To a tamne (29.04.22)
Z nimale 300 km/h je so šofer w Bayerskej policajskej kontroli wuwinyć spytał. Jako zastojnicy spytachu, jeho na awtodróze A 8 pola Rosenheima zadźeržeć, 48lětny z 220 km/h dale jědźeše. Pozdźišo wotboči muž na A 93 a smaleše z nimale 300 km/h dale, byrnjež tam jenož 130 km/h dowolene byli. Krótko do mjezy k Awstriskej móžachu 48lětneho tola hišće zadźeržeć. Nětko dyrbi smaler ze skóržbu ličić.
Pěstowarske dźěći jako pomocnych policistow zasadźić chce policija w delnjosakskim Hamelnje. Hižo wjacore tydźenje bědźa so tam z wěcami, kotrež njeznaći na kolije kładu: nakupowanske wozy, wobruče abo drjewjane palisady. W měrcu je pjeć króć k zražkam ćahow dóšło. Nětko su dźěći bliskeje pěstowarnje prosyli, kolije wobkedźbować a pěstowarkam rjec, hdyž je jim něšto napadnyło.
Scholz do Japanskeje dolećał
Tokio (dpa/SN). Zwjazkowy kancler Olaf Scholz (SPD) je dźensa rano do japanskeje stolicy Tokija dolećał, hdźež wočakowaše jeho ministerski prezident Fumio Kishida. Scholz chce so tam na hospodarskej konferency wobdźělić. Při rozmołwach z Kishidu chcyše Scholz tež połoženje w Ukrainje wobrěčeć. Japanska je runja Južnej Koreji a Singapurej sankcije přećiwo Ruskej wukazała. Dodawanje bróni pak je sej kraj ze swojej powójnskej pacifistiskej wustawu sam zakazał.
Pólska žada sej pomoc EU
Berlin (dpa/SN). Pólska wočakuje wot Europskeje unije pjenježne srědki k zastaranju ukrainskich ćěkancow – podobnje, kaž bě to EU w krizy ćěkancow 2015 za Turkowsku wobzamknyła. Ministerki prezident Mateusz Morawiecki rjekny w Berlinje, zo zastaruje kraj ranjenych wojakow a 2,5 milionow ćěkancow, „kotrymž smy my Polacy durje a wutroby wotewrěli“. Wón doda: „Za to trjebamy pjenjezy“. Za zastaranje ćěkancow pak njeje EU „dotal ani centa“ płaćiła.
Droha technika stejo wostała
Prezidentka zwjazkoweho sejma Bärbel Bas je dźensa w israelskim ...
Nawoda UNO w Kijewje
Putin hrozy z namocu
Němska sćele Ukrainje tanki
Berlin (dpa/SN). W lědma widźanej přezjednosći stej koalicija SPD, Zelenych a FDP a opozicija dźensa wobzamknyłoj, wot Ruskeje nadpadnjenu Ukrainu z ćežkimi brónjemi podpěrować. Wotpowědny namjet su zhromadnje schwalili. Do toho bě koalicija swój namjet tak změniła, zo běštej CDU a CSU zwólniwej, jón podpěrować. Frakciski předsyda unije Friedrich Merz hišće raz potwjerdźi, zo njebě nikomu jednore, so za ćežke brónje kaž tank Gepard rozsudźić. Dźe pak wo to, Ukrainje zmóžnić, so lěpje přećiwo ruskemu nadpadej wobarać móc. Tež druhe europske kraje a USA běchu přilubili, Ukrainu sylnišo wojersce podpěrować. Generalny sekretar FDP Bijan Djir-Sarai mjenowaše rozsud zwjazkoweho sejma „sylne znamjo Ukrainje“. „Na kóncu smy wuspěšnje zhromadne rozrisanje namakali“, wón rjekny
Zwjazkowa wobora brónjowy system Gepard hižo dźesać lět wjace njewužiwa. Brónjenski zawod Krauss-Maffei je pak dźesatki tankow składował. Dyrbja pak hišće wotpowědnu municiju wobstarać.
Viadrina pomha ćěkancam
Europska uniwersita ukrainskim studowacym a slědźacym z domiznu
Frankfurt nad Wódru. (RD/SN). Wójna Ruskeje přećiwo Ukrainje je tež žiwjenje a dźěło na Viadrinje změniła – Europska uniwersita reaguje mjez druhim z powjetšenymi kapacitami za studentsku wuměnu, z witanskim programom za slědźacych, ze spěchowanskim a z nuzowym fondsom kaž tež z posrědkowanjom bydlenjow. Něhdźe 240 naprašowanjow ludźi z Ukrainy, kotřiž chcedźa na Viadrinje slědźić, tule studij zahajić abo z nim pokročować, je Europsku uniwersitu Viadrina w Frankfurće nad Wódru minjene měsacy docpěło, zamołwići zdźěleja.
Spodźiwny zaćišć
UNO warnuje před zapusćenjom
FUEN noweho partnera za pomoc Ukrainje zdobyła
Flensburg (SN/JaW). Wo dramatiskich powěsćach z Ukrainy rozprawja tele dny Federalistiska unija europskich narodnych skupin FUEN. Zjednoćenstwo europskich narodnych mjeńšin je próstwa wo pomoc čłonskeje skupiny Medžlic krimtatarskeho naroda w Ukrainje dosćahnyła. „Widźimy, kelko swójbow tule humanitarnu pomoc trjebaja, dokelž wšak njejsu jenož dźěło, ale tež swoje doma a přiwuznych wójny dla zhubili. Starosćimy so wo nich“, wozjewi FUEN na swojej internetnej stronje.
Apel pochadźa direktnje z koordinaciskeho centruma Medžlica w Kijewje. „Tam koncentrujemy so nětko předewšěm na zastarowanje a podpěru bjezdomnych ze žiwidłami, hygienowymi artiklemi a medikamentami“, rěka w lisće narodneje mjeńšiny FUEN. Zdobom namołwjeja čłonojo Medžlica „wšěch wobydlerjow Ukrainy a wšitkich na teritoriju kraja bydlace narodnosće ke kóždužkuli pomocy“. Kaž FUEN dale rozprawja staraja so tež w Lwiwje wo Ukrainjanow a Krimskich Tatarow, kotrež buchu z wuchodneje Ukrainy wuhnate.
