To a tamne (10.12.21)
Z papjercowym čołmom je 22lětny po Neckaru w Stuttgarće jěć chcył, a to najebać zymske wjedro jenož w kupanskich cholowach. Tak chcyše so na Youtube hordźić. Z papjercowych tyzow spasleny a z wotpadkowymi titami wobdaty spław je wón wčera do wody pušćił, w poslednim wokomiku pak nastroj radšo zaso wućahnył. Policisća běchu jeho doraznje powučili, „zo tajka jězba scyła žana dobra myslička njeje“.
Z wubědźowanja wo najrjeńšeho kamela w Sawdi-Arabskej su wjacorych wobdźělnikow wuzamknyli. Tući běchu zakazane srědki wužiwali, zo bychu zwěrjata „płaćiwym měritkam rjanosće“ wotpowědowali. Potrjechenych je 43 kamelow. Jim běchu wobsedźerjo botox šćěpili, zo by koža krućiša była. Wubědźowanje je lukratiwne: Dobyćerjej kiwa myto 58 milionow eurow.
Mjez zazběhom a protestom na cyrkwinskej bazy
Ewangelska krajna cyrkej Berlin-Braniborska-šleska Hornja Łužica minimalnu wulkosć wosadow postajiła a žněje rozdźělne reakcije
Njedawne wobzamknjenje krajneje synody Ewangelskeje cyrkwje Berlin-Braniborska-šleska Hornja Łužica (EKBO) wěriwych zaběra. Wona je 13. nowembra w Berlinje postajiła, zo ma kóždej wosadźe přichodnje na kóždy pad 300 ludźi přisłušeć. To je minimalna wulkosć. „Hłownje dźe wo to, zo wosady z mjenje hač 300 přisłušnikami swój status jako korporacija zjawneho prawa zhubja a maja so do wjetšich zhromadźenstwow zjednoćić. Tak ličimy z mjenje dźěłom zarjadniske naležnosće nastupajo a z mjenje kóštami“, EKBO zdźěli. Jedna ze schwalenych změnow je, zo móže konsistorij na namjet krajnocyrkwinskeje rady wuwzaća přizwolić. Wjace hač 600 z něhdźe 1 100 wosadow, a to předewšěm w Braniborskej, je potrjechenych. W cyrkwinskim wokrjesu šleska Hornja Łužica je jich 20 z 62 wosadow, we Wojerowskej kónčinje mjez druhim Čorny Chołmc, Lejno-Ptačecy (Geierswalde-Tätzschwitz) a Sprjejcy (Spreewitz).
Prěni króć ze Scholzom
Berlin (dpa/SN). Ministerscy prezidenća zwjazkowych krajow su dźensa na widejowej konferency wo aktualnych zwjazkowych a europskich temach wuradźowali. Hinak hač na wurjadnej konferency tydźenja nochcychu woni jenož wo koronakrizy rěčeć. Po internych wuradźowanjach chcychu sej prěni króć tež z Olafom Scholzom (SPD) jako zwjazkowym kanclerom mysle wuměnjeć. Wažne wobzamknjenja wšak žane njewočakowachu.
Ruska z protestnym spisom
Moskwa (dpa/SN). W zwisku ze zasadźenjom wojerskich lětadłow nad Čornym morjom je Ruska wulkopósłanstwu USA w Moskwje protestny spis přepodała. USA a jeje zwjazkarjo w NATO „prowokuja ciwilne lětadła“, štož powětrowy rum a žiwjenje ludźi wohroža, rěka w zdźělence wonkowneho ministerstwa. Ruska naliča w dokumenće cyły rjad podawkow, mjez druhim jedyn z minjeneho tydźenja, jako dyrbješe so pasažěrske lětadło wuskušowanskej mašinje USA wuwinyć.
Korona dźěći jara trjechiła
Bydlenski dom noweho zwjazkoweho kanclera Olafa Scholza (SPD) w ...
Dulig chce dale za wuchod dźěłać
Baerbock po puću
Biden a Putin Scholzej gratulowałoj
Washington/Moskwa (dpa/SN). Prezident USA Joe Biden je Olafej Scholzej (SPD) k powołanju za zwjazkoweho kanclera Němskeje gratulował. „Wjeselu so na to, sylne styki mjez swojimaj krajomaj natwarjeć a wusko hromadźe dźěłać, zo bychmy hladajo na globalne wužadanja dźensnišeho časa postupy docpěli“, Biden wčera zdźěli. Wospjet wón potwjerdźi, zo ma Němsku za jednoho z najwažnišich zwjazkarjow. Pod jeho předchadnikom Donaldom Trumpom běchu poćahi skerje napjate.
Ruski prezident Wladimir Putin je nowemu zwjazkowemu kanclerej Olafej Scholzej gratulował a dźěło Angele Merkel wuzběhnył. „Liču z tym, z wami do konstruktiwneho dialoga stupić a zhromadnje na aktualnych bilateralnych kaž mjezynarodnych temach dźěłać“, piše Putin w zbožopřejnym telegramje. Wón dźakowaše so Angeli Merkel za zhromadne dźěło minjenych 16 lět. „W stajnym kontakće smój spytałoj, samo w najćešich połoženjach wupuć nańć.“ Putin chce komunikaciju z njej dale pěstować.
Zamołwitosće přerjadowali
Změny přisłušnosće w ministerstwach noweho zwjazkoweho knježerstwa
Berlin (dpa/SN). Nowe zwjazkowe knježerstwo amploweje koalicije SPD, Zelenych a FDP je mjez ministerstwami zamołwitosće předewšěm za klimowu politiku a digitalne naležnosće zdźěla zasadnje znowa rjadowało. Tak budźe wonkowna ministerka Annalena Baerbock (Zeleni) přichodnje tež za mjezynarodnu klimowu politiku zamołwita. To je nowy zwjazkowy kancler Olaf Scholz (SPD) rozsudźił. Baerbock změje Němsku na mjezynarodnych klimowych konferencach zastupować.
Nowy hospodarski minister Robert Habeck (Zeleni) dóstanje z wobswětoweho ministerstwa přisłušnosć za nutřkokrajnu klimowu politiku. Wón je tuž tež přisłušny za zakoń wo škiće klimy, štož je jedyn z centralnych zakonjow klimoweje politiki noweho knježerstwa.
Nadźija poněčim zaso přiběra
Berlin (dpa/SN). Mjeztym druhu wot koronakrizy postajenu nazymu sej „generacija srjedźizny“ po najnowšim přepytowanju nadźiju poněčim zaso wróćo zdobywa. Mnozy pak su přeco hišće stresowani a starosća so stupacych płaćiznow dla. To je wuslědk naprašowanja Allensbachskeho Instituta za demoskopiju w nadawku zwjazka zawěsćernjow Němskeje, kotryž su wčera w Berlinje předstajili. 37 procentow woprašanych w starobje 30 do 59 lět zhladuje zaso optimistisce do přichoda. To drje je hišće daloko zdalene wot niwowa do koronapandemije, ale jasnje wjace hač lońšich 22 procentow ludźi.
Lěta 2020 čuješe so kóždy třeći stresowany, mjeztym je jich 39 procentow. Wo stres stara so začuće, zo njeje žiwjenje hižo planujomne, institut zwěsći. Najebać to so nalada mjez ludźimi zaso polěpša. Swoje financne połoženje posudźuje „generacija srjedźizny“ jako stabilnu abo přewažnje pozitiwnu. Rozdźěle wobsteja mjez chudšimi a bohatšimi ludźimi. Jedna z najwjetšich starosćow je strach, zo so swójske dźěći z koronawirusom natyknu a schorja.
To a tamne (09.12.21)
Dźesać kilogramow ćežki čwak złota su w USA za wjele pjenjez přesadźowali. Tak mjenowany „Alaska centennial gold nugget“ je na wčerawšej awkciji 750 000 dolarow (něhdźe 661 000 eurow) wunjesł, kaž dom Heritage Auctions w texaskim Dallasu zdźěli. Dulu złota běchu 1998 w Alasce našli. Priwatny zběrar ju pozdźišo kupi, a jeho potomnicy přewostajichu złoto nětko awkciskemu domej.
Z Angelu Merkel zaso pućować hić, na to so znaty krosnowar Reinhold Messner jara wjeseli. 77lětny z njej a jeje mužom Joachimom Sauerom mjeztym wjele lět w Južnym Tirolu po horach pućuje. „Nětko njebudźe wona wjace jako šefina knježerstwa po puću ale jako politiska rentnarka“, so Messner wjeseli. Wón je hordy na to, zo je sej Merkel na jeho radu južnotirolske hory wupytała, dokelž móže tam woměrje dowol činić.
