Washington (dpa/SN). Prezident USA Donald Trump je najwyšemu nawodźe Iranej indirektnje ze smjerću hrozył. „Wěmy dokładnje, hdźe so ‚najwyši nawoda‘ Ali Chamenei chowa. Wón je lochki cil“, piše Trump na swojej platformje Truth Social. Najprjedy pak je Chamenei tam wěsty: „Njebudźemy jeho morić, znajmjeńša nic wokomiknje.“ Trump warnowaše Iran před tym, rakety na ciwilistow abo wojakow USA třěleć a hrožeše: „Naša sćerpnosć so nachila.“ W dalšim poselstwje sej wón wot Irana žadaše: „Kapitulacija bjez wuměnjenjow!“

Do toho bě Ajatollah Ali Chamenei ­Israelej hrozył: „Zionistiski terorowy režim dóstanje jasnu wotmołwu. Njeznajemy žanu hnadu“. Iranske rewoluciske gardy běchu wjacore salwy raketow do směra na Israel startowali.

Chórowy koncert ze zhromadnym spě­wanjom wčera w Malešecach je nazornje pokazał, zo je čestnohamtske pilne dźěło zakład wuspěcha. To płaći za jubilejne swjatočnosće w Chrósćicach składnostnje 800. róčnicy naspomnjenja wsy runje tak kaž w Malešecach, hdźež lětsa samsny ju­bilej swjeća. Chwalobne je, zo sej tam swoje serbske korjenje waža a zo stej Radworski chór Meja a serbski muski chor Delany k poradźenemu koncertej přinošowałoj. Domowina je so na financowanju projekta wobdźěliła, na čož njejsu zamołwići w Malešecach w swojich dźaknych słowach po­zabyli. Njech smy sej toho wědomi, zo zwonka serbskeje jadroweje kónčiny dokładnje registruja, hač so na jich aktiwitach wobdźělimy abo hač so hordźi wotwobroćimy, jenož dokelž so nam na kulturnym polu wo wjele lěpje dźe. Za dobry tydźeń poćahnu zaso mjezynarodne kulturne skupiny po Chrósćicach. Tam, na mjezynarodnym folklornym festiwalu měli sej wuwědomić, zo njejsmy pupk swěta. Marko Wjeńka

Wiesbaden (dpa/SN). Lěćo, słónco, kupanske wjesela: Štóž chce w tutym lěću do lěsneje kupjele hić, dyrbi něšto wjace pjenjez za zastup wudać hač loni. To je zwjazkowy statistiski zarjad zwěsćiło. Płaćizny za wopyt kupjelow su w meji přirunujo z lětom 2024 wo 5,7 procentow stupali.

Tohorunja dosć rozdźělnje wuwiwaja so płaćizny za wěcy, kotrež su za kupanje wažne, na př. za kupansku drastu. Muska kupanska drasta je so wo 0,6 procentow podróšiła, płaćizna sportoweje a kupanskeje drasty žonow porno tomu je wo 1,1 procent spadnyła. To je naspomnjenja hódne, dokelž su powšitkowne płaćizny w Němskej wo 2,1 procent rozrostli.

W Němskej eksistuje 2 800 kupjelow, mjez nimi je 570 lěsnych kupjelow. Ně­hdźe 600 ludźi je w lěće 2023 wukubłanje na fachoweho přistajeneho za kupjele – kupanskeho abo płuwarskeho mištra – zahajiło.. To běchu tři procenty wjace hač lěto do toho. Dwě třećinje z nich ­běchu mužojo. W běhu minjenych dźesać lět je ličba ludźi, kotřiž su tajke wu­kubłanje zahajili, wo 27,5 procentow ­rozrostła.

Wehlen (JM/SN). Po dołhim čakanju a wjele diskusijach je nětko skónčnje tak daloko: Přichodnu sobotu nowu wěžu na ruinje srjedźowěkowskeho hrodu we ­Wehlenje w Sakskej Šwicy oficialnje zjawnosći přepodadźa. Wěžu běchu wot lěta 2017 z wjele prócu ponowili. Hłownu ­zamołwitosć měješe skupina sydom njesprócniwych čłonow towarstwa „pře­ćelow hrodu“ z měšćanostu Klausom ­Tittelom na čole. Jara spomóžne běchu tež njewočakowane spěchowanske srědki 364 000 eurow w lěće 2023, kotrež dalše dźěła zmóžnichu. Na kóncu je po­nowjenje sydom metrow wysokeje wuhladneje wěže 475 000 eurow płaćiwo.