Płaćizny dale a bóle zwyša
Frakcija unije hrozy knježerstwu
Berlin (dpa/SN). Frakcija unije je zwjazkowemu kanclerej Olafej Scholzej (SPD) hrozyła, zo budźe w zwjazkowym sejmje ćišć wukonjeć, zo dyrbjała Němska němske brónje do Ukrainy dodawać. „Chcemy zwjazkowe knježerstwo w krizy podpěrać“, zdźěli naměstnik frakcije unije Johann Wadephul (CDU). Jelizo so Scholz dale njehiba, dyrbi wón z próstwu CDU a CSU w zwjazkowym sejmje ličić.
Politikarjo unije a zastupjerjo amploweju stronow Zelenych a FDP su Scholzej wjace króć wahanje wumjetowali. W rozmołwje z nowinu Welt je Wadephul twjerdźił, zo zwjazkowe knježerstwo zjawnosć hladajo na přihłosowanje dodawanja brónjow za Ukrainu slepi. „Na pjenjezach w Ukrainje, tež podpěry EU dla, njezaleži. Zwyšenje srědkow je tuž jenož manewer k zamućenju“, wón wuswětli.
Předewšěm dźe w diskusiji wo to, hač Němska eksport ćežkich brónjow do Ukrainy dowoli. Olaf Scholz měł skónčnje rozsudźić. „Wón je sobu za to zamołwity, zo njemóže so Ukraina wobarać.“
To a tamne (19.04.22)
Něhdźe 80 000 listow su dźěći jutrownemu zajacej w delnjosakskej wjesce Ostereistedt napisali. Přeća dopisowarjow běchu jara wšelake. Tak přejachu sej dźěći měr na Ukrainje, kónc koronapandemije, ale tež słódkosće a hrajki. Wulka ličba čestnohamtskich pomocnikow nětko młodym dopisowarjam wotmołwi.
Zhubjeneho pytona su zastojnicy w japanskim měsće Kurashiki w awće wobsedźerja nětko skónčnje namakali. Poprawom chcyše wón hada ze swojeho awta wzać, hdźež pak jeho njenańdźe. Dźesać wosobow sylny team policije bě dny dołho za zwěrjećom pytał. Po wšěm zdaću bě pyton cyły čas w awće, dokelž su jeho we fašku za kablemi namakali.
Najwjetše ćěkanje po Druhej swětowej wójnje w Europje
Budyšin (CS/SN). W třećim pospyće wotmě so minjenu wutoru hižo za 2020 planowany přednošk wo ćěkancach-wuhnatych w Sakskej w Budyskim archiwowym zwjazku. Před lětomaj sej hišće nichtó njemysleše, kajku aktualitu tema ćěkanca a wuhnawanje 2022 nabudźe. Stej situacija po 1945 a dźensniše ćeknjenje z Ukrainy přirunajomnej, prašeše so wčera referentka dr. Uta Bretschneider. Wěste znajmjeńša je, zo je dźensniša situacija najwjetše ćěkanje po Druhej swětowej wójnje w Europje. Jenož w Ukrainje je sydom milionow ludźi na ćěkańcy; z Ukrainy do wukraja je so něhdźe 4,5 milionow ludźi dało. W Sakskej je mjeztym něhdźe 25 000 ćěkancow dóšło.
Paus ma Spiegel naslědować
Berlin (dpa/SN). Financna politikarka Zelenych Lisa Paus ma minjenu póndźelu wotstupjenu Anne Spiegel w zastojnstwje zwjazkoweje ministerski za swójby naslědować. To su stronske kruhi Zwjazka 90/Zelenych powěsćerni dpa wobkrućili. 53lětna diplomowa ludowa hospodarka lěwicarskemu křidłu strony přisłuša. Wona pochadźa z Berlinskeho krajneho zwjazka a je wot lěta 2009 zapósłanča Němskeho zwjazkoweho sejma.
Nowa rekordna suma
Frankfurt nad Mohanom (dpa/SN). Ludźo w Němskej su swoje zamóženje w druhim lěće pandemije dale množili. Kaž Němska zwjazkowa banka dźensa informuje, je pjenježne zamóženje priwatnych domjacnosćow z hotowych pjenjez, hódnotowych papjerow, zapołoženkow na bankach a z narokow zawěsćernjam napřećo loni w štwórtym kwartalu wo 161 miliardow na rekordnu sumu nimale 7 618 miliardow eurow stupało.
Kritika na sakskim rozsudźe
Wobraz zničenja pokaza so wčera na dróhach města Mariupola při ...
Zakazuja sej měšenje Ukrainy do politiki
Berlin (dpa/SN). „Zwjazkowy prezident je Němska. A tohodla je jeho wuprošenje ze stron prezidenta Zelenskeho wuprošenje Němskeje“, rjekny wicekancler Robert Habeck (Zeleni) po wotprajenju wopyta zwjazkoweho prezidenta Franka-Waltera Steinmeiera ze stron Ukrainy nowinam medijoweje skupiny Funke.
Předsyda frakcije SPD w zwjazkowym sejmje Rolf Mützenich je wšitke demokratiske strony namołwjał hłowu stata „před njewoprawnjenymi nadpadami“ škitać. „Wozjewjenje ukrainskeho knježerstwa, zo njeje wopyt zwjazkoweho prezidenta w Kijewje witany, je wobžarujomny a njewotpowěduje poćaham mjez krajomaj“, rjekny wón wčera w Berlinje.
Statne digitalne poskitki tež serbsce
Chrósćicy (SN). Sakska Rada za serbske naležnosće je so na dźěłowym posedźenju předwčerawšim w Chrósćicach na to dojednała, so za zapřijeće serbšćiny do digitalnych poskitkow swobodneho stata zasadźić. W konkretnymaj padomaj so gremij na ministerstwje za kultus a za nutřkowne wobroći.
Kaž gremij informuje, jedna so wo program Sophisto, kotryž je integrowany do sakskeho šulskeho portala a z kotrymž mjez druhim tež dalekubłanja wučerkow a wučerjow planuja, kaž tež online-formular sakskeje policije za wozjewjenje njeskutkow po digitalnym puću. We woběmaj njemóža so dotal wosebite serbske pismiki zapodać. W prěnim padźe tuž njehodźa so wopisanja serbskorěčnych dalekubłanjow korektnje podać. W tamnym zaručene njeje, serbske a hinaše wosobowe mjena z wosebitymi znamješkami prawje zapisać móc.
Postajenje Serbskeho zakonja, ze statnymi instancami serbsce komunikować móc, maja techniske wuměnjenja we wšitkich statnych poskitkach zaručeć.
Serbski sejm we wuměnje z SPD
Drježdźany (SN/at). Politikarkam a politikarjam stronskeho a frakciskeho nawodnistwa sakskeje SPD je wažne, zo na krajnej runinje naležnosće serbskeho ludu w jeho mnohotnosći wobkedźbuja. Tohodla chcedźa wuměnu ze zastupjerkami a zastupjerjemi wšelakich serbskich organizacijow intensiwnje pěstować. Krajna předsydka Kathrin Michel, frakciski předsyda Dirk Panter a serbskopolitiska rěčnica Sabine Friedel podšmórnychu w rozmołwje z Christinu Ruby, dr. Tomašom Wornarjom a Měrćinom Krawcom ze Serbskeho sejma, zo je nimo pěstowanja rěče a kultury widźomnosć serbskich zajimow w zjawnych diskursach wažny wobstatk za připóznaće serbskeje identity.
W srjedźišću wuměny předwčerawšim w Drježdźanach steješe w aktualnym koaliciskim zrěčenju CDU, Zwjazka 90/ Zelenych a SPD zakótwjeny přewod dialoga wo wjace prawach soburěčenja, sobutworjenja a sobupostajowanja serbskeho ludu. Kaž Serbski sejm zdźěli, je jeho delegacija ze swojeho wida pozadki a trěbnosć korporacije samozarjadnistwa předstajiła, wosebje jako nošer kubłanskeje awtonomije.
To a tamne (14.04.22)
W jutrownym času je 130 ze syna zdźěłanych zajacow w Silberbachu, wokrjes Hof, nastajenych. Wone su w kostimach, tak jako policisća abo wohnjowi wobornicy. Předstajene su wšelake sceny wjesneho žiwjenja, tak cyle aktualnje testowa stacija korony dla abo wuchowanska akcija wohnjoweje wobory. Jutry ma gmejnje Konradsreuth přisłušaca wjes z połsta dušemi wjace synowych zajacow hač wjesnjanow, a tójšto wopytowarjow.
Wulku konopjowu plantažu ze 415 000 rostlinami je španiska policija na sewjeru kraja našła. Dohromady pjeć wosobow bu při akciji w Navarrje zajatych, kaž zastojnicy wutoru zdźělichu. Sušene bychu rostliny hódnotu 30 milionow eurow na čornych wikach měli, dale předźěłane na cannabidiol (CBD) a dalše wudźěłki samo 100 milionow eurow. Ekstrakt CBD w medicinje wužiwaja.
