Naprašowanje k stejišću ludźi aktualnu statnu formu nastupajo

Stuttgart/Drježdźany (dpa/SN). W Němskej starosći so wjetšina ludźi wo staw demokratije a wo agresiwnosć w zjawnosći. To je wuslědk kraje přesahowaceho naprašowanja Roberta Boschoweje załožby a organizacije More in Common, kotryž su wčera w Stuttgarće předstajili. Aktualnje starosći so 65 procentow woprašanych „často wo połoženje demokratije“ a wobkedźbuje, zo je zjawna debata w Němskej dale a bóle z hidu pjelnjena (70 procentow).

Roberta Boschowa załožba a organizacija More in Common stej w Němskej, Francoskej, Wulkej Britaniskej, Pólskej a USA poměr ludźi k demokratiji přepytowałoj. Slědźenskej institutaj YouGov a Kantar běštej so k tomu spočatk lěta 2021 wjace hač 10 000 ludźi w tychle krajach naprašowałoj.

Lubosć k zwěrjatam je pjaneho kolesowarja pječa pohnuła po seklojtej čarje jězdźić. Wón bě so šlinkam wuwinyć chcył, zo njeby je přejěł, kaž policistam rjekny. Swědk bě zastojnikow alarmował, dokelž bě kolesowar cyłu kolesowansku šćežku za sebje trjebał. Test alkohola wunjese, zo drje njeběchu šlinki jenička přičina: Pola muža naměrichu 2,5 promilow.

Kónc němskeje wubranki na europskich koparskich mišterstwach je třećinje wobydlerjow Němskeje wšojedne. To je wuslědk reprezentatiwneho naprašowanja slědźenskeho instituta YouGov mjez 1 731 ludźimi nad 18 lětami. Na prašenje za začućemi po zwrěšćenju mustwa rjekny 35 procentow „zo so wo to njerodźa“. 27 proc. poda, zo „njejsu překwapjeni“. 15 proc. je „jara přesłapjenych“, wosom procentow so „rudźi“ a jenož pjeć procentow je „rozhněwanych“.

Regionalny přewodźacy wuběrk Łužicy, wutworjeny kónc apryla jako posudźowacy gremij za we wobłuku zwjazko­weho zakonja wo skrućenju struktury namjetowane projekty a naprawy k zmištrowanju strukturneje změny, je wčera na nowinarskej konferency wo swojim prěnim posedźenju w Běłej Wodźe informował. Facit čłonow wuběrka je, zo su „dobry wuslědk docpěli“.

Berlin (dpa/SN). Zwjazkowy prezident Frank-Walter Steinmeier je do swojeho statneho wopyta w Israelu knježerstwo kraja namołwjał, w konflikće z Palestinjanami za politiskim rozrisanjom pytać. Bjez tajkeho njeje žanoho přichoda, rjekny Steinmeier israelskim nowinarjam. Zwjazkoweho prezidenta wočakuja dźensa wječor w Tel Avivje. Jutře su rozmoł­wy z ministerskim prezidentom Naf­talijom Bennettom a wonkownym ministrom Jairom Lapidom planowane.

Surowa horcota dale traje

Vancouver (dpa/SN). Dale trajaca surowa horcota na zapadźe Kanady je so wo nowe­ rekordy postarała a k wjacorym smjertnym padam přinošowała. W měsće Lytten w prowincy British Columbia naměrichu wčera 49,5 stopnjow celsiusa, što je rekord w stawiznach kraja. W samsnej prowincy běchu wot minjeneho pjatka­ wjace hač sto njejapkich smjertnych padow registrowali. Njesměrna ćopłota ma přichodne dny dale trać.

Za lěpšu koordinaciju