Dalše rozmołwy
Zhorjelc/Budyšin/Berlin (dpa/SN). W zawodomaj Bombardiera w Zhorjelcu a Budyšinje ma so 60 dźěłowych městnow zachować. Tole zdźěli kanadiski koncern po wčerawšich rozmołwach z dźěłarnistwom a cyłkownej zawodnej radu w Berlinje. Wuměnjenje za to pak je, zo so kmanosć wubědźowanja polěpši a Swobodny stat Sakska z inowaciskim spěchowanjom zawodaj podpěruje. Hospodarski minister Martin Dulig (SPD) bě tajke připowědźił, jeli koncern garantuje stejnišći w Sakskej njezawrěć.
1. społnomócnjeny dźěłarnistwa IG metal Wuchodneje Sakskeje Jan Otto ma zachowanje dźěłowych městnow za dobre. Zaměr dźěłarnistwa pak je hišće wjace zdźeržeć. Połoženje wostanje dale kritiske, rjekny Otto. Tak njejsu w rozmołwje we wobłuku wupožčowanskeho dźěła žane wuslědki docpěli. Dalše rozmołwy ze zastupjerjemi sobudźěłaćerjow planuja 1. julija.
Bombardier chce w Zhorjelskim zawodźe 200 dźěłowych městnow šmórnyć, w Budyšinje 40. Po najnowšich rozmołwach ma so tuž 180 přistajenych wo swoje dźěłowe městno strachować.
Za nowe žiwjenje po jamje
Renaturěrowanje Janšojskeje wuhloweje jamy skići mnohe móžnosće, zasydlić škitane, rědke a wohrožene družiny rostlin. Tole podšmórny jednaćelka předewzaća Nagola Re tzwr Christina Gätz minjeny pjatk w Janšojcach.
Janšojce (AK/SN). Před pjeć lětami załožene předewzaće Nagola Re tzwr ze 16 sobudźěłaćerjemi bu w kategoriji „wobswět“ zwjazkoweho wubědźowanja „wuběrne městna w kraju idejow 2016“ wuznamjenjene. Z wuswědčenjom hódnoći jury projekt Zelena wutroba, kotryž firma wot lěta 2009 přewjeduje. Projekt zmóžnja zasydlenje wjacorych tysacow škitanych rostlinskich družin we wote- wrjenej krajinje po wudobywanju brunicy. To je 95 hektarow wulka krajina bywšeje Janšojskeje wuhloweje jamy jako wosebity koridor mjez Małksowym dołom na juhu a přichodnym Dubojskim jězorom na sewjeru.
Ćěkace dźěći škitać
Berlin (dpa/K/SN). Organizacija za prawa dźěći Save the Children so starosći, zo je mjez ćěkancami spochi wjac dźěći bjez přewoda. Do Serbiskeje je jich w meji pjeć króć telko přišło kaž hewak, rjekny nawoda za pomoc na Balkanje Goran Bilić. Přičina toho su zawrjene hranicy. Nimo toho ilegalnje pućowace swójby často roztorhaja, zo dźěći potom same dale ćěkaja.
Generalny sekretar Europskeje rady Thorbjørn Jagland namołwi europske knježerstwa, měć škit mjenjelětnych migrantow a próstwarjow wo azyl před seksualnym znjewužiwanjom za najwyšu prioritu. „Dźěćom, kotrež su na ćěkancy, hrozy wulki strach seksualneho wuklukowanja a znjewužiwanja“, wón zwurazni. „Z tym so trawma, kotryž mnohe z nich dožiwjeja, hišće zesylni.“
Za zaměrne zwičnjenje
Turistiski zwjazk Łužiska jězorina zasadźuje so sylnišo za regionalne kooperacije. Wčera zeńdźechu so zastupnicy zwjazka k posedźenju w Lubušu, zo bychu wo tym wuradźowali.
Lubuš. (AK/SN). Mjezy přesahowacy turistiski zwjazk Łužiska jězorina chce intensiwnišo z regionalnymi partnerami hromadźe dźěłać. K tomu słušatej na přikład Łužiske koło a Wysoka šula Žitawa/Zhorjelc. Tole podšmórny nawoda produkciskeho wuwića a marketinga Marcus Heberle wčera na posedźenju zaměroweho zwjazka Łužiskeje jězoriny Sakska w Lubušu. „Kooperacija z Łužiskim kołom zmóžnja nam mjezynarodne skutkowanje a zaměrne zwičnjenje“, wón wuswětla. „Na njedawnym zarjadowanju smy we wobłuku mosta nad wubědźowanskej čaru blisko hłowneje tribuny za region wabili.“
Raz njeskoržili, ale dźakowni byli
Kumwałd (JK/SN). Štwórć lětstotka hižo je Hodźijska agrofarma sobu jedne z wuznamnych ratarskich předewzaćow Budyskeho wokrjesa. Jako dźak za to, zo je so zawod wuspěšnje wuwił na markantne ratarske předewzaće, přeprosy předsydstwo tuchwilnych a bywšich sobudźěłaćerjow na swjedźeń do Kumwałdskeje „Módreje kule“. Přichwatali běchu tuž gratulanća z politiki, hospodarstwa a partnerskich zawodow.
Widźomne slědy wokoło Zdźěrje zawostajił
Jednaćel holanskeje agrarneje farmy Dietrich Hesse so na wuměnk podał
... wotpowědnje politiskim a hospodarskim wuměnjenjam zawod wukmanić ...Kónc lěta 2015 je so jedyn z poslednich markantnych, w ratarskich kruhach připóznaty ratar Dietrich Hesse, jednaćel předsydstwa holanskeje farmy Zdźěr, na wotpočink podał. W starobje nimale 71 lět je sej to tež wjac hač zasłužił. Přiwšěm njebě to jemu lochko a tak cyle so z ratarskeho hospodarjenja hišće wróćo njesćehnje. Na poslednjej zhromadźiznje zawoda wuzwolichu jeho na tři lěta za předsydu dohladowarskeje rady Zdźěrjanskeje agrarneje towaršnosće.
Hornju Łužicu a Drježdźany hospodarsce wušo splesć
Na njedawnym srjedźostawskim dnju wuchodneje Sakskeje a Hornjeje Łužicy w Biskopicach je wuwićowy region Drježdźany w srjedźišću stał.
Sakska stolica jako swětłownja hospodarskeho wuwića na wuchodźe Němskeje mjezuje bjezposrědnje na Hornju Łužicu. To je z přičinu, w politice kaž tež w hospodarstwje wo tym rozmyslować, kak hodźeli so lěpšiny wobeju, derje so wuwiwaceju regionow splesć a na mjezsobne dobro wužiwać.
K lěpšemu dorozumjenju běchu organizatorojo zarjadowali podijowy forum ze zastupjerjemi Drježdźan a Hornjeje Łužicy z politiki, hospodarstwa kaž tež z dźěłoweje agentury.
Wino z pohórnistwoweje kónčiny
Braniborska jako winowy kraj njeje dotal wulce znata. Na nimale dwaceći winicach pak plahuja tam wino. Wosebitosć je, zo su tři winicy w Delnjej Łužicy wobstatk rekultiwowanja bywšeju brunicoweju jamow.
Gižkojce (SN/at). Winica Klěšnik (Wolkenberg) blisko Nowych Wikow (Neupetershain) je ze šěsć hektarami druha najwjetša po cyłej Braniborskej. 26 000 winowych pjenkow běłych družin Schönburger, Šěro- a Běłoburgundski, Kernling a rědki Čerwjeny rizling kaž tež čerwjenej družinje Rondo a Cabernet Dorsa tam rosće. Hromadźe z hektar wulkej winicu nad Rańskim jězorom wučinja přestrjeń na pohórnistwowej łužiskej podźe nimale třećinu cyłkowneje płoniny za plahowanje wina w Braniborskej, wuswětla Peter Schubert, referent za wino w ministerstwje za ratarske wuwiće, wobswět a ratarstwo w Podstupimje.
Najwjetši dźěłodawar regiona
Jězorinowy klinikum jako wukubłar a kooperaciski partner požadany
Wojerecy (AK/SN). Z partnerami w regionje chce Wojerowski klinikum łužiskeje jězoriny dale dołhodobnje hromadźe dźěłać. Tole rjekny jednaćel Jörg Scharfenberg minjenu sobotu na dnju wotewrjenych duri, jako tam přehladku swojich wukonow a nowosće předstajichu.
Z tysac sobudźěłaćerjemi w 13 klinikach, třoch institutach kaž tež dalšich zarjadach a domach je klinikum najwjetši dźěłodawar regiona, podšmórny předsyda dohladowanskeje rady Thomas Delling. Wopřijeće „strowotniski campus“ je po jeho słowach bjezdwěla woprawnjene. Na 19 stacijach móžachu so wopytowarjo wo jednotliwych wobłukach wobhonić.
Přenajerjam za dowěru dźak wuprajili
Čorny Hodler (SN/BŠe). Prawidłownje přewjeduje Radworski agrarny zawod hromadźe z Wulkodubrawskim agrarnym zawodom swjedźeń za přenajerjow. Sobotu běchu woni kaž tež sobudźěłaćerjo z jich swójbami do Čorneho Hodlerja přeprošeni. „Dźakujemy so našim přenajerjam kaž tež sobudźěłaćerjam za dowěru“, zwurazni jednaćel zawoda Sven Graff, kotremuž je dobry poćah mjez agrarnym předewzaćom a přenajerjemi jara wažny. A zo ludźo wědźa, što so na jich polach wšitko stawa, organizuja na swjedźenju tež busowu turu po honach, hdźež zajimcam rozkładuja hdźe a čehodla tam kotre družiny rostlin plahuja. Ze starej Chelnjanskej wohnjowej woboru jědźechu tež hišće do hródźow zawoda. A tam móžachu so wopytowarjo, přeswědčić wo dobrych wuměnjenjach, pod kotrymiž kruwy plahuja. Dale sej wobhladachu, kak funguja moderne robotery, z kotrymiž kruwy deja.
Na ležownosći w Čornym Hodlerju mějachu hišće přehladku staršich a modernych ratarskich mašinow natwarjenu. Mnozy wužiwachu přiležnosć, so wo stawje techniki informować a tež raz z traktorom sobu jěć.
