Dalša podpěra nuznje trěbna
Kijew/Berlin (dpa/SN). Šef CDU Friedrich Merz je zničenjow w Kijewje dla poraženy. Wčera je so wón na městnje wo połoženju wobhonił a so mjez druhim z tamnišim měšćanostu Vitalijom Klyčkom a jeho bratrom Wolodymyrom zetkał. Njewočakowane bě přijeće Merza přez ukrainskeho prezidenta Wolodymyra Zelenskeho.
Na wuchodźe a južnym wuchodźe su wojowanja mjeztym pokročowali. Ukraina přizjewi sylne nadpady ruskeho wójska na woclowu twornju Azowstal w Mariupolu. Tež w Donbasu spytaja ruske jednotki sej kónču zdobyć.
Šef CDU je wčera wuzběhnył, zo chce so dale za podpěru Němskeje za Ukrainu zasadźić. Wo rozmołwje ze Zelenyskim chce wón tež zwjazkoweho kanclera Olafa Scholza (SPD) informować. Ke kritice ukrainskeho pósłanca w Němskej Andrija Melnyka na Scholza měni Merz, zo měł so retorisce wróćo dźeržeć. Zwjazkowy wicekancler Robert Habeck (Zeleni) wčera w Mesebergu zwurazni, zo dyrbja konflikt z pósłancom rozrisać.
Wuhlad do přichoda
Wuwiće njejasne
Bamž chce dale Putina wopytać
Rom (dpa/SN). Bamž Franciskus je dale zwólniwy so z ruskim prezidentom Wladimirom Putinom zetkać. Hižo před dwaceći dnjemi je wón kardinalneho statneho sekretara Pietria Parolina prosył, Putinej to zdźělić. „Wotmołwu hišće nimamy, na wopyće pak dale wobstejimy“, bamž wuswětli. Dale wobžaruje wón brutalitu we wójnje, kotruž swjaty wótc ze surowosću genocida w Ruandźe přiruna.
Wopyt Ukrainy ma bamž tuchwilu za njemóžny. „Dyrbju najprjedy raz do Moskwy z Putinom rěčeć“, wón podšmórny. Ukrainski prezident Wolodymyr Zelenskyj kaž tež Witalij a Wolodymyr Klyčko su jeho do Ukrainy přeprosyli. Hižo na spočatku wójny je bamž ze Zelenskim telefonował, z Putinom pak nic. Město toho je wón ruskeho pósłanca Swjateho stoła wo wuswětlenje prosył. Moskowskeho patriarcha Kyrila nima bamž za praweho, zo by Putina wobwliwował. „Cyłkownje 40 mjeńšinow smój z Kyrilom rěčałoj. Prěnje dwaceći mjeńšiny je wón z cedlku w rukomaj wosprawnjenja za wójnu přečitał“, bamž Franciskus rozjasni. Planowane zetkanje wobeju w juniju je mjeztym wotprajene.
To a tamne (04.05.22)
Po informacijach wšelakich medijow je so jako měšnik tarnowany muž do hrodu Windsor zadobył a zhromadnje ze stražnikami znateje gardy „Coldstream guards“ swjećił. Mjeztym bu přepytowanje k padej zahajene, kotrež z wysokej prioritu wobjednawaja, zdźěli wčera rěčnik britiskeho wójska. Kaž medije pisaja, bě njeznaty muž do baraki přišoł, ze stražnikami jědł a pił a skónčnje tam samo přenocował. Rano je zawołana policija muža wotewzała.
Dźiwja liška je so do narodneje coologiskeje zahrody we Washingtonje zadobyła. W hajnišću za ptački je 25 ameriskich flamingow a kačku moriła. Dalše tři flaminga dyrbja tuchwilu w skótnej chorowni zastarać, wčera coologiska zahroda zdźěli a rozprawješe wo tragiskej škodźe. Zawčerawšim rano su sobudźěłaćerjo lišku w hajnišću wuhladali. Bohužel pak je skoćo twochnyło.
Wobchadny přewrót bjez železnicy njedocpějomny
Budyšin (SN/at). Z dwanaće žadanjemi socialne a wobswětej přichileny wobchadny přewrót nastupajo je so strona Lěwica Budyskeho a Zhorjelskeho wokrjesa na zjawnosć wobroćiła. Socialne a ekologiske wužadanja elektriski indiwidualny wobchad rozrisać njemóže, bě na nowinarskej rozmołwje wčera w Budyskim centrumje technologijow a załožerjow słyšeć. Mysle to, kotrež w zwisku ze změnu strukturow po kóncu zmilinjenja brunicy wosebity wuznam nabywaja. Předstajili su železniski modelowy region Hornja Łužica. Byrnjež so žadanja předewšěm na kolijowe zwiski w Sakskej poćahowali, je Lěwicarjam wědome, zo mamy wo tudyšej kolijowej infrastrukturje hromadźe z pólskimi a čěskimi susodami rozmyslować.
Kwota bjezdźěłnych niska
Kamjenica (dpa/SN). Ličba bjezdźěłnych w Sakskej je so pomjeńšiła. W aprylu bě w swobodnym staće 112 663 žonow a muži bjez dźěła, zdźěli dźensa regionalna direkcija za dźěło w Kamjenicy. To su něhdźe 3 000 ludźi mjenje hač w měrcu. Kwota bjezdźěłnych wučinješe 5,3 procenty, štož je najniša hódnota w aprylu wot zjednoćenja Němskeje. Najebać tuchwilnu krizu su sakske dźěłowe wiki jara wěste, fachowcy hódnoća.
Prěnja klawsura kabineta
Berlin (dpa/SN). Nimale pjeć měsacow po přisahanju zetka so zwjazkowy kabinet dźensa na dwudnjowsku klawsuru na hrodźe Meseberg sewjernje Berlina. Ćežišćo wuradźowanjow je ukrainska wójna a jeje sćěhi. K tomu wočakuja w Mesebergu šefinje knježerstwa ze Šwedskeje a Finskeje Magdalena Anersson a Sanna Marin. Runje tak wěnuje so kabinet wuskutkam tuchwilneje změny w hospodarstwje, hdźež wupraja so zdobom fachowcy z hospodarskeho wobłuka.
Na wuchod dźiwać
Incidenca niska
Alternatiwy jara prašane
Braniborska chce připrawy za ćopłotu ze zemje přichodnje spěchować
Podstupim (dpa/SN). Stupace energijowe płaćizny poćežuja móšnje ludźi. Kóšty pak starosća tež předewzaća, kotrež wjele energije přetrjebaja. Nětko mnozy potrjecheni za alternatiwami pytaja. Jedna z tych je ćopłota ze zemje, kotraž zda so być dźeń a zajimawša.
W Braniborskej sadźeja ludźo dale a bóle na zemsku ćopłotu, zdźěli tamniše hospodarske ministerstwo. Tuchwilu je 22 000 připrawow, kotrež swoju ćopłotu blisko zemskeho powjercha wudobywaja, zastupowaca rěčnica ministerstwa Claudia Lippert rozłoži. W lěće 2015 bě jich nimale 17 400 připrawow a dwě leće pozdźišo samo hižo 20 200 tajkich. Wužiwanje zemskeje ćopłoty je hladajo na klimowu změnu běžny proces, kotryž dawno hišće wotzamknjeny njeje.
Starosće wody dla
Drježdźany (dpa/SN). Sakska koalicija CDU, Zeleni a SPD chce zajutřišim w Sakskim krajnym sejmje próstwu wo přichodnym zastaranju z wodu zapodać. „Sćěhi klimoweje změny a přiběrace suche periody Saksku wužaduja, wšako ma zastaranje z wodu za ludnosć, ratarstwo a industriju zaručene być“, zdźěli wčera politikar Zelenych Volkmar Zschocke powěsćerni dpa w Drježdźanach. „Mamy hižo dźensa zamołwitosć, so wo naše dźěći a wnučki starać.“ To započnje so ze zachowanjom, z hladanjom a inwesticijemi do rěčnych zawěrow. Runje tak dyrbja bliske zastaranske móžnosće z mudrym managementom zaručene być, předewšěm brunicowe kónčiny.
