Berlin (dpa/SN). Prezident zwjazkoweje tajneje słužby BND, Bruno Kahl, před tym warnuje, ruske wotpohlady nastupajo zapad a NATO podhódnoćić. „Smy sej jara wěsći a mamy za to dopokazy tajneje słužby, zo je Ukraina jenož kročel na puću do zapada“, rjekny Kahl rozhłosownikam. „W Moskwje su ludźo, kotřiž njewěrja, zo artikl 5 wustawy NATO funguje. A woni bychu to rady wuspytali.“ Tutón artikl je centralny dypk kolektiwneho ­zakitowanja a rjaduje mjezsobnu pomoc w padźe nadpada.

Zaměr ruskeho nawodnistwa je, wliw kraja směr zapad rozšěrić. „Woni chcedźa NATO na staw, kotryž bě kónc 90tych lět, wróćo stłóčić“, Kahl rjekny. Wottrašenje je „njekrawny puć“, wójnje zadźěwać.

Moskwa (dpa/SN). Ruska a Ukraina stej dalšu wuměnu jatych zahajiłoj. Na to běchu so zastupnicy Kijewa a Moskwy w direktnych rozmołwach spočatk měsaca w Istanbulu dojednali. Prěnju skupinu ruskich wojakow pod 25 lětami su z ukrainskeje­ wójnskeje jatby pušćili, zakitowanske ministerstwo w Moskwje zdźěla. Ukrainje su podobnu ličbu jatych přepodali. W Kijewje su tule informaciju wobkrućili. Ruscy wojacy su tuchwilu w Běłoruskej, hdźež jich lěkarsce pře­pytuja a zastaraja.

„Naši ludźo su zaso doma“, piše ukrainski prezident Wolodymyr Zelenskyj internetnje. Mjez nawrótnikami su nimo młodych wojakow tež zakitowarjo ukrainskeho města Mariupol, kotřiž běchu dlěje hač tři lěta w ruskej wójnskej jatbje. Wuměna jatych bě zazběh wjacorych akcijow tutoho razu.

W druhim kole jednanjow mjez ruskimi a ukrainskimi zastupnikami běchu so na wuměnu jatych a padnjenych dojednali. Pječa chcetej krajej hač do tysac jatych wojakow mjez sobu wuměnić.

Štóž so na wulkim wubědźowanju wobdźěli a dyrbi so kritiskim wočam jurorow předstajić, tón chce so wězo tak derje kaž móžno prezentować. Při wubědźowanju wsow njeje to hinak. Potom wjesnjenjo tež posledni kućik rjenje wurjedźa a swoje najrjeńše blečki pokazaja. Po cyrkwinskej protyce drje so jutrowny čas ze swjatkami skónči. Zo pak w Němcach krótko do swjatkow křižerjo jěchaja a za jurorow „jutry hraja“, zawostaja we mni jěry přisłód. Nałožk z hłubokim nabožnym pozadkom njeje tola žana atrakcija, kotruž móžeš ­cyłe lěto jako kekliju předstajeć. To dopomina mje na naprašowanje, kiž bě před tójšto lětami do Domowinskeho zarjada dóšło. Skupina japanskich turistow chcyše rady raz křižerjow dožiwić. Štož su tehdy přećelnje wotpokazali, dźensa po wšěm zdaću žadyn problem wjace njeje. Snano w přichodźe tež prěnje swjate woprawjenje abo firmowanje abo procesion na Bože ćěło „hrajemy“, zo móhli swoju wjes prawje rjenje prezentować. Marian Wjeńka

Podstupim/Drježdźany (dpa/SN). Podłu němskich awtodróhow pobrachuja tysacy parkowanišćow za nakładne awta. Tole je po měnjenju Awtomobiloweho kluba Europa strašne wohroženje nadróžneho wobchada. Wot 15. apryla hač do 3. junija su w nadawku kluba ličili, kelko nakładnych awtow wječor wot 20.30 hodź. při awtodróhach parkuje. Při tym zwěsćichu, zo je předewšěm na južnym Berlinskim wobkruhu A10 a podłu A24 w Mecklenburgsko-Předpomorskej situacija wopak parkowacych awtow dla strašna.

Z wućeženjom 165 procentow je w Sakskej wosebje parkowanišćo Hornja Łužica sewjer při A4 negatiwnje napadnyło. Podłu A17 pola Drježdźan zwěsćichu 120 procentow wućeženja. „Wot 16 hodź. šoferojo wšědnje wo parkowanišća wojuja“, rjekny rěčnik předsydstwa Zwjazka nakładnych wozydłownistwow Dirk Engelhardt. Parkowanišća su wječor a w nocy masiwne přećežene a wobchad wotstajenych wozydłow dla zdźěla strašnje wohroženy. Tak steja nakładne awta na zajězdach, kiž na parkowanišća wjedu abo na parkowanskich płoninach, kiž su za wosobowe awta rezerwowane.