Borboriny kanal nětko skónčnje wužiwajomny
Łužiska jězorina so wobstajnje dale wuwiwa. Hakle wčera su w Lejnom (Geierswalde) skónčnje Borboriny kanal oficialnje poswjećili. Nětko móža łódźe mjez Złokomorowskim, Parcowskim a Lejnjanskim jězorom po puću być.
Lejno (AK/SN). Łužiska jězorina je dźeń a atraktiwniša. Wčera su zastupjerjo zaměroweho zwjazka Łužiska jězorina Sakskeje, Łužiskeje a srjedźoněmskeje towaršnosće hórnistwoweho zarjadnistwa (LMBV), komunow, wobydlerjow, towarstwow a zarjadow Borboriny kanal swjatočnje poswjećili.
Sprjewja dóstanje stare promjo
Stróža (SN/at). Dźěła při renaturěrowanju Sprjewje mjez Lemišowom a Nowej Wsu su posledni wotrězk docpěli. W druhej połojcy oktobra chcedźa najdlěše stare promjo rěki mjez Połpicu a Nowej Wsu zaso přiwjazać. „Tak budźe Sprjewja wo 900 metrow dlěša“, rjekny dr. Jan Peper, za projekt přisłušny w zarjadnistwje biosferoweho rezerwata Hornjołužiska hola a haty. Dźěłaćerjo nadawki wukonjaceho Nadeborec předewzaća z Krušwicy tuchwilu bywše promjo wubagruja, zo móže sej Sprjewja tam swoje nowe „stare“ rěčnišćo wutworić. Porno prěnjotnemu promjenju, po kotrymž rěka podłu zwyšeneju pobrjohow blisko Lemišowa wot lońšeje nazymy zaso ćeče, leži tamny renaturěrowany wotrězk skerje w płonej krajinje, dr. Peper rozprawja.
W běhu lěta steješe Sprjewja w Połpicy w srjedźišću dźěła. Tam su po lěwym pobrjoze nasyp natwarili. Tón wupřestrěwa so nimo šulskeho wjesneho domu po cyłej wsy a ma ju před wulkej wodu škitać. Škitany, ale nětko wot rěki wotrěznjeny je stary wódny młyn.
Ryzy twarske naprawy lětsa dokónča. Nowe štomy budu hakle klětu sadźeć.
W milinarni dyrbja znowa wulki zarěz znjesć
Janšojce (SN/BŠe). Wulki zarěz ma tuchwilu energijowe předewzaće Łužiska energija a milinarnje (LEAG) znjesć. Wčera popołdnju w pjećich su druhi z cyłkownje šěsć blokow, blok E, z milinoweje syće wotpinyli. Wot lońšeho hižo słuži blok F jako wěstotna rezerwa. Wot změny potrjecheni su předewšěm sobudźěłaćerjo. Něhdźe 600 dźěłowych městnow milinarnje njebudźe hižo znowa wobsadźenych. „Zdźěla podadźa so ludźo na wuměnk, a někotři budu na druhim stejnišću dźěłać. Tež wukubłansku strategiju smy dołhodobnje wobstejnosćam přiměrili. Tak hižo telko wučomnikow njewukubłujemy a po wuspěšnym zakónčenju njepřewozmjemy“, rozłožuje zamołwita za zjawnostne dźěło LEAG Kathi Gerstner na naprašowanje.
Chcedźa plan nětko zwoprawdźić
Zaměrowy zwjazk Łužiska jězorina Sakskeje chce Kóšynski nasyp mjez Złokomorowskim a Lejnjanskim jězorom za přichod turistisce zaměrnje wutwarić. Masterski plan za naprawu nětko bórze do nadawka dadźa.
Hory (AK/SN). Turistiske wužiwanje Kóšynskeho nasypa ma za zaměrowy zwjazk Łužiska jězorina Sakskej wulki wuznam. „Wšitko ma so krok po kroku zwoprawdźić“, wuswětli jednaćel zaměroweho zwjazka Daniel Just na posedźenju minjeny štwórtk na Horach. Zaměr je, z derje wothłosowanymi naprawami inwestorow nańć. Gmejna Halštrowska Hola je wažny partner zwjazka a zamołwita komuna na městnje. Prěnje wothłosowanja z gmejnu su wot 7. oktobra předwidźane. Wotpowědnje budu tež ze zwjazkowymi radźićelemi dale wuradźować. „Prošu gmejnu Halštrowska Hola, na zwoprawdźenju masterskeho plana sobu skutkować“, podšmórny sakski předsyda zaměroweho zwjazka Łužiska jězorina Michael Harig (CDU).
Zakład za přichod kładli
Rózborske lětanišćo jako efektiwne stejnišćo wužiwać
Zhorjelc/Rózbork (AK/SN). Lětanišći w Zhorjelcu a Rózborku měłoj dołhodobnje efektiwnje wužiwanej być. Tole podšmórny jednaćel zaměroweho zwjazka lětanišćoweho zarjadnistwa Rózbork/Zhorjelc Thomas Rublack. Nadawk zarjadnistwa je ležownosće wobhospodarjeć, regionalnje zwičnjeć a infrastrukturu dale wuwiwać. „Tuchwilu je w Rózborku čara za přizemjenje něhdźe 2 000 metrow dołha a 30 metrow šěroka. Bjez wulkich ćežow móhli ju na 2 500 metrow dołhosće a 45 metrow šěrokosće rozšěrić. Potom móhli tu lětadła Boeing a Airbus přizemjeć“, jednaćel nowinarjam njedawno rozłoži. W Zhorjelcu maja něhdźe 700 metrow dołhu čaru k dispoziciji, hdźež pak njejsu po słowach Thomasa Rublacka žane wulke změny móžne. Lětanišćo słuži předewšěm sportowemu wobłukej.
Cyłkownje maja při Rózborskim lětanišću 34 hektarow přemysłoweje přestrjenje, hdźež móža so předewzaća zaměstnić. Tuchwilu stej tam tankownja a solarna připrawa instalowanej.
Na łužiskich polach tuchwilu běrny žněja, tak tež tu w Baršću. ...
Žiwa dwurěčnosć
Nowe firmy wšěm tyja
Běła Woda (SN/BŠe). Nazhonjenja sej wuměnjeć a zwiski mjez předewzaćemi wutworić ma Łužiska hospodarska iniciatiwa (WiL) za njeparujomne. Tohodla je sej minjeny štwórtk zajimcow na druhe zarjadowanje „Start up meeting“ do Běłeje Wody přeprosyła, na kotrež je tež za Łužicu zamołwity braniborskeho knježerstwa dr. Klaus Freytag přijěł. „Ze zarjadowanjom chcemy regionalne zawody a runje hakle załožene dynamiske zawody hromadźe wjesć. Wutworjene zwiski a wotewrjene rozmołwy maja mjezsobne zrozumjenje a tworjenje spěchować. Do rozkćěwaceje kónčiny słušeja nowe firmy“, wuzběhny jednaćelka Běłowodźanskich měšćanskich zawodow a čłonka předsydstwa WiL Katrin Bartsch.
Žně tónraz w hali zahajene
Naruna akwakultura klasiske plahowanje rybow w hatach?
Korzym (UM/SN). Kulisa zahajenja Łužiskich rybowych tydźenjow bě minjene lěta stajnje podobna. Najwjetši rozdźěl bě zwjetša wjedro. Kóžde lěto pak ćahachu rybarjo a jich pomocnicy saki połne rybow z wody.
Časy pak so měnjeja. Štóž dźensa wo rybarstwje w Hornjej Łužicy rěči, ma tež we wulkich halach plahowane akwakultury wobkedźbować. Něhdźe 200 tonow rybow a dalšich wódnych zwěrjatkow žněje jeničce zawod Korzymske akwakultury, štož wotpowěduje wosminje regiona. Štož bě spočatnje hišće profesionelny hobby Karla Dominicka, je so mjeztym na šwarne hospodarske předewzaće wuwiło.
Wjele faktow njerozrisanych
Pólska chce w Turówskej jamje hač do lěta 2044 brunicu wudobywać
Budyšin (SN/BŠe). Pólski energijowy koncern PGE ma wotpohlad, brunicowu jamu Turów rozšěrić a dowolnosć, wuhlo wudobywać, wo 25 lět podlěšić. Poprawom smědźa jenož hišće hač do klětušeho apryla za brunicu kopać.
Dokelž leži jama w třikrajowym róžku mjez Pólskej, Němskej a Čěskej su wuskutki mjezy přesahowace. Minjeny štwórtk zetkachu so wobydlerjo w pólskej Bogatyniji, hdźež je koncern na prašenja wobydlerjow, zarjadow a wobswětowych zwjazkow wotmołwjał. Kaž so wujewi, je wjele faktow njerozrisanych. Generelnje dźe wo wustork wuhlikoweho dioksida a wo poćeženje procha dla. „Hladajo na jednotliwe potrjechene kónčiny pak su ćeže chětro wšelakore“, měni Horst Schiermayer ze Žitawskeho měšćanskeho a regionalneho zwjazka Zelenych.
