To a tamne (15.07.21)
Z psyčej genetiskej datowej banku chcedźa w israelskej metropoli Tel Avivje přichodnje tych zwěsćić, kotřiž psyče howna ležo wostajeja. Wukaz měšćanskeho zarjadnistwa postaja, zo maja wobsedźerjo při přizjewjenju psa abo při kóždolětnym ponowjenju psyčeho wupokaza genetiski material zwěrjeća wotedać. Daty budu centralnje składowane. Kontrolerojo města dyrbja potom jenož hišće probu howna brać. Něhdźe 500 kilow psyčich hownow měsačnje na zjawnych městnach ležo wostawa.
Z wjace hač tysac eurami w ruce je třilětny w Essenje słódkosće nakupować spytał. Pěšk bě pjeracha z łóncom pjenjez wobkedźbował. Přiwołanym policistam pachołk rjekny, zo je pjenjezy spjacemu nanej ze zaka wućahnył. Jako woni hólčka doma wotedachu, nan přeco hišće spaše. Słódkosće wězo žane njesydachu.
Pilnje na dobro cyrkwje a serbskich wosadow dźěłał
7. julija bu něhdyši Serbski superintendent Siegfried Albert po połlětnym ćežkim schorjenju na Božu prawdu wotwołany. Po wotchadźe Gerharda Wirtha na wuměnk bu wón 1979 za Serbskeho superintendenta powołany, spočatnje komisarisce, wot lěta 1983 doskónčnje. Wot spočatka sem je tele zastojnstwo z wulkej swěrnosću wukonjał. Rjadowaše dźěło konwenta serbskich duchownych a Serbskeho wosadneho zwjazka, kotryž je synodalne zastupnistwo serbskich wosadow. Po wotchadźe Cyrila Pjecha z Riesy do Berlina přewza wón redaktorstwo serbskeho ewangelskeho měsačnika Pomhaj Bóh, za kotryž napisa njeličomne rozpominanja, nastawki a přispomnjenčka. W lěće 1988 dowolichu jako płód rozmołwow ewangelskeje a katolskeje cyrkwje z Domowinu cyrkwinske wusyłanja w Serbskim rozhłosu. 30. oktobra 1988 prědowaše wón w prěnim nabožnym wusyłanju po žołmach rozhłosa.
Srědki za powětrowe filtry
Berlin (dpa/SN). Zwjazkowe knježerstwo chce po informacijach powěsćernje dpa zatwar mobilnych powětrowych filtrow w šulach z 200 milionami eurow spěchować. Sewjerorynsko-westfalski ministerski prezident Armin Laschet (CDU) bě wo tym informował, zo zwjazkowe knježerstwo wotpowědny program zdźěłuje. Spěchowanje je wobmjezowane za rumnosće, hdźež wuknu dźěći pod dwanaće lětami, za kotrež nimaja žane šćěpiwo pře koronu.
EU ma plan za škit klimy
Brüssel (dpa/SN). Komisija EU z Ursulu von der Leyen na čole je dźensa swój plan předstajiła, kak móhli klimoškitne zaměry hač do 2030 docpěć. Mjez druhim chcedźa fosilne nošaki energije kaž wuhlo, zemski płun abo mineralny wolij hišće raz jasnje podróšić, zo bychu klimu škitace technologije spěšnišo zwoprawdźili. Tež płaćizny za wuhlikowy dioksid dale zwyša. Hłowny zaměr je, Europu hač do lěta 2050 klimje napřećo neutralnu sčinić, von der Leyen potwjerdźi.
Altmaier za lěpšu disciplinu
Njewšědnje wulke zliwki su předewšěm na zapadźe Němskeje w ...
Płaćizny energije ćěrja inflacijuw Němskej
Wiesbaden (dpa/SN). Razny rozrost płaćiznow za bencin a tepjenski wolij dźerži inflaciju w Němskej dale na wysokim niwowje, byrnjež so wona w juniju z 2,3 procentami porno lońšemu junijej snadnje wosłabiła. W meji bě inflaciska rata z 2,5 procentami najwyši staw minjenych dźesać lět docpěła.
Wosebje raznje wuskutkuja so přiběrace płaćizny energije při tankownjach a při napjelnjenju tanka tepjenskeho wolija. Tepjenski wolij je 42,5 procentow dróši hač loni, bencin a diesel płaćitej 23,5 procentow wjace.
Po wobličenju přirunowanskeho portala Verivox płaća přiběrace płaćizny energije přerěznu domjacnosć 498 eurow přidatnje wob lěto. Za cyłkownu potrjebu ćopłoty, miliny a bencina dyrbi domjacnosć z třomi wosobami 14,3 procenty wjace płaćić hač loni.
Bjez nahubnika nakupować
Drježdźany (dpa/SN). W Sakskej smědźa ludźo wot pjatka bjez nahubnika we wobchodach a superwikach nakupować. Wuměnjenje je, zo wostanje sydom-dnjowska incidenca natyknjenjow z koronawirusom pod dźesać. To je sakska ministerka za strowotnistwo Petra Köpping (SPD) wčera po posedźenju krajneho knježerstwa připowědźiła. Škit za hubu a nós pak je w busach, železnicach kaž tež w medicinskich institucijach a w hladarnjach dale trěbny. Incidenca w Sakskej wučinja tuchwilu 2,2.
Frakcija AfD w Sakskim krajnym sejmje je připowědźiła, zo chcyła přećiwo aktualnemu škitnemu postajenju koronawirusa dla skoržić. „Minjene połdra lěta praktikuje sakske statne knježerstwo pod nawodom socialneho ministerstwa politiku, kotraž swobodu ludźi, pohibanja a powołanja masiwnje wobmjezuje“, rjekny stronski a frakciski předsyda Jörg Urban w Drježdźanach. Zo ma tónle „njeznjesliwy trajny staw“ tež pola incidency blisko nule wostać, pokazuje njezajim knježerstwa, ludźom prawa wróćić.
To a tamne (14.07.21)
Z kłódy ćeknyć móžeše sydom jatych w Indiskej, po tym zo běchu stražnikam chili a sel do mjezwoča mjetali. Stražnicy běchu jim poprawom wječer přinjesć chcyli a buchu přez korjeniny we wočach zranjeni. Jednomu stražnikej pokradnychu samo handy. Korjeniny běchu w zhromadnej celi chowali. Policija je sej wěsta, zo jatych bórze zaso změja. Wšako je ludźom w potrjechenej kónčinje tuchwilneho lockdowna dla wot 15 do 5 hodź. zakazane dom wopušćić.
Koleso do rěki ćisnył je roznjemdrjeny pěšk w Mnichowje. 58lětny muž bě 44lětneho kolesowarja na to skedźbnił, zo po chódniku jědźe, na čož dóńdźe mjez nimaj k raznej zwadźe. Skónčnje pěšk kolesowarja biješe, hrabny koleso a ćisny je do kanala rěki Isar. Wot swědkow přiwołana policija móžeše zwadu skónčić, za kolesom pak hišće pytaja.
Z nazhonitym načolnym kandidatom
Znamjenja běchu wjelelubjace, nětko je to oficialne: Zwjazkowy wólbny wuběrk je wobkrućił, zo wobdźěli so Južnoschleswigski wolerski zwjazk (SSW) na wólbach zwjazkoweho sejma 26. septembra.
Flensburg (SN/at). Ze zaměrnym dźěłom je mjeńšinowa strona Danow a Frizow w Schleswigsko-Holsteinskej dalši wotrězk wólbnych přihotow zmištrowała. Rozsud zwjazkoweho wólbneho wuběrka w parlamenće Němskeje (SN informowachu) mjenowaše předsyda SSW Flemming Meier „za nas jako mjeńšinowu stronu historiski dźeń“.
Loni w septembrje bě so na krajnym zjědźe SSW 66 ze 111 delegatow za wobdźělenje na wólbach zwjazkoweho sejma wuprajiło, 41 přećiwo tomu. Jedyn argument přećiwnikow, kaž nowinski rěčnik Per Dittrich podšmórny, tehdy bě, zo njebychu dosć personala za tajke wužadanje měli. Wuwiće wot toho časa pak to nawopačne wobswědča: Ze zjězda wuchadźacy rozmach je čłonstwo mobilizował, wokrjesne zwjazki su swoje personalne namjety bórze přizjewili.
Maas po puću do USA
Berlin/Detroit (dpa/SN). Krótko do wopyta zwjazkoweje kanclerki Angele Merkel (CDU) we Washingtonje je so wonkowny minister Heiko Maas (SPD) dźensa na třidnjowski wopyt do USA podał. W industrijnej metropoli Detroiće chcyše wón produkcisku městnosć farmakoncerna Pfizer wopytać, kotryž šćěpiwo pře koronawirus tež Němskej dodawa. Štwórtk wobdźěli so Maas w New Yorku na konferency wo Libyskej. Kanclerka chce jutře do USA wotlećeć.
W instituće so wobhoniłoj
Berlin (dpa/SN). Zwjazkowa kanclerka Angela Merkel je dźensa zhromadnje ze zwjazkowym ministrom za strowotnistwo Jensom Spahnom (wobaj CDU) Roberta Kochowy institut wopytała. Tam chcyštaj so wo aktualnych nadawkach, předewzaćach a wužadanjach instituta wobhonić. Zwjazkowe knježerstwo bě připowědźiło, swoju strategiju přećiwo koronawirusej přichodnje změnić a njedźiwać jenož na incidencu natyknjenjow, ale tež ličbu nowych pacientow w chorownjach wobkedźbować.
Šćěpja strowotniski personal
Optimizm mjez předewzaćemi dale přiběra
Köln (dpa/SN). Hladajo na jasnje woteběrace ličby infekcijow z koronawirusom a přiběracu zwólniwosć so šćěpić dać, je optimizm w němskim hospodarstwje dale a wjetši. „Prěni króć po wudyrjenju pandemije zhladuje najwjetši dźěl předewzaćow z wulkim optimizmom na lěto 2021.“ Takle zjima Institut němskeho hospodarstwa wuslědk swojeho najnowšeho konjunkturneho naprašowanja. „Pandemija swoju hrózbu poněčim zhubja“, rjekny zamołwity instituta za naprašowanje Michael Grömling.
Dobra połojca (51 procentow) wšěch 2 000 narěčanych předewzaćow liči lětsa z wyšej produkciju hač w lěće 2020. Jenož 15 procentow wočakuje špatniše wuslědki. Něhdźe 43 procentow předewzaćow chcyło wjace ludźi přistajić hač loni. Nimale runje telko (42 procentow) chcyło wjace inwestować. Přirunujo z nalětnim naprašowanjom je so nalada widźomnje polěpšiła.
