Krajinu znowa wuhotuja
Takrjec před kubłom Gižkojce, kulturnym forumom łužiskeje brunicy, chce Vattenfall na terenje brunicoweje jamy Wjelcej-juh krajinu „Šćeńčanske alpy“ rekultiwować. Kaž energijowy koncern njedawno informowaše, ma napodobnjeny originalny staw hač do lěta 2023 docpěty być. Při tym zepěraja so fachowcy rekultiwowanja na wuměrjenske kartografowanja z předposlednjeho lětstotka. Podata je lětoličba 1846.
Na něhdźe 40 metrow bě so bager hač do lěta 2010 kubłu bližił – tři metry za płotom ležownosće dźělachu wćipneho wopytowarja wot wuhloweje jamy. Po wuhlu slědowaše bjez wulkeje přestawki rekultiwowanje. Naspomjenjahódne je, zo su z Gižkojsko-Šćeńčanskeje kónčneje moreny z woršty nad wuhlom nimale štwórć miliona błudźenkow wuryli. Swědki lodoweje doby budu wulku rólu hrać, hdyž wobraz krajiny znowa wuhotuja. To je wšitkim wobdźělenym hoberski narok. „Gižkojska hórka“ změje wysokosć 150 metrow nad morjom. „Šćeńčanska hórka“ budźe ze 165 metrami najwyša, wuhladnišćo na njej ma pola 168,8 metrow nad morjom ležeć.
Žadyn kupc?
Budyšin (SN/BŠe). Vattenfall njemóže po wšěm zdaću wuchodoněmsku brunicowu spartu předać. Dźensa je so zawjazowace poskićowanske jednanje skónčiło. W běhu dnja pak stej čěski energijowy koncern ČEZ, kotryž słušeše k najwuhladnišim kandidatam, kaž tež Essenski koncern Steag zdźěliłoj, zo Vattenfallej žadyn poskitk njewotedatej. Po dokładnym pruwowanju wšěch šansow a rizikow běštej so přećiwo tomu rozsudźiłoj, wuhlowu spartu přewzać. Mjeztym zo bě čěske předewzaće zwólniwe, wo druhich wobstejnosćach a wariantach kupje jednać, wupraji so Steag za załožbowy model. Po modelu měli připrawy Vattenfala do załožby přeńć, kaž je Steag jako industrijny partner a posłužbar poskićił.
Jako hłownu přičinu, zo nochcetej łužisku brunicowu spartu kupić, widźitej předewzaći njepřihódne wuwiće płaćizny za milinu w minjenym času. Dokelž brunicowe milinarnje hižo dosć rentabelnje njedźěłaja, je tež předstajomne, zo so Němska dołhodobnje wudobywanja brunicy wzda. K najnowšemu dźensnišemu wuwiću njeje Vattenfall hač do redakciskeho kónca žane stejišćo zabrał.
Slepjanska šulerka wubědźowanje dobyła
Wojerecy (JoS/SN). Šwórty raz přewjedźechu wuchodosakske wyše šule w předmjeće hospodarstwo-technika-domjacnosć šulerske wubědźowanje towaršnosće za wukubłanje a dalekubłanje (GAF). Prěni raz zetkachu so zajimcy zašły tydźeń w rumnosćach přirodotechniskeho centruma (Natz) we Wojerowskim nowym wobydlerskim domje. Lětuše wubědźowanje bě nimale domjaca hra wyšich šulow Zhorjelskeho wokrjesa. Chorosće a druhich wobstejnosćow dla wobdźěli so jenož pjeć šulerjow, mjez nimi štyrjo z wokrjesa Zhorjelc. A wšitcy běchu w teoretiskej kaž tež praktiskej wědźe w mjenowanym předmjeće jara wobhonjeni.
Spěchowanske towarstwo nětko rozpušća
Halštrowska Hola (UH/SN). Po 14 lětach aktiwneho čestnohamtskeho dźěła su čłonojo spěchowanskeho towarstwa Wódny swět Lejnjanski jězor loni wobzamknyli, towarstwo hač do kónca lěta 2015 rozpušćić. Přičina za to bě tehdyše přeswojenske wobzamknjenje, po kotrymž su wustawkowe zaměry docpěli. Towarstwo je mjeztym w likwidaciji.
Na zhromadźiznje zašły pjatk su sobustawow přeprosyli, wo wotwiwanju towarstwa wuradźować. Při tym bywši předsyda a tuchwilny likwidator Karl-Heinz Radochla zwurazni, zo njeměł jich tónle fakt přejara zrudźić. Ćim hordźiši měli być na to docpěte.
Delnja Łužica z přirodu wabiła
Berlin (ML/SN). 180 000 fachowych hosći a priwatnych zajimcow je wot minjeneje srjedy hač do wčerawšeho 50. mjezynarodnu turistisku bursu (ITB) w Berlinje wopytało. Na 10 069 stejnišćach ze 187 krajow móžachu so wo wulětnych cilach informować a sej tež jězby a dowolowe městna kupić. Wo Serbach móžachu so hosćo na stejnišćach Marketingoweje towaršnosće Hornja Łužica-Delnja Šleska a turistiskich zwjazkow Błótow a Delnjeje Łužicy wobhonić.
„Hdźež so lěs na wodźe błyšći“ rěka titul dowoloweje brošury wo błótowskim raju, kotraž bě w braniborskej hali na stejnišću Błótow jara prašana. Tam zhonichu zajimcy tež wo jónkrótnym błótowskim biosferowym rezerwaće UNESCO a wo tamnišich rědkich rostlinach a zwěrjatach, kaž wo wudrje a brjohačku (Eisvogel). Předstajili su 260 kilometrow dołhu kórkowu kolesowarsku šćežku a skedźbnili na 15 campingownišćow w Błótach. Pokazachu tež na žiwe serbske tradicije, kulturu a wězo na pisanu narodnu drastu. Samo delnjoserbske prajidmo „Gerc zagrajo, tawzynt bol zažyjo“ so jewješe.
Serbja maja prawo na domiznu
Z napominanjom „Serbja maja prawo na swoju domiznu“ je so čěska towaršnosć ze zjawnym listom wobroćiła na předsydow třoch čěskich energijowych předewzaćow, kotrež prócuja so wo naslědnistwo koncerna Vattenfall.
Prěnje zelene kórki su tele dny w rostlinarnjach při Hamorskej ...
Łužica mjez wulětnišćemi swěta
Něhdźe 10 000 wustajerjow ze 187 krajow swěta wobdźěla so na wčera wotewrjenej 50. mjezynarodnej turistiskej bursy (ITB) w Berlinje. Hač do jutřišeho je 26 halow pod rozhłosowej wěžu jeno za fachowy publikum přistupne.
Berlin (ML/SN) Sobotu a njedźelu pak wočakuje jubilejna ITB wšitkich na pućowanju a wočerstwjenju zajimowanych. Partnerski kraj je kupowy stat Malediwy w Indiskim oceanje. „Přirodu čuć“ je hesło přehladki Sakskeje w hali 11.2., hdźež 30 stejnišćow za wopyt najrjeńšich kónčin swobodneho stata kaž tež Drježdźan, Lipska, Kamjenicy a Budyšina wabja. Tysaclětne sprjewine město a tudyši hotel Best Western (něhdy Lubin) informujetej hosći wo historiskich twarjenjach, ale tež z dwanaćestronskim wabjenskim łopjenom wo móžnosćach wočerstwjenja nad spjatym jězorom.
Wězo skedźbnja Budyska prezentacija tež na Serbow, wosebje na jutrowne nałožki z brošurku, w kotrejž je łopješko z aktualnymi terminami, kaž stej to jěchanje křižerjow a debjenje jutrownych jejkow w Serbskim muzeju a druhdźe.
Lědma problemy skandala dla
Z awtom typa Amarok je so wróćowołanska akcija dieselowych jězdźidłow VWja njedawno zahajiła. Wotpłunoweho skandala dla dóstanu potrjecheni wobsedźerjo nětko póštu, zo bychu sej update do awta zatwarić dali.
Budyšin (SN/mwe). „Pola nas njeje so ani jenički z wulkeho kruha kupcow hóršił, zo ma wotpłunoweho skandala dla problem ze swojim jězdźidłom“, praji Robert Handrik, sobujednaćel Handrikec awtoweho domu w Hodźiju. Runja mnohim dalšim swobodnym awtowym dźěłarnjam njesmědźa Handrikecy motory potrjechenych dieselowych VWjow, Audijow, Seatow a Škodowkow wobdźěłać. Woni su pak šoferam wulka pomoc. Wšako wróćowołansku akciju podpěruja a jako serwis awta swojich kupcow za přehladanje do wotpowědnych awtowych domow dowjezu, kotrež maja z VWjom wikowanske zrěčenje. Za to dóstanu ludźo w Hodźiju bjezpłatnje wotnajenske awto a móža sej swoje jězdźidło po dorěčenju zaso wotewzać. „Myslu sej, zo je skandal wokoło wotpłuna dieselowych awtow VWja wot wěstych kruhow tak splećeny, zo bychu zhotowjerjej škodźeli“, Robert Handrik podšmórnje.
Swojich serbskich kupcoww maćeršćinje posłužuja
Hlinowc (aha/SN). Runje dźensa před 25 lětami je Krěpječan Alfons Lehmann w Hlinowcu swobodnu dźěłarnju za wšě typy awtow wotewrěł. Po powołanju kowar bě so wón 1978 jako mišter za ratarske mašiny kwalifikował. Swój rozsud, po politiskim přewróće sej rjemjeslniski zawod z porjedźenjom awtow a z wikowanjom awtowych dźělow kaž tež z integrowanej zamkarnju za metalowe wudźěłki – kaž su to twar konjacych boksow, železnych płotow, schodow a wrotow –, njeje ženje wobžarował. Wot wšeho spočatka zesamostatnjenja dźěłachu w firmje nimo Alfonsa Lehmanna jeho z Hórkow pochadźaca mandźelska Monika kaž tež synaj Daniel a René. Wobaj staj w Pančicach-Kukowje do šule chodźiłoj, powołanje awtoweho zamkarja nawuknyłoj a mišterske pruwowanje złožiłoj.
