicy silwesterskeho hołka a tołka ani rakety a praskotaki wotpalić. Jednoho zrudoba je tamnemu wjeselo – wohnjowi wobornicy a policija su tónraz skerje „přijomnu“ nóc dožiwili. Wobornicy dyrbjachu w stolicy dohromady „jeno“ 17 wohenjow zhašeć.

Praha (ČŽ/K/SN). Njedźiwajcy njeparujomnych naprawow k wobmjezowanju koronapandemije je Čěska republika w prěnich dźewjeć měsacach lěta 2020 dale rostła. Přibywši w tym času 13 900 dušow ma wona nětko prěni króć 10,7 milionow wobydlerjow. To wuchadźa z wotpowědnych datow čěskeho statistiskeho zarjada, kotrež medije kraja publikuja. Kedźbyhódne bywa při tym žórło přirosta: dokelž je wjace ludźi zemrěło hač so dźěći narodźiło, su jenož migranća pozitiwny zjaw wuskutkować móhli. Mortwych bě něhdźe 85 000, štož je přibližnje tysac wjac hač w samsnym času lěta do toho. Ličba nowonarodźenych je porno tomu wo 2 600 na 83 300 spadnyła. Nahladnje mjenje bě tež kwasow – wot januara do oktobra zwjazachu stawnistwa 38 100 mandźelstwow, štož je porno 2019 minus wo 1 000.

Wo přirost wobydlerstwa z pomocu wukrajnych migrantow su so w prěnim rjedźe Ukrainjenjo postarali, a wotpowěduja Słowakow a Rusow. Mjenje je Polakow, Britow a Němcow do Čech wabiło. Hladajo na to, zo bě republika lěta 2001 „jeno“ 10,225 milionow wobydlerjow měła, smě so za to měć, zo wona prjedy abo pozdźišo ličbu 11 milionow docpěje.

Marek Krawc rozprawja z čěskeje stolicy za Serbske Nowiny

Praha. Runje tak kaž w druhich krajach Europskeje unije zahajichu njedźelu, 27. hodownika, w Čěskej republice cyłostatne šćěpjenje wobydlerstwa přećiwo koronawirusej. Prěnich 9 750 šćěpjenskich dozow wot předewzaćow BioNTech a Pfizer běchu zamołwići hižo sobotu pod krutymi wěstotnymi naprawami do Prahi a Brna dowjezli. Tak móžachu lě­karjo w Centralnej wojerskej chorowni w Praze prěnjemu „woporej“ Andrejej Babišej – čěskemu ministerskemu prezidentej – horco požadanu injekciju dać. „Tute lěto bě najhórše lěto w modernych stawiznach Čěskeje republiki. Tójšto našich wobydlerjow je kowida-19 dla ze­mrěło. Šćěpiwo je nam wulka nadźija, zo so bórze nawróćimy k normaliće“, wu­zběhny Babiš. To je tež nuznje trjeba, wot njedźele płaći w susodnym kraju zaso kruta statna karantena ze zawrjenymi wobchodami a hosćencami kaž tež ze zakazom, mjez 21 a 5 hodźin rano zwonka swojeho bydlenja přebywać. Po injekciji dósta ministerski prezident swój šćěpjenski wupokaz, w kotrymž ma zapi­sany termin za druhe šćěpjenje 21 dnjow pozdźišo.