Bjezdźěłnosć trochu přiběrała

Dienstag, 01. August 2017 geschrieben von:

Budyšin (CK/SN). W juliju bě we wuchodnej Sakskej 20 541 bjezdźěłnych, 36 wjace hač w juniju a 2 654 mjenje hač loni w samsnym měsacu. Snadnuški přirost ličby bjezdźěłnych Ilonu Winge-Paul njestarosći. Kaž jednaćelka za operatiwny wobłuk Budyskeje agentury za dźěło dźensa dopołdnja rozłoži, korjeni to kaž hižo minjene lěta předewšěm w tym, zo přizjewjeja so młodźi ludźo po zakónčenju šulskeho abo powołanskeho wukubłanja najprjedy raz bjezdźěłni. „Naš zaměr je, fachowcow po móžnosći prawje bórze na regionalnych dźěłowych wikach integrować“, rjekny wona při předstajenju aktualnych datow hornjołužiskich dźěłowych wikow.

Kwota bjezdźěłnosće wučinješe kónc julija 7,3 procenty. Chabłała je wona dale mjez 3,7 procentami we wobłuku Radeberg, 4,2 procentomaj w Kamjencu a 12,4 procentami w Zhorjelcu.

Dźěłowa agentura móže tuchwilu přizjewjenych 4 532 socialneho zawěsćenja winowatych městnow posrědkować, štyri wjace hač před měsacom.

Čerwjene rubiško

Dienstag, 01. August 2017 geschrieben von:
Stajnje mjez třećinu a štwórćinu chabła podźěl wobłuka dalšich hospodarskich posłužbow na socialneho zawěsćenja winowatych dźěłowych městnach, kotrež je dźěłodawarski serwis Budyskeje agentury minjene štwórć lěta w firmach akwirěrował. Tež dźensa dźěłowa agentura zwěsći, zo maja w dalšich hospodarskich posłužbach znowa nowe městna k dispoziciji. Dźělne dźěło je potajkim dale kruće zapřijate, dokelž zdawa so firmownikam tajki raz přistajenja přeco hišće lukratiwny. K lětušim wólbam zwjazkoweho sejmja industrijne dźěłarnistwo twar-agrar-wobswět wuchodneje Sakskeje strony namołwja, zo bychu jasne koncepty přećiwo njewurunanosći na dźěłowych wikach předpołožili. Dźělne dźěło je dźěłarnistwu čerwjene rubiško. Wšako je tajke hakle tele dny jako atypiske porokowało a sej změny w zajimje potrjechenych dźěłopřijimarjow žadało. Axel Arlt

W Hornjej Łužicy su mnohe dźěłowe městna njewobsadźene. Přiwšěm je wjac bjezdźěłnych. Tónle zjaw pak je po słowach Budyskeje dźěłoweje agentury normalny.

Na rěpikowym polu njedaloko Hornjeje Hórki stej so wčera připołdnju syčomłóćawa a traktor kompletnej wupaliłoj. Sobudźěłaćerjo ratarskeho zawoda woheń wuhladachu, nawróćiwši so z připołdnišeje přestawki. Cyłkownje 44 wohnjowych wobornikow z Hornjeho kraja je płomjenja hašało. Škodu trochuja na něhdźe 500 000 eurow. Policija přičiny přepytuje. Foto: Jens Kaczmarek

Fachowe dźěła předstajili

Montag, 31. Juli 2017 geschrieben von:

Kamjenc (JK/SN). Hižo z dobrej tradiciju je, zo wučomnicy, kotřiž su swoje wukubłanje jako blidar wuspěšnje zakónčili, swoje pruwowanske wudźěłki zjawnosći prezentuja. Sobotu je lětuši lětnik w rumnosćach Kamjenskeho zastaranskeho zawoda ewag mnohim zajimcam předstajił wurjadne dźěła, nastate składnostnje kónčneho pruwowanja. Nimo zachodnych domskich durjow běchu to wšelake meble za bydlenja, kaž kamory a pisanske blida. Samo schód a łožowu kombinaciju pokazaštaj wučomnikaj jako dopokaz wuspěšneho wukubłanja a jako wuraz toho, zo tele powołanje wjeselo wobradźa. Mjez lětušimi wotchadnikami bě tež młodo­stna, kotraž je mjez hólcami derje wobstała a smě so nětko blidarka mjenować.

Z dźěłami a z wukubłanskimi wukonami běštaj wyši mišter wokrjesneho zwjazka blidarjow Ulrich Lange kaž tež předsyda pruwowanskeje komisije přewšo spokojom. Wšitcy wučomnicy lětušeho lětnika su pruwowanja z wuspěchom wobstali a změja po wukubłanju wěste dźěłowe městno – pak we wukubłanskim zawodźe, pak w předewzaću, kotrež su sej za přichodne powołanske žiwjenje wupytali.

Hišće su njedorozumjenja

Freitag, 28. Juli 2017 geschrieben von:

Łužica – ležaca na wuchodźe Němskeje, na mjezy k Pólskej a Čěskej kaž tež k wuchodnym krajam Europy – skići zajimawe hospodarske połoženje. Strukturna změna móhła tuž šansa być.

Budyšin (SN/BŠe). Hižo někotre lěta rěčimy we Łužicy wo strukturnej změnje, wšako je wotwidźeć, zo so brunicowe hórnistwo poněčim kónči. Strukturny łamk, kajkiž bě region po politiskim přewróće dožiwił, chcedźa zamołwići hospodarstwa a politikarjo wotwobarać. W lěće 2015 dojednachu so potrjechene wokrjesy Budyšin, Zhorjelc, Sprjewja-Nysa, Łobjo-Halštrow a Dubje-Błóta na zhromadne dźěło a dorozumichu so ho­spodarski region Łužica wutworić. Pod třěchu towaršnosće chcychu zhromadnje za perspektiwu pytać.

„Wróćo ke korjenjam“ na T-shirće

Freitag, 28. Juli 2017 geschrieben von:
T-shirty ze serbskim napisom zhotowja Žuričan Achim Lipič w swojej wabjenskej firmje tež po přećach z našich wsow. Tak je wón za Wotrow naćisnył a produkował tajke z hesłom „Wróćo ke korjenjam“ (nalěwo). Jubilej w Nowej Wjesce abo mjezynarodny folklorny festiwal stej jeho runje tak pohonjałoj so gratu přimać. Za hesłom „Sym Ser(p)b“ tči rjana słowna hrajka. Mjez wudźěłkami čłona Zwjazka serbskich rjemjeslnikow a předewzaćelow su dale čapki z napisom „Rěču serbsce“. Rady poradźuje Achim Lipič tež młodźinske kluby. Foto: SN/Maćij Bulank

Tule wěš, što kupuješ

Donnerstag, 27. Juli 2017 geschrieben von:

Rosćacy wobrot a dźeń a wjace swěrnych kupcow je přeće kóždeho zawoda. Njebjelčanska plahowarnja rancow ma za wuspěch dobry koncept, nic jenož w produkciji, w chlěwach zawoda, ale wosebje tež w rězniskich wobchodach.

Dołhe rynki kupcow pola rěznika znaja mnozy jenož hišće z časa NDR, hdyž raz zaso k róčnym časam dobru šunku předawachu abo něšto cyle wosebiteho.

Najebać wožiwjenje Bjerwałdskeho jězora na Hamorskej stronje ma přibrjóh měrna idylka wostać. Hotel a dožiwjenski park Hornja Łužica tzwr chce nimale tři miliony eurow za dalše turistiske wuwiće regiona nałožić.

Bjerwałd (SN/JoS). Hłuboko do móšnje sahnyć chcył wobhospodarjer hotela a dožiwjenskeho parka Hornja Łužica w Hamorje, zo by Bjerwałdski jězor turistisce dale wuwił. Za to nałoži sumy w milionowej hódnoće. Tak chce na přikład sewjerny přibrjóh Bjerwałdskeho jězora w Hamorje z informaciskim centrumom, łódźnistwom a jězorinowym hosćencom wožiwić. „Přiwšěm ma jězor měrna idylka wostać. Wšako njepytaja hosćo jenož atrakcije, ale tež měr“, wuswětla jednaćel hotela a dožiwjenskeho parka Hornja Łužica Armin Hoffmann.

Za wyšu mzdu we wikowanju

Donnerstag, 27. Juli 2017 geschrieben von:
Na centralnu stawkowu manifestaciju su so dźensa rano sobudźěłaćerjo kupnicow Kaufland we wuchodnej Sakskej před Wojerowskim Kauflandom zešli. Kaž Sonja Zimmer z posłužboweho dźěłarnistwa ver.di wuchodna Sakska zdźěli, tarifowe jednanja za drobno- a rozsyłanske wikowanje doprědka njeńdu. Ver.di žada sej šěsć procentow wjace mzdy, dźěłodawarjo poskićichu 1,5 procentow po dwěmaj měsacomaj čakanja. Měsacaj stej nimo, sobudźěłaćerjo su dale njespokojom. Tohodla su dźensa cyły dźeń stawkowali. Foto: Gernot Menzel

Neuheiten LND