Brüssel (dpa/SN). Zwjazkowa kanclerka Angela Merkel (CDU) njeje so na wjerškowym zetkanju Europskeje unije w Brüsselu ze swojim namjetom přesadźić móhła, ruskeho prezidenta Wladimira Putina na rozmołwu přeprosyć, zo móhli wo wobstejacych problemach rěčeć. Nětko chcedźa nowe formaty a wuměnjenja za dialog z Ruskej zdźěłać, wona w Brüsselu zdźěli. Merkel bě so zhromadnje z francoskim prezidentom Emmanuelom Macronom za změnu dotalneho kursa napřećo Ruskej zasadźała. Tak chcychu na jednym boku dalše zaměrne sankcije přećiwo Moskwje wukazać, zdobom pak jej wjerškowe zetkanje z EU poskićić. Čłonske kraje Europskeje unije pak běchu přećiwo dialogej z Ruskej bjez wotpowědnych wuměnjenjow. „Wosobinsce bych sej zmužićiši krok přała“, Merkel doda. Wažne pak je, zo format dialoga dale wobchowaja a zo dale na tym dźěłaja. ­Diskusiju ze swojimi kolegami w EU mjenowaše Merkel „wobšěrnu a nic jednoru“. Rozmołwy su jara „rozdźělne předstawy wo přichodźe Europy“ wunjesli.

Ćelo na awtodróze A 4 je w nocy na štwórtk zasadźenje policije zawiniło. Zastojnicy dyrbjachu A 4 njedaloko wot-jězdki Wüstenbrand do směra na Erfurt dospołnje zawrěć. Skónčnje so poradźi, skoćo popadnyć. Wutoru bě cyłkownje wosom ćelatow ćeknyło. Za někotrymi přeco hišće pytaja. Policija prosy šoferow w regionje wo wosebitu kedźbnosć.

Nimale tři promile alkohola w kreji měještaj wodźerjej nakładneju awtow, jako jeju policija kontrolowaše. 37lětny jědźeše po awtodróze A 2, jako ze swojim Lkw-jom škitne wobhrodźenje po dołhosći něhdźe sto metrow wobškodźi. Šofera pak to njestaraše. Něšto pozdźišo jeho policija kontrolowaše a zwěsći 2,58 promilow. Dalši, 35lětny bě na A 14 do směra na Schwerin po puću, hdźež je chětro njewěsteho jězdźenja dla napadnył. Pola njeho naměrichu 2,96 promilow.

Na docpěte w nachilacej so wólbnej periodźe parlamenta zhladowali su wobdźělnicy wutorneje online-widejokonferency poradźowaceho wuběrka za prašenja serbskeho ludu při zwjazkowym ministerstwje nutřkowneho, za twarstwo a domiznu (BMI).

Budyšin/Berlin (SN/at). Prof. dr. Bernd Fabritius, społnomócnjeny zwjazkoweho knježerstwa za prašenja wusydlencow a narodne mjeńšiny, mjenowaše po słowach přitomnych tři wobłuki, w kotrychž je gremij k spomóžnym wuslědkam přinošował. Sprěnja skedźbni wón na štwórte financowanske zrěčenje za Załožbu za serbski lud, kotrež je po přewostajenych srědkach Zwjazka, Sakskeje a Braniborskeje měznik w přichodnym skutkowanju załožby. Ministerstwo w Berlinje termin podpisanja hišće koordinuje. Zdruha naliči społnomócnjeny zapisanje serbskich naležnosćow do zakonja wo strukturnej změnje. Třeće ćežišćo je dźěło z młodźinu. Zastupjerjo Domowiny a Załožby za serbski lud, kotřiž rozprawjachu w gremiju, so dr. Fabritiusej za spomóžne dźěło dźakowachu.

Moskwa (dpa/SN). Po warnowanskich wutřělach a bombach k wottrašenju britiskeje wójnskeje łódźe na Čornym morju je Ruska dalše kraje warnowała, ruski mórski teritorij ranić. Podawk z britiskim ničakom „HMS Defender“ před pobrjohom połkupy Krim bě „chutny wokomik“, rjekny ruski zastupowacy wonkowny minister Sergej Rjabkow dźensa w Moskwje. Ruska je rozsudźena swoju ­teritorialnu integritu w nuzy tež wojersce zakitować. Britiska łódź bě po zdaću tři kilometry hłuboko na ruskim teritoriju była, ignorujo wšitke warnowanja.

Wo spěchowanju sporta rěčeli

Drježdźany (dpa/SN). Přichod Europy, židowske žiwjenje a kultura w Sakskej kaž tež 60. róčnica twara Berlinskeje murje stejachu w srjedźišću dźensniše posedźenja Sakskeho krajneho sejma. Nimo toho rěčachu wo spěchowanju sporta w pěstowarnjach a šulach kaž tež wo płuwanskej wučbje, štož bě w časach koronakrizy wosebje ćerpjeło. Za to je knježerstwowa koalicija CDU/SPD a Zelenych lisćinu najwažnišich předewzaćow zestajała.

Demonstrantka zasudźena