Zły Komorow (SN). Turistiska informacija w delnjołužiskim Złym Komorowje zhladuje na wuspěšnu minjenu sezonu. Nimale 2 700 zajimcow wužiwaše lětsa najwšelakoriše poskitki informacije, kotraž zarjaduje nimo klasiskich měšćanskich wuchodźowanjow tež specielne kulinariske abo kolesowarske pućowanja. Tuchwilu tam z dźewjeć wukubłanymi wodźerjemi hromadźe dźěłaja. „Stupacych naprašowanjow dla móžemy zesylnjenje nuznje trjebać“, praji nawodnica Złokomorowskeje turistiskeje informa­cije Diana Lesche.

Na nowych kulinariskich wodźenjach po měsće so wopytowarjo wosebje rady wobdźěleja. Lětsa su tajke hižo 26 razow přewjedli, dwě hišće planuja. „Tež za adwentnički abo hodownički móža zajimcy wosebite zarjadowanje knihować, hdźež móža regionalne wudźěłki woptawać“, nawodnica měni.

Budyšin/Zhorjelc (SN/at). Koncern Siemens chce dźěłopřijimarjam při planowanym wotstronjenju dźěłowych městnow kompromis poskićić, kaž powěsćernja dpa rozprawja. Z přepołoženjom wěstych dźěłow sparty milinotwar hodźeli so wosebje we wuchodnej Němskej zawody zachować. Wot dotalnych šmórnjenskich planow Siemensa su tež turbinotwarcy w Zhorjelcu potrjecheni. Prěni społnomócnjeny dźěłarnistwa IG metal wuchodneje Sakskeje Jan Otto je skeptiski: „Dotalne plany njeje Siemens dementował, runje tak njepředleža žane jasne wuprajenja nastupajo stejnišća. Ze wšej wótrosću budźemy wo zachowanje Zhorjelskeho zawoda wojować.“ Otto njewuzamkuje, zo koncern spyta jednotliwe twornje mjez sobu wuhrawać.

Karow (SN/at). Tři kraje, tři wašnja wobchadźenja z wjelkami. Tomu njesmě dlěje tak być, toho su sej wowčerjo w Němskej přezjedni. Hladajo na aktualne zwadne pady žadaja sej woni jednotne zwjazkowe rjadowanje, kak z „nadpadowacymi wjelkami“ wobchadźeć. Podawki w Sakskej, Durinskej a Mecklenburgsko-Předpomorskej pokazuja, zo zwjazkowe kraje wšelako postupuja a praktikabelne zwoprawdźenje přeco zaso zwrěšća, podšmórny předsyda zjednoćenstwa Němskich krajnych zwjazkow plahowanja wowcow (VDL) Jürgen Lückhoff wčera w mecklenburgskim Karowje. Kaž wón našemu wječornikej wobkrući, bě wowčer w Předpomorskej při wjacorych atakach wulki dźěl swojich wowcow zhubił a sej nětko žada na rubježne zwěrjo třěleć směć. Rozsud pak je ratarske ministerstwo přesunyło. W druhim padźe bě tam wjelk w solarnym parku škodu načinił.

Nadźijeja so spěchowanja ze stron sakskeho nutřkowneho ministerstwa

Hamor (AK/SN). Srědkow ze spěchowanskeje směrnicy „regionalne wuwiće“ za lěto 2018 nadźija so regionalny planowanski zwjazk Hornja Łužica-Delnja Šleska. Za to zapoda sakskemu nutřkownemu ministerstwu pjeć projektow z wulkej prioritu, kaž su to zwjazkowi radźićeljo nětko w Hamorje wobzamknyli.

„Cyłkowne kóšty za projekty wučinjeja něhdźe 300 000 eurow. Spěchowane chcemy 223 000 eurow měć“, rozłoži Thomas Brade z fachoweho wobłuka planowanje brunicy/saněrowanske ramikowe planowanje. Prěnje zapodate přede­wzaće je regionalny koncept wuwića a jednanja „management zwoprawdźenja“ za łužisku jězorinu, kotrež chce zaměrowy­ zwjazk Łužiska jězorina Sakskeje zeskutkownić. Druhi, za Zhorjelski wo­krjes trěbny projekt ma zdźěłać nowu koncepciju wuchowanskich stražow w Zhorjelskim wokrjesu.