Město Wojerecy chce strukturnu změnu­ zaměrnje zwoprawdźić, zo by so dosć pozitiwnje wuskutkowała. Do procesa zawjazuja mjez druhim tež domoródne předewzaća a komuny.

Wojerecy (AK/SN). Město Wojerecy chce w procesu strukturneje změny z domoródnymi předewzaćemi a wokolnymi komu­nami wusko hromadźe dźěłać, kaž wyši měšćanosta Stefan Skora (CDU) wuzběhnje. „Chcemy nadregionalnje skutkować, za čož pak trjebamy part­nerow z předewzaćow a komunow w regionje“, rozkładźe Stefan Skora na njedawnym posedźenju Wojerowskeje měšćanskeje rady.

Hižo loni w juniju bě dźěłowa skupina komunalnych zawodow strategisku papjeru k strukturnej změnje zhotowiła. Ćežišća dokumenta su klimje přichilena energija, bydlenja a turizm. W awgusće so frakcije schadźowachu, zo bychu ko­ordinaciju rozjimali. W oktobrje slě­do­wa­še namołwa, projekty za zakoń wo sylnjenju strukturow pomjenować. „W decembrje wotměchmy dźěłarničku z předewzaćemi“, Stefan Skora rozłoži.

Hižo šesty raz pyta Spitzkunnersdorfska agentura za projektowe wuwiće najwoblubowaniši hosćenc w Hornjej Łužicy. Zajimcy maja so za wurisanje přizjewić. Hakle potom směš swój hłós jednotliwym lokalam dać. Na wubědźowanju wo najwoblubowaniši hosćenc minjeneho lěta, kotrež je so nětko 2. januara zakónčiło, bě so jenož 18 wobdźěliło. Wobhladaš-li sej region, pak je jich zawěrno wo wjele wjace. Jeničce w Budyšinje su njeličomne, ale jenož dwě – wobě kofejowni – stej so za wubědźowanje registrować dałoj. Dwanaće hosćencow lisćiny, kotrež su najwjac hłosow ludźi nažnjeli, smě nětko cyłe lěto titul „najwoblubowaniši hosćenc Hornjeje Łužicy“ wužiwać a ze wšelakich wabjenskich akcijow čerpać. Na přikład warja w aprylu na wikach Konventa. Přiwšěm prašam so za reprezentatiwnosću wubědźowanja. Rozdźělne koncepty hosćencow dźě njedadźa so tak jednorje přirunać, abo? Bianka Šeferowa

Rjane nazymske wjedro loni je so po wšěm­ zdaću pozitiwnje na turistiski wobłuk wuskutkowało. Tak je wjac ludźi­ region wopytał, hač lěto do toho. Přiwšěm je hišće dosć přenocowanskich kapacitow.

Budyšin (SN/BŠe). Dale a wjac ludźi rozsudźa so za přebytk we Łužicy, zdźěli Marketingowa towaršnosć Hornja Łužica-Delnja Šleska (MGO). Wosebje zwjesela, zo je sej loni nazymu wjele dowolnikow kónčinu zbližiło. Hladajo na ličby přenocowanjow wozjewjeja turistikarjo jara dobre wuslědki. Cyłkownje bě to mjenujcy 15 procentow wjace přebytkow hač lěto do toho. Kóždy dźesaty hósć, kiž je­ nazymu Saksku wopytał, přeby­waše w Budyskim wokrjesu. Přerěznje wostachu ludźo 2,7 dnjow w kónčinje, štož stej 0,2 dypkaj wjace hač sakski přerězk. Při­wšěm je w hotelach, pensijach atd. hišće dosć kapacitow, hdźež móhli ludźo za čas dowola přebywać, su sej turistikarjo pře­zjedni.

Zwólniwosć hornjołužiskich zawodow, ludźi přistajić a jim dźěło dać, je nadal wulka.

Budyšin (CK/SN). Kónc decembra 2019 bě w Hornjej Łužicy 16 724 ludźi bjez dźěła přizjewjenych. To je 630 wjac hač w nowembrje. Přičinje za stupacu ličbu bjezdźěłnych drje stej wjedro a počas, po słowach operatiwneje jednaćelki Budyskeje agentury za dźěło Ilony Winge-Paul pak je to skerje snadne stopnjowanje. Porno decembrej 2018 běchu 1 703 wosoby mjenje wot bjezdźěłnosće po­trjechene. W lěće 2014 bě 28 934 ludźi bjez dźěła. Najwyšu hódnotu za december wupokazuje statistika z 72 268 potrjechenymi we wuchodnej Sakskej kónc lěta 2002.

Tuchwilu stara so dźěłowa agentura wo 5 323 bjezdźěłnych, jobowe centery wokrjesow Budyšin a Zhorjelc wo 11 401 bjezdźěłneho. Kwota bjezdźěłnosće wu­činja we wobłuku Budyskeje agentury za dźěło cyłkownje šěsć procentow, při čimž su regionalne rozdźěle chětro wulke. W Kamjenskim wobłuku wučinja bjezdźěłnostna kwota 3,1 procent a w Zhorjelskim 10,1 procent. „Robustne dźěłowe wiki a miłe wjedro pokazuja swoju skutkownosć“, rjekny Winge-Paul na njedawnym předstajenju ličbow bjezdźěłnosće w Budyšinje.