Poraženosć po atentaće
Amsterdam (dpa/SN). Pospytane morjenje prominentneho nižozemskeho kriminalneho reportera Petera R. de Vriesa zbudźa w kraju wulku poraženosć. Policija je třoch podhladnych zajała. Ministerski prezident Mark Rutte rěčeše wo „nadpadźe na swobodny žurnalizm“. Na reportera běchu wčera wječor třěleli, jako wón studijo telewizijneho sćelaka wopušći. Skućićel bě jemu do hłowy třělił a jeho žiwjenjastrašnje zranił. De Vries leži w kritiskim stawje w chorowni.
Warnuja Iran před eskalaciju
Wien (dpa/SN). Wonkowni ministrojo Němskeje, Francoskeje a Wulkeje Britaniskeje warnuja Iran před dalšej eskalaciju w atomowej zwadźe. W zhromadnej deklaraciji zwuraznjeja woni swoje „chutne starosće“, zo móhł kraj uran na maćiznu předźěłać, kotraž hodźi so za twar atomowych bróni. Tajki material njeje za ciwilny wobłuk atomoweje energije trěbny, ale słuži jeničce za twar jadrowych bróni, ministrojo pisaja.
Dalše ćěła wućahnyli
Kritizuja namóc ze stron policije
Madrid (dpa/SN). Španiska policija dyrbi sej zasadźenja gumijowych retlow přećiwo wobdźělnikam demonstracije přećiwo homofobnej namocy raznu kritiku lubić dać. Na widejach je widźeć, kak su policisća póndźelu wječor bjez widźomneje přičiny demonstrantow w španiskej stolicy Madridźe bili. W telewiziji kritizowachu, zo su dźěle španiskeje policije na prawe wóčko slepe. Přećiwo lěwicarskim demonstrantam wone retle spěšnje wućahnu. Porno tomu móža prawicarjo w zjawnosći hitlerski postrow pokazać, zakazane spěwy spěwać a chorhoje wustawje njepřećelsce zmyslenych skupin při sebi měć, bjez toho zo policija jedna.
We wjacorych městach běchu póndźelu smjerće 24lětneho muža dla demonstrowali. Jeho běchu sobotu rano před diskoteku homofobnje ranili a tak ćežko zbili, zo wón na to w chorowni wudycha.
Nahubniki dale wužiwać
Wikowarjo drogow zajeći
Podstupim (dpa/SN). Po cyłoeuropskim wuhódnoćenju zaklučowanych mobilnych telefonow je so policiji w Braniborskej wuspěšna akcija přećiwo organizowanej drogowej kriminaliće poradźiła. Při tym su 24 podhladnych zajeli, kaž policajski prezidij w Podstupimje zdźěli.
Francoskim a nižozemskim fachowcam bě so poradźiło, koděrowane mobilne telefony rozklučować. Tak móžachu chłostajomne njeskutki zwěsćić, struktury wujasnić, transportne puće wotkryć a skućićelow zajeć. Přepytujo bydlenja a objekty w Braniborskej su zastojnicy 160 kilogramow marihuany, jedyn kilogram kokaina, wjace hač šěsć kilogramow amfetaminow, nimale 13 kilogramow crystala meth a 60 000 ecstasy-tabletow namakali. Nimo toho sćazachu brónje, pjenjezy, wjacore awta a debjenki.
Zwjazkowy kriminalny zarjad bě w aprylu 2020 wot europskeje policije Europol wotpowědne informacije dóstał a zwjazkowym krajam posrědkował. Po cyłej Němskej su mjeztym 750 podhladnych zajeli.
To a tamne (07.07.21)
Zatłusnjeneje nohi dla je 76lětny rentnar při wuparkowanju swojeho awta w Neustrelitzu štyri dalše jězdźidła a 25 000 eurow škody zawostajił. Spočatnje bě muž do dweju awtow storčił. Při přešaltowanju pak je z nohu mjez borzdźidłowym a płunowym pedalom awtomatikoweho awta tčacy wostał. Te smaleše na to po parkowanišću a zrazy do dalšeju wozow. Kaž dźiw so nichtó njezrani. Wšako bě tam tójšto ludźi po puću. Awta pak běchu wšitke skóncowane.
Zranjenu wrónu ze štoma wuchowała je wohnjowa wobora w Berlinskim měšćanskim dźělu Rudowje. Něhdźe 20 metrow wysoko bě so ptak w powjazu zapopadnył a zranił. Wobydler wołaše na to pomocnikow, kotřiž přińdźechu z mustwom za wuchowanje ludźi z wulkeje wysokosće. Woni wrónu wuswobodźichu a přepodachu ju skótnemu lěkarjej.
Ćěkaja před talibanami
Dušanbe (dpa/SN). Centralnoaziska republika Tadźikistan mobilizuje 20 000 rezerwistow, zo by swoju wjace hač 900 kilometrow dołhu mjezu k Afghanistanej škitała. Wukazał je to prezident Emomali Rachmon, po tym zo bě wčera wjace hač tysac afghaniskich wojakow před islamistiskimi talibanami do bywšeje sowjetskeje republiki ćeknyło. Bě to najwjetša ličba ludźi w běhu dnja, kotřiž za wućekom pytaja. Minjene dny běchu dalše jednotki Afghanistan wopušćili.
Při rozbuchnjenju so zranili
Lovosice (dpa/SN). Při rozbuchnjenju w fabrice za biologiske ćěriwa w Čěskej njedaloko sakskeje mjezy su so štyrjo dźěłaćerjo ćežko zranili. Jednoho z nich dowjezechu z helikopterom do specialneje kliniki za spalenja. Njezbožo sta so minjenu nóc w sewjeročěskich Lovosicach. Dźesatki wohnjowych wobornikow su woheń w hali hašeli. Po prěnich informacijach bě so heksan zapalił, kotryž trjebaja w chemiskej industriji jako rozpušćenski srědk.
Kónčnu rozprawu přepodali
Zwjazkowy prezident Frank-Walter Steinmeier je wčera w Berlinje ...
Bórze dwójka na čole sakskeje krajneje SPD ?
Lipsk (dpa/SN). Sakska SPD móhła hižo bórze wot dwójki nawjedowana być. To su delegaća strony předwčerawšim, njedźelu, na swojim krajnym zjězdźe w Lipsku wobzamknyli a wustawki strony wotpowědnje změnili. Po nowym statuće dyrbjała w tajkim dwójnym nawodnistwje znajmjeńša jedna žona zastupjena być. Tež muski předsyda abo žona na čole staj móžnaj. Ryzy muska dwójka pak je wuzamknjena.
W swojej narěči namołwješe rozžohnowacy so krajny předsyda Martin Dulig čłonow strony do energiskeho wólbneho boja w zbywacych tydźenjach do wólbow zwjazkoweho sejma, najebać špatne wuslědki naprašowanjow. Wón napominaše, zo njesměła so strona nětko ze sobu zaběrać, po tym zo bě wón njedawno připowědźił, zo njebudźe na wólbnym zjězdźe sakskeje SPD w oktobru hižo jako předsyda kandidować.
Čłonojo dyrbjeli so nětko „z połnej paru“ do wólbneho boja podać. Wudani so „dale wo kóždy hłós wojować“, Dulig podšmórny. Hladajo na wuslědki naprašowanja móhło sej 30 procentow ludźi w Němskej předstajić, zo wola SPD.
Statne srědki komunam pomhali
Gütersloh/Drježdźany (dpa/SN). Koronakriza je sakske komuny ćežko trjechiła, ale statne pomocy su najhóršemu zadźěwali. Kaž z najnowšeje komunalneje financneje rozprawy Bertelsmannoweje załožby wuchadźa, su komuny pola dawkow a popłatkow wjace hač 600 milionow eurow přisadźili. Na kóncu pak móžachu etat ze snadnym dobytkom wotzamknyć, dźakowano wobšěrnej pomocy Zwjazka a krajow. Za komuny bě to mjeztym wosme lěto za sobu z dobytkom.
Po rozprawje Bertelsmannoweje załožby je so koronakriza wosebje na sensibelny přemysłowy dawk wuskutkowała. Po cyłej Němskej su komuny nimale dźewjeć miliardow eurow zhubili, w Sakskej wjace hač 300 milionow.
Zo bychu straty wurunali, su sej Zwjazk a zwjazkowe kraje kóšty dźělili. Dokelž njebě kriza na kóncu tak wulka kaž wočakowana, su sakske komuny samo dźesać milionow eurow wjace dóstali hač lěta 2019. Nimo toho je Zwjazk swój podźěl za kóšty Hartza IV powjetšił, štož komunam tohorunja pjenježnje pomha.
Šćěpjenym swobodu wróćić
Šef zwjazka kasowych lěkarjow za kónc wšěch wobmjezowanjow
Berlin (dpa/SN). Předsydka SPD Saskia Esken stajnu šćěpjensku komisiju namołwja, swoje stejišćo nastupajo šćěpjenje dźěći přećiwo koronawirusej změnić. „Trjebamy nuznje šćěpiwo za dźěći, a nadźijam so, zo komisija wo swojim dotalnym nastajenju hišće raz rozmysluje“, rjekny Esken nowinarjam. Tež bayerski ministerski prezident Markus Söder (CSU) sej žada, zo dyrbjała šćěpjenska komisija šćěpjenje dźěći a młodostnych skónčnje poručić. To by škit wšitkich powjetšiło a generaciji, kotraž dyrbješe so tójšto přijomnosćow wzdać, swobodu wróćiło.
Šćěpjenska komisija njeje dotal šćěpjenje dźěći nad dwanaće lětami zasadnje poručiła, dokelž ma riziko ćežkeho schorjenja na koronawirus w tej starobnej skupinje za skerje snadne.
