Budyšin (SN). Wótriše kontrole cła njeserioznych praktikow na twarnišćach w Budyskim wokrjesu dla žada sej industrijne dźěłarnistwo twarstwo-agrar-wobswět (IG BAU). Ilegalne přistajenje dyrbi so dźěłodawarjam a praktikowarjam mzdoweho dumpinga stać njekalkulujomne riziko. Po informacijach wobwodneho předsydy IG BAU Petera Schuberta je financna kontrola čorne dźěło Drježdźanskeho hłowneho cłowneho zarjada loni 434 razow twarnišća w regionje kontrolowała, štož je 40 procentow mjenje hač lěto do toho. Nastorčili su cłownicy 74 jednanjow pjenježneje pokuty dla. Schubert powołuje so nastupajo ličby na bilancu zwjazkoweho ministerstwa financow, kotraž IG BAU předleži.
Wuhódnoćenje cła na zakładźe małeho naprašowanja zapósłanče zwjazkoweho sejma Beaty Müller-Gemmeke (Zeleni) pokazuje powšitkownu dilemu Drježdźanskeho cłowneho zarjada: Loni su tam 28 procentow mjenje dźěłodawarjow na čorne dźěło a ilegalne přistajenje kontrolowali hač lěta 2014. Cło trjeba přidatny personal, měni dźěłarnistwo w dźensa wozjewjenym stejišću.
Pruwowanska komisija Budyskeho blidarskeho zjednoćenstwa je sobotu wučomnikow lěta 2016 za rjemjeslnikow powołała. Před třomi lětami bě 19 młodostnych wukubłanje zahajiło, pjatnaćo su wukubłanje zakónčili.
Kamjenc. (HS/SN). Powołanje blidarja je přeco hišće domena muži. Tole pokaza so na sobotnym wuwjazanju wučomnikow w rumnosćach Kamjenskeho zawoda ewag. W narěči zwurazni předsyda blidarskeho zjednosćenstwa wokrjesneho rjemjeslnistwa Ulrich Lange swoje wjeselo nad nowymi kolegami a hladaše do přichoda. „Na pruwowanske dźěło hodźi so natwarjeć. Přiwšěm njeje kónc wukubłanskeho časa kónc wuknjenja. Powołanje blidarja ma přichod, jeli so kreatiwita a wědomostno-techniske wuwiće zwjazatej. Móžno je, wukubłać so na mištra abo statnje pruwowaneho technikarja.“
Łužiska a srjedźoněmska towaršnosć hórnistwoweho zarjadnistwa (LMBV) chce nazymu započeć, kwalitu wody w jězorach mjez Złym Komorowom a Bjezdowami polěpšeć. Za to je wosebitu łódź twarić dała.
Zły Komorow/ Halštrowska Hola (SN/at). Štóž je z kolesom mjez Lejnjanskim, Parcowskim a Sedličanskim jězorom po puću, tón widźi južnje Borborineho kanala na juhozapadnym pobrjohu Parcowskeho jězora twarnišćo. Tam nastawa přistawnišćo. Te je wobstatk wažneho předewzaća hórnistwowych saněrarjow. Přistawić ma tam wosebita łódź, kotruž chcedźa z trěbnymi maćiznami pjelnić. Dwudźělny zwjazk wobsteji z ćišćateje łódźe a ćišćaneho přewoza, kotryž je LMBV łódźnicy Hermann Barthel tzwr w saksko-anhaltskim Derbenje loni do nadawka dała. Budźe to płuwaca připrawa k polěpšenju wody, kotruž wočakuja srjedź awgusta w jězorinje. Na prěnju jězbu ma so wona spočatk septembra podać, zdźěli rěčnik LMBV dr. Uwe Steinhuber.
Drježdźany (dpa/SN). Hospodarska klima wuchodneje Němskeje je so w juliju pohubjeńšiła, kaž Drježdźanski ifo-institut dźensa zdźěli. Wuchodoněmscy předewzaćeljo su z aktualnym wobchodniskim połoženjom mjenje spokojom hač w juniju. Zdobom njehladaja hižo tak optimistisce na wikowanske wuwiće w přichodnych šěsć měsacach.
Nalada jednotliwych branšow pak je jara wšelakora. W předźěłacym přemysle stupa indeks hospodarskeje klimy mjeztym třeći króć. Hladajo na wućeženje kapacitow maja industrijne firmy tuchwilne połoženje za lěpše hač w měsacu do toho. Wone tež bóle optimistisce do přichoda hladaja. We wulkowikowanju wuchodneje Němskeje je indeks raznje spadnył. Wočakowanja njejsu hižo tak dobre. Tež nalada w drobnowikowanju je bóle pesimistiska. We hłownym twarskim přemysle je so wusahowaca dobra nalada minjeneho měsaca tohorunja pohubjeńšiła. Přiwšěm wostanje indeks hospodarskeje klimy dale na nadpřerěznym wysokim niwowje.
Drježdźany/Budyšin (SN/BŠe). Sakske předewzaća su direktnje, ale tež indirektnje wot lońšeho zawjedźenja minimalneje mzdy potrjechene. Tak je něhdźe 44 procentow zawodow hodźinsku mzdu přistajeneho na znajmjeńša 8,50 eurow pozběhnyło. W tamnych wuchodnych zwjazkowych krajach leži přerězk pola 36 procentow. To wuchadźa ze studije, kotruž bě institut za dźěłowe wiki a powołanske slědźenje w nadawku statneho ministerstwa za hospodarstwo, dźěło a wobchad nastajił.
Wčera su w Drježdźanach wuslědki studije předstajili. „W Sakskej kaž po wšej wuchodnej Němskej dóstawa wjac ludźi wjace mzdy za swoje dźěło. Přiwšěm to hišće njespokoja. Minimalna mzda njeje dobrota, ale wostawa dale hranica moralki, čerwjena linija. Ličimy w hospodarstwje z hišće wjac tarifowymi wotzamknjenjemi, zo so za dobre dźěło tež dobra mzda płaći“, podšmórny statny sekretar za dźěło Stefan Brangs (SPD).
Budyšin (SN). We wuchodnej Sakskej bě kónc julija 23 195 bjezdźěłnych, 50 mjenje hač před měsacom a 3 545 mjenje hač před lětom. Kwota bjezdźěłnosće wučinja dale 8,1 procent, w juliju 2015 běštej to 9,2 procentaj. W jobcenteromaj Budyskeho a Zhorjelskeho wokrjesa je ličba bjezdźěłnych snadnje woteběrała. Thomas Berndt, šef Budyskeje agentury za dźěło, zwěsći porno tomu za wobłuk bjezdźěłnostneje zawěsćernje přirost. „Za to stej hłownje dwě přičinje: Mnohe předewzaća přesuwaja planowane nowopřistajenja na čas po dowolu a prózdninach. Šulske a zawodne wukubłanje kónči so w podlěću. Młodźi ludźo, kotrychž njeje jich wukubłanski zawod přewzał abo kotřiž nimaja bjez přetorhnjenja nowe dźěłowe městno, su přechodnje bjezdźěłni“, wuswětli Thomas Berndt. Najebać to bu 980 jobow na prěnich dźěłowych wikach posrědkowanych.
Komunalnej jobcenteraj dohladujetej w Budyskim wokrjesu 7 720 bjezdźěłnych a w Zhorjelskim 9 485. To je 221 ludźi mjenje hač w juniju.
Měsacy po akcijach ciwilneje njeposłušnosće zwjazkarstwa Ende Gelände we łužiskim brunicowym rewěrje je so wčera Zhorjelske sudnistwo z wosebitym padom přeńdźenja zaběrało.
Zhorjelc (SN/BŠe). 27lětny přećiwnik brunicy, kiž bu wčera wot Zhorjelskeho sudnistwa k pokuće 1 560 eurow zasudźeny, tuchwilu pruwuje, hač zapoda rewiziju. Tole zdźěli zwjazkarstwo Ende Gelände, kotrež bě we wobłuku klimoweho campa swjatkowny kónc tydźenja k akcijam ciwilneje njeposłušnosće namołwjało.
Dotal njeje so zasudźeny hišće doskónčnje rozsudźił, zdźěli rěčnica Ende Gelände Dorothee Häußermann dźensa na naprašowanje SN. „Chcemy najebać wusud sudnistwa dalše akcije přewjesć. Škit klimy njeje žane złóstnistwo“, rěčnica wuzběhny. Přiwšěm je zwjazkarstwo zludane, dokelž ma přepytowanja policije za jednostronske. „Wukročenja prawicarjow přećiwo aktiwistam na klimowym campje, kotrež běchu zdźěla chětro masiwne, njeje policija dale přepytowała“, Dorothee Häußermann wuswětli, „to wězo swojorazne prawniske začuće wuwabja.“