Hriwny a fenki njewuměnjene
Frankfurt nad Mohanom (dpa/SN). Tež nimale 16 lět po zawjedźenju eura su přeco hišće bankowki a drobne pjenjezy hriwnow w hódnoće miliardow we wobtoku. Po datach Zwjazkoweje banki wučinješe cyłkowna hódnota dotal njewuměnjenych pjenjez kónc nowembra nimale 12,64 miliardow hriwnow (nimale 6,46 mrd. eurow). „Bankowki a drobne pjenjezy w hódnoće něhdźe 100 do 150 milionow hriwnow ludźo kóžde lěto wróća. Njeje pak z toho wuchadźeć, zo so dospołne wobstatki hriwnow, kotrež su hišće we wobtoku, wuměnjeja“, rjekny předstejićer Zwjazkoweje banki Carl-Ludwig Thiele powěsćerni dpa.
Po měnjenju Zwjazkoweje banki je dźěl drobnych pjenjez a bankowkow zhubjeny, je zničeny abo tči w šatulach zběraćelow. Nimo toho tukaja, zo su wjetše sumy hišće we wukraju. W někotrych krajach bě hriwna jako stabilny a wěsty srědk, hódnotu wobchować, požadana. Druhdy wužiwaja ju samo hišće jako płaćenski srědk. Njewuchadźeja z toho, zo tele wobstatki hriwnow w bliskim přichodźe pola Zwjazkoweje banki zapłaća, notowa banka wuswětla.
W Haslowskej kuchni předźěłuja italske płody
Budyšin/Haslow (SN/MWj). Jěducy přez Haslow žno dwójce pohladnješ a so dźiwaš, zo pola Bizoldec italske wudźěłki poskićeja, na čož tam wosebita tafla při puću pokazuje. Za tym tči Antonino Milazzo, kiž ma k Bizoldecom swójbne poćahi. Wón pochadźa ze sicilskeje prowincy Agrigent a ma w Budyšinje mjeztym něhdźe tři lěta wosebity wobchod za italske twory. „Sym pytnył, zo w Budyšinje nichtó tajke njepředawa, tohodla sym so sam rozsudźił to činić“, praji nimale 50lětny ze swojim njezaměnliwym italskim akcentom.
Hromadźe z wulkoregionami
Choćebuz (SN/at). Strukturna změna we Łužicy trjeba wukonity, potrjebje wotpowědowacy system transporta tworow. Tohodla wodźěli so Choćebuska Industrijna a wikowanska komora (IHK) na kooperaciskim projekće ERFA KV. W jeho srjedźišću steji kombinowany wobchad na dróhach, kolijach a na wodźe jako wobswětej přichilena alternatiwa k ryzy nadróžnemu tworowemu wobchadej. Tajka změje při eficientnej organizaciji runočasnje hospodarske lěpšiny.
Z projektom ERFA chce łužiski industrijny region z wulkoregionami Dortmund, Frankfurt nad Mohanom, Hamburg a Regensburg/Nürnberg nazhonjenja wuměnjeć, zo bychu potenciale kombinowaneho wobchada zhromadnje lěpje wužiwali, kaž Choćebuska IHK zdźěla.
Hdyž steji druhi adwent před durjemi, drje je sej mjeztym kóždy ...
Hładźina spaduje
Choćebuz (SN). Wobswětowy zwjazk Zelena liga žada sej wot knježerstwa Braniborskeje, zniženje dnowneje wody přez brunicowe jamy hižo njedowolić. Kaž braniborske wobswětowe ministerstwo wčera sćelakej RBB wobkrući, spaduje hładźina wody w cyłkownje sydom jězorach wokoło Gubina. Za hydrologow ministerstwa zawinuje to dale a niša dnowna woda za Janšojsku jamu, byrnjež wudobywacy koncern LEAG potwjerdźił, zo tajkile sćěh hórnistwa tam scyła hišće wobkedźbujomny być njesměł. „Zniženje dnowneje wody nastupajo wobhospodarjer jamy zjawnosć hižo lěta dołho za nós wodźi. Wuprajenja krajneho zarjada dopokazuja, zo rozměr zniženja wo wjele dale saha, hač chce předewzaće přiznać. Kupanske jězory, lěsy a škitanišća su wšitke jenak potrjechene. Dalšemu wotwódnjenju ma so tuž zadźěwać“, zjima rěčnik Zeleneje ligi Renej Šuster.
Ze změnu jězbneho plana 10. decembra trjebaja dalokowobchadne ćahi ...
LEAG dźěła tež na projektomaj za energijowy přewrót
Borborinowy swjedźeń koncerna LEAG steješe wčera wječor w Choćebuskej měšćanskej hali w znamjenju njewěsteho přichoda sobudźěłaćerjow politiskich rozsudow nastupajo wudobywanje brunicy dla. Ministerskaj prezidentaj Sakskeje a Braniborskeje Stanisław Tilich (CDU) a Dietmar Woidke (SPD) staj Zwjazk namołwiłoj, Łužicu njepřewostajeć njewěstemu dóńtej.
Choćebuz (SN/at). Nawoda předsystwa LEAG dr. Helmar Rendez dwě dopóznaći hnydom na dypk přinjese: Němska je jara zdalena wot toho, so k rozumnej energijowej politice nawróćić. „Mamy nětko čorne na běłym, kak chětře dadźa regiony spadnyć, słuži-li tomu, namakać politiski kompromis.“ W za předewzaće ćežkim połoženju pak su z wozjewjenjom noweho rewěroweho plana w měrcu prawje jednali. „A móžachmy wujasnić: Nic wšo, štož mamy dale za energijohospodarsce trěbne, móžeš dźensa hišće předewzaćelsce zastupować. To je tragiske.“ LEAG je po słowach Rendeza dale na třoch polach wužadane. Dźe wo to, być eficientnišo, fleksibelnišo a digitalnišo. W tym zwisku chwaleše wón staršich a młódšich sobudźěłaćerjow.
Dobyćerka myta LEX nětko tež kursy w šiću poskića
Łužiska hospodarska iniciatiwa (WiL) je wčera w Běłowodźanskej lodowej arenje myta Łužiskich załožerjow eksistency (LEX) spožčiła. Za najlěpši wobchodniski plan 2017 wuznamjenichu „Schnuckidu – płaty a drobne twory“ Mandy Berger z braniborskeho Herzberga.
Běła Woda (SN/at). Lawreatka Mandy Berger ma wobchod z online-shopom a je na přiběracy zajim mjez młodymi žonami reagowała. Wobchodnica je swój poskitk wo šićowy přisłušk wudospołniła a zarjaduje wotnětka za započatkarki kursy w šiću.
Nimale 2 500 ludźi je wčera w Zhorjelcu přećiwo planowanemu ...
Komory signal zhromadnosće wupósłali
Drježdźany (SN/at). Rjemjesło ma tež w přichodźe rjap srjedźostawskeho hospodarstwa być. Tohodla žadaja sej jeho zastupjerjo wotpowědne rozsudy, wosebje nastupajo financowansku strukturu Europskeje unije. Wšako přicpěwaja spěchowanju ze strukturneho fondsa EU wosebity wuznam.
To pak njeje jenož naležnosć Drježdźanskeje rjemjeslniskeje komory. Hromadźe ze swojimi pjeć partnerkami – regionalnej rjemjeslniskej komoru I’ll-de France, rjemjeslniskej komoru Val de Marne (wobě Francoska), Wrócławskej rjemjeslnikej komoru, rjemjeslnistwom Gostyń (wobě Pólska) a Děčínskej rjemjeslniskej komoru (Čěska) je wona minjeny pjatk rezoluciju „Rjemjesło skrućić – Regiony spěchować – Europu wožiwić“ podpisała. Politiske, hospodarske a towaršnostne wužadanja, kaž na přikład wobzamknjeny wustup Wulkeje Britaniskeje z EU, zastupjerjow rjemjeslnikow hnuja z poziciskej papjeru signal zhromadnosće wupósłać. Zdobom wusměrjeja swoje žadanja ze sylnym hłosom na politiskich rozsudźerjow w Brüsselu.
