Waža sej podpěru za Hórnikowu knihownju
Prěni raz po wjacorych měsacach wotmě so wčera posedźenje Rady za serbske naležnosće Sakskeje z wobdźělenjom zapósłancow wjacorych frakcijow w rumnosćach krajneho sejma. Radźićeljo zaběrachu so mjez druhim ze sakskim etatom 2021/2022 ze serbskeje perspektiwy, z aktualnym stawom nastupajo strukturne srědki za serbske projekty a z dalewuwićom widźomneje dwurěčnosće w zjawnosći.
Třělc wosom ludźi morił
San José (dpa/SN). Třělc je w depoće tramwajkow w kaliforniskim měsće San José wosom ludźi zatřělił a so po tym sam morił. Při krawnym njeskutku při přepodaću změny wčera rano bu dalša wosoba ćežko zranjena. Motiwy třělca, kiž bě sobudźěłaćer předewzaća měšćanskich tramwajkow, dotal znate njejsu. Prezident USA Joe Biden rěčeše wo „surowej tragediji“ a připowědźi zakonske iniciatiwy, skónčić „epidemiju wobrónjeneje namocy“ w Zjednoćenych statach Ameriki.
Kašće woporow w Israelu
Tel Aviv (dpa/SN). Po smjertnym njezbožu gondle powjaznicy w Italskej su kašće pjeć israelskich woporow do jich domizny dowjezli. Wosebita mašina lětanskeho předewzaća El Al je wčera na mjezynarodnym lětanišću w Tel Avivje přizemiła. K česći jednoho z woporow Izchaka Cohena (81) rěkaše čisło lěta LY COHEN. Wón bě sobuzałožer lětanskeho předewzaća. Hromadźe z nim běchu jeho mandźelska Barbara (71), wnučka Tal (26), jeje muž Amit (30) a dwulětne dźěćo w gondli žiwjenje přisadźili.
Wo naprawach wuradźowali
Pytaja za žórłom koronawirusa
Pomhaja kulturje
Milinowód Nordlink wotewrjeny
Wilster (dpa/SN). Zwjazkowa kanclerka Angela Merkel (CDU) a norwegska ministerska prezidentka Erna Solberg stej dźensa nowy milinowód Nordlink mjez Němskej a skandinawiskim krajom wotewrěłoj. Dwě miliardźe eurow droha trasa zwjazuje prěni króć milinowe systemy wobeju krajow a je wažny měznik energijoweje změny. Po wjacore měsacy trajacym wupruwowanju milinowód mjeztym něšto tydźenjow dźěła.
Nordlink zwjazuje Wilster w Schleswigsko-Holsteinskej a Tonstad w Norwegskej přez cyłkownje 623 kilometrow, 516 kilometrow z toho w morju. Přez milinowód ćeče po potrjebje milina wětrnikow do Norwegskeje abo nawopak wodowych milinarnjow do Němskeje. Hoberske składy wody w Norwegskej słuža tak indirektnje jako składźišća přewjele produkowaneje miliny wětrnikow. Nawopak móže Němska problemy pobrachowaceje miliny wětrnikow z milinu z wody wurunać. Milinowód ma kapacitu 1 400 megawattow, štož za to dosaha 3,6 milionow domjacnosćow zastarać.
Tež dźěćom šćěpjenje poskićeć
Rozjimuja wotewrjenje šulow a lěpši škit wuknjacych před wirusom
Berlin (dpa/SN). Hladajo na woteběrace ličby koronainfekcijow sej dźeń a wjace ludźi žada, w šulach so zaso k normalnej prezencnej wučbje wróćić. Po měnjenju sejma wokrjesow by to infekciske połoženje hišće do lětnich prózdnin dowoliło. „Přilubjenje, šule jako prěnje zaso wotewrěć, měła politika najspěšnišo spjelnić“, rjekny prezident sejma Reinhard Sager Osnabrückskim nowinarjam. Tak tež wo to dźe, hač měli šulerjow přećiwo koronawirusej šćěpić abo nic.
Předsyda stajneje šćěpjenskeje komisije Thomas Mertens chcył pruwować, hač je šćěpjenje dźěći woprawdźe jenički a prawy srědk přećiwo wirusej. „Njezabudźmy: Při šćěpjenju njerozdźělamy placki. Je to medicinski zasah.“ Hłowny zaměr měło derjeměće dźěći być. Porno tomu su argumenty kaž wotewrjenje šulow, nawrót k normalnemu žiwjenju abo dowol ze staršimaj jeno „sekundarne“.
Nowa institucija EU
To a tamne (27.05.21)
Kónčk kurjeneje cigary bywšeho britiskeho premierministra Winstona Churchilla ma za 4 850 eurow noweho wobsedźerja. Sydom centimetrow krótka historiska dopomnjenka je tak wo wjele wjace wunjesła, hač běchu trochowali, zdźěli awkciski dom Bellmans. Churchill, zahority kurjer cigarow, bě kónčk jedneje tajkeje 1940 preč ćisnył. Policist, kiž premierministra přewodźeše, bě jón zběhnył a swojemu wnučkej zawostajił.
Chětro rědki minikóń je so w zwěrjencu w Aue narodźił. Kobła Anielka je minjeny pjatk žrěbca porodźiła. Jara k wjeselu sobudźěłaćerjow ma kožuch konja krasnu a jara rědku barbu „liščeho tigra“. Charakteriske dypki na kožuchu njejsu kaž pola maćerje čorne, ale čerwjene. Po rysowarju z NDRskeje telewizy rěka žrěbjo „Taddeus Punkt“. Jeho mać Anielka je runje 86 centimetrow wulka.
Zrěčenje hač do kónca junija podpisać
Budyšin (SN/JaW). Po tym zo je wčera tydźenja braniborske knježerstwo nowemu zrěčenju wo financowanju Załožby za serbski lud přihłosował, su wšitke zadźěwki, kotrež podpisanju dekreta zadźěwaja, z puća. „Z tym je tež nachwilne hospodarjenje za wšitke wot załožby spěchowane institucije zběhnjene“, rjekny jeje direktor Jan Budar na onlinowej nowinarskej konferency po wuradźowanju załožboweje rady minjeny štwórtk.
Wumjetuje Ruskej podpěru
Berlin (dpa/SN). W padźe wunuzowaneho přizemjenja pasažěrskeho lětadła předewzaća Ryanair w Minsku nima Norbert Röttgen, předsyda wonkowneho wuběrka zwjazkoweho sejma, wobdźělenje Ruskeje za wuzamknjene. „Wuchadźam z toho, zo bě statne zawlečenje lětadła ze stron Krjemla wotžohnowane, chiba samo podpěrane“, rjekny politikar CDU nowinarjam. Moskwa kóždežkuli wobdźělenje wotpokazuje. Běłoruska policija bě 26lětneho opozicionalneho Romana Protasjewiča po přizemjenju w lětadle zajała.
Za spěšny nawrót normality
Berlin (dpa/SN). Šule a pěstowarnje w Němskej měli so z wida zwjazkoweje justicneje ministerki Christiny Lambrecht (SPD) spěšnje zaso k normalnemu žiwjenju nawróćić. Aktualne přepytowanja pokazuja, kak jara koronapandemija runje šulske dźěći poćežuje, rjekny Lambrecht nowinarjam. Při niskich incidencach měli wšitko za to činić, normalny wotběh w šulach a pěstowarnjach zaručić, „a to spěšnje“. Zwjazk a kraje chcedźa naležnosć jutře rozjimać.
Prezidentske wólby zahajene
