Wjele lubjacej projektaj zeznali
Wo zajimawymaj projektomaj, kotrejž stejitej we wuskim zwisku ze strukturnej změnu we Łužicy, su čłonojo braniborskeje Rady za naležnosće Serbow na swojim wčerawšim wirtuelnym posedźenju nadrobnišo zhonili.
Přibližić so dale trjeba
Magdeburg (dpa/SN). Do dźensnišich wuradźowanjow wuchodoněmskich ministerskich prezidentow je saksko-anhaltski ministerski prezident Reiner Haseloff (CDU) potwjerdźił, zo nima temu přiměrić žiwjenske wuměnjenja na wuchodźe a zapadźe Němskeje, „dawno hišće“ za wotbytu. To je runje tak kaž do přichoda hladaca strukturna politika přewšo wažne, rjekny politikar CDU nowinarjam. Wuchodni ministerscy prezidenća dźensa internetnje wuradźuja.
Reforma budźe financowana
Berlin (dpa/SN). Zwjazkowy dźěłowy minister Hubertus Heil (SPD) kritiku na financowanju reformy hladanskich powołanjow dla wotpokazuje. Wyše mzdy chcył wón ze srědkow hladanskeho zawěsćenja a z dawkami financować, rjekny Heil dźensa rozhłosej NDR. Knježerstwo je dźensa wotpowědnu reformu na dobro wyšich mzdow schwaliło. Za nju ma přinošk ludźi bjez dźěći k hladanskemu zawěsćenju wo 0,1 procent rozrosć, štož je hižo wulku kritiku zbudźiło.
Wjace seruma produkować
Wuchod njetrjeba powučenja
Zakituje dialog
Nowy klimowy program Sakskeje
Drježdźany (dpa/SN). Sakska chce energijowu změnu dale pospěšić. Za to je krajne knježerstwo wčera energijowy a klimowy program schwaliło. Wobswětowy minister Wolfram Günther (Zeleni) rěčeše wo „mězniku“ a sobu najwažnišim předewzaću koalicije CDU, SPD a Zelenych. Nowy program rjaduje strategiske wusměrjenje energijoweje a klimoweje politiki swobodneho stata hač do lěta 2030.
Centralnu rólu hraje wětřikowa a solarna energija. Po tym puću chce Sakska hač do lěta 2030 něhdźe 65 procentow wočakowaneje přetrjeby miliny z wobnowjomnych energijow zdobyć. Kelko nowych wětrnikow a solarnych připrawow dyrbja za to twarić, njeje dotal jasne. Wětrniki dyrbja znajmjeńša tysac metrow wot sydlišćow zdalene być.
Torsten Herbst, zapósłanc FDP w zwjazkowym sejmje, koncept kritizuje. Wón skedźbni wčera na to, zo wutwar wětroweje a solarneje energije problem běžneho zastaranja z milinu njerozrisa. AfD warnowaše před „hoberskimi importami miliny“ po kóncu brunicy.
To a tamne (02.06.21)
Pytanje za zhubjenej holčku je w bayerskim Altenmünsteru jeno dźesać mjeńšin trało. Staršej běštaj wohnjowu woboru wołałoj, dokelž njeběštaj dźowku nimale hodźinu wjace widźałoj a mjeztym so ćmičkaše. Wobornicy nańdźechu třilětnu spjacu pod kuchinskim blidom.
Do Karla Lauterbacha zalubowała je so 53lětna w Kölnje. To znajmjeńša twjerdźi kabaretistka Hazel Brugger, poćahowaca so na list žony, kotraž ju prosy styki k Lauterbachej nawjazać, zo njeby so list w „masy fanoweje póšty“ zhubił. Lauterbach bě žonje minjene měsacy kruta zepěra w koronakrizy, žona piše. Po spěwnym wustupje politikarja we wusyłanju „Carolin Kebekus Show“ bě pak „lubosćinski šok“ poćerpjeła, kaž piše. Dyrbjał-li so kontaktny pospyt nimokulić, chcyła so 53lětna wopić. Lauterbach je sam kubłacy nan pjeć dźěći.
Nichtó nochce kontrolować
Berlin (dpa/SN). Po padach pozdatneho wobšudnistwa při wotličenju testow na koronawirus njeje jasne, štó ma testowanske centrumy přichodnje kontrolować. Komuny a strowotniske słužby to runje tak wotpokazuja kaž zwjazk kasowych lěkarjow. Podobnje wuprajichu so zwjazk městow a gmejnow kaž tež sejm wokrjesow, dokelž njejsu za to ani personelnje ani financielnje kmane, kaž zdźělichu. Strowotniscy ministrojo Zwjazka a krajow běchu so wčera na kontrole dojednali.
Přihotuja wjeršk z Bidenom
Brüssel (dpa/SN). Wonkowni a zakitowanscy ministrojo čłonskich krajow NATO přihotuja wot dźensnišeho na widejowej konferency wjerškowe zetkanje statnych a knježerstwowych šefow. Na prěnim zetkanju z prezidentom USA Joewom Bidenom 14. junija chcedźa wo reformowej iniciatiwje „NATO 2030“ rozsudźić. Při tym ma tež wo wjetše wudawki za zakitowanje a wo stejišćo napřećo Ruskej a Chinje hić.
Serum za dźěći w EU dowoleny
W kulturnym centrumje afroameriskeje wosady Tulsa w staće USA ...
Wuběrkaj so schadźowałoj
Budyšin (SN). K wirtuelnej wuměnje nazhonjenjow schadźowałoj stej so wčera Europski wuběrk čěskeho Senata a čłonojo wuběrka za prawo, demokratiju a Europu Sakskeho krajneho sejma. Prěnju wuměnu tajkeho razu nastorčił bě předsyda čěskeho wuběrka Mikuláš Bek.
W něhdźe hodźinu trajacej rozmołwje dźěše mjez druhim wo saksko-čěske zhromadne dźěło we wobłukach wobchad, strukturna změna, energijowe hospodarstwo, wobswět a medicinske zastaranje. We wuběrkomaj běchu sej přezjedni, zo trjebaja předewšěm młodźi ludźo impulsy za wuměnu. Tak chcedźa projekty podpěrać, z kotrymiž maja młodźi ludźo na woběmaj bokomaj mjezy składnosć so zetkawać. „Chcemy nazhonjenja pandemije wužić a zastatki zhromadneho dźěła nachwatać, kotrež su nanuzowaneje přestawki dla nastali“, rjekny Marko Šiman (CDU), předsyda sakskeho wuběrka. Wotnětka chcedźa so čěscy a sakscy zapósłancy prawidłownje schadźować, nazymu zaso wosobinsce.
Merkel: Borzdźidło skónčić
Berlin (dpa/SN). „Zwjazkowe nuzowe borzdźidło“ z jednotnymi naprawami při wulkej ličbje koronainfekcijow móže po měnjenju zwjazkoweje kanclerki Angele Merkel (CDU) kónc junija wuběžeć. „Wone móže so skónčić“, rjekny Merkel wčera w Berlinje. Zdobom wona w padźe zaso přiběraceje ličby infekcijow wujasni: „Dyrbjało-li so něšto přez mutacije wuwić, čehož so njenadźijamy, móžemy borzdźidło kóždy čas reaktiwizować.“
W aprylu wobzamknjene cyłoněmske škitne naprawy su w zakonju wo škiće ludźi před infekcijemi hač do 30. junija wobmjezowane.
Kaž Angela Merkel potwjerdźi, je nuzowe borzdźidło k tomu přinošowało třeću žołmu korony zadźeržeć. Wona dźakowaše so ludźom za rozumnosć a napinanja w minjenych měsacach, zdobom pak rjekny: „Korona tu hišće je, byrnjež incidency k našemu wjeselu woteběrali. Dyrbimy dale rozumni wostać.“
Hinak hač kanclerka sej strowotniski politikar CDU Erwin Rüddel žada, borzdźidło mutacijow dla podlěšić.
