Scholz žada sej nowy rozmach za wuchod
Bad Saarow (dpa/SN). Zwjazkowy financny minister Olaf Scholz (SPD) žada sej nowy rozmach na dobro wuchodneje Němskeje. Přeco hišće ma so tójšto wuchodnych Němcow za wobydlerjow druheje klasy, rjekny Scholz wčera na wuchodoněmskim hospodarskim forumje w braniborskim Bad Saarowje. Wón skedźbni na rozdźěle nastupajo dochody, zamóženje a zdźědźenja kaž tež na pobrachowace koncernowe centrale a slědźenske institucije. „To njeje spomóžne za našu towaršnosć a za Němsku scyła.“ Dotalny natwar na wuchodźe bě předewšěm napodobnjenje zapada. „Štóž pak stajnje jenož nachwatuje, njemóže nihdy prěni być.“ Zaměr měł być, nowe a do přichoda sahace technologije na wuchodźe zasydlić. Tak njenastanu jenož nowe předewzaća, ale tež derje płaćene dźěłowe městna na dobro ludźi. Hladajo na mobilitu pokaza Scholz na twar noweje twornje awtotwarca Tesla a na zawod elektroawtow Volkswagen w Zwickauwje. Runje na polu klimoweje neutrality je tole wuchodnej Němskej hoberska strategiska šansa.
Chcedźa awtorow hidy chłostać
Dźeń a wjace ludźi šćěpjenych
Fachowcy liča z widźomnym wotputanjom koronapandemije
Berlin (dpa/SN). Něhdźe połojca wšitkich ludźi Němskeje nad 60 lětami je po informacijach zwjazkoweho ministra za strowotnistwo Jensa Spahna (CDU) ze šćěpjenjom pře koronawirus dospołnje škitana. Wjace hač 80 procentowe z teje skupiny je znajmjeńša prěnju sykawu dóstało, Spahn wčera zdźěli.
Podźěl jónu šćěpjenych hladajo na cyłe wobydlerstwo zwjazkoweje republiki bliži so z 48,4 procentami 50 procentam, štož wotpowěduje 40,2 milionomaj ludźi, kaž Roberta Kochowy institut informuje. Dospołny škit před wirusom matej 26,2 procentaj, potajkim 21,8 milionow ludźi. Cyłkownje su po informacijach instituta dotal 60,7 milionow dozow seruma přetrjebali, jeničce minjeny kónc tydźenja 622 000.
To a tamne (15.06.21)
Nawoda indiskeje sekty z 38 mandźelskimi a 89 dźěćimi je 76lětny zemrěł. Ziona Chana bydleše ze swójbu w domje z wjace hač sto stwami. Mjeztym je wjes, w kotrymž bydleše, turistiska atrakcija. Někotre medije rozprawjeja, zo měješe Chana hišće wjace žonow a dźěći. Prěnju žonu bě sej jako teenager wzał, poslednju jako 60lětny. Polygamija je drje tež w Indiskej zakazana, někotre kmjeny pak maja wuwzaćnu dowolnosć.
W nohajcach je policist w nocy podhladneho přesćěhał, doniž jemu kolegojo na pomoc njepřijědźechu. W swojim swobodnym času policist wobkedźbował, kak so porik na dróze wadźi. Krótko na to 20lětny muž špihele parkowacych awtow wotkopa. „Chwile sej črije wobuć policist w chwatku njeměješe“, policija piše. Jako zastojnicy 20lětneho dosahnychu, so tón mócnje wobaraše.
Bamž poraženy njeskutkow dla
Vatikan/Ottawa (B/SN). Bamža Franciskusa namakanje powostankow 215 ćěłow indigenych dźěći w kanadiskim lěhwje překubłanja jara boli. To praji wón 6. junija we wobłuku připołdnišeho modlenja Jandźelknjeza na Pětrowym naměsće w Romje. Statne a cyrkwinske zarjadnistwa wusko hromadźe dźěłaja, zo bychu pozadki njeskutkow wujasnili. „Tónle pad je chutne warnowanje wšěm, so kóždehožkuli kolonialneho zadźerženja wzdać“, swjaty wótc wuzběhny. Wón je namołwjeny, za njeskutki w domach a internatach katolskeje cyrkwje so oficialnje zamołwić.
Diplomatiska kriza
Kritizuja wuslědki wjerška
Carbis Bay (dpa/SN). Wuwićowe organizacije su wuslědki wjerška bohatych industrijnych krajow G 7 raznje kritizowali. Po skónčenju tři dny trajaceho zetkanja w jendźelskim Carbis Bayju kritizuja, zo bohate staty za bój přećiwo koronapandemiji w chudych krajach dosć mocy njenałožeja. Zastupjer organizacije Oxfam International Jörn Kalinski rěči wo „kolosalnym přesłapjenju“. Chude kraje su dale na wulkomyslnosć bohatych industrijnych statow pokazane.
Nowe knježerstwo spřisahane
Jerusalem (dpa/SN). Po spřisahanju noweho israelskeho knježerstwa su Němska a USA nowemu ministerskemu prezidentej Naftalijej Bennettej wuske zhromadne dźěło poskićili. Z jeničkim hłosom předskoka běchu nowu koaliciju wosom politiskich stron w parlamenće wobkrućili. Bě to zdobom kónc politiskeje doby dotalneho ministerskeho prezidenta Benjamina Netanjahuwa, kiž bě wot lěta 2009 bjez přestawki w zastojnstwje israelskeho premiera.
Nětko digitalny wupokaz
Sakski ministerski prezident Michael Kretschmer (CDU, za blidom napr.) ...
Wjeršk NATO z Bidenom
Strašna tendenca
Wonka bórze bjez nahubnika?
Berlin (dpa/SN). Zwjazkowy minister za strowotnistwo Jens Spahn (CDU) ma hladajo na woteběracu ličbu infekcijow z koronawirusom za předstajomne, winowatosć wužiwanja škitneho nahubnika poněčim zaso zběhnyć. Tak měła wona pod hołym njebjom zasadnje wotpadnyć. W kónčinach z niskej incidencnej hódnotu a wysokej kwotu šćěpjenja tež nutřka. „Jako poručenje pak wostanje: W dwělomnych padach nahubnik wužiwać, wosebje na pućowanjach abo zetkawanjach w nutřkownych rumnosćach. Wjace wěstoty hakle změjemy, su-li wšitcy přitomni pak šćěpjeni abo prawidłownje testowani.“
Zběhnyć winowatosć wužiwanja škitneho nahubnika w Danskej wot dźensnišeho tež debatu w Němskej pohonja. FDP a AfD žadatej sej kompletne zběhnjenje winowatosće. Strowotniski fachowc SPD Karl Lauterbach a šef krajneje skupiny CSU w zwjazkowym sejmje Alexander Dobrindt mataj za móžne zběhnyć wužiwanje nahubnika pod hołym njebjom, nic pak nutřka.
