Drježdźany (SN). Tež kónc minjeneho lěta je pozitiwne wuwiće hladajo na ličbu wučomnikow dale šło. Cyłkownje 2 132 młodych ludźi, mjez nimi 581 žonow, je so hač do kónca decembra za wukubłanske městno we wobłuku Drježdźanskeje rjemjeslniskeje komory rozsudźiło a wukubłanje w jednym z wuchodosakskich rjemjeslniskich předewzaćow zahajiło. To je 8,6 procentow wjace hač lěta 2016. Ličba wučomnikow tak hižo pjate lěto za sobu přiběra, kaž rjemjeslniska komora zdźěla.
Łužiska a srjedźoněmska towaršnosć hórnistwoweho zarjadnistwa (LMBV) chce łužisku jězorinu dale zaměrnje saněrować. To su na njedawnej regionalnej konferency w Hórnikach připowědźili.
Hórnikecy (AK/SN). Najwažniši dźěłowy srědk LMBV při polěpšenju kwality wody jězorow je saněrowanska łódź „Klara“, kaž nawoda projektoweho managementa Michael Matthes na konferency zdźěli. Łódź běchu hižo loni na Parcowskim jězoru zasadźili. Zo by wodu neutralizowała, je „Klara“ 10 300 tonow běłeho drobneho wapna a 16 000 tonow mlěteho wapnowca do wody sypała. Akcija traješe hač do nowembra. „Chcemy łódź nalěto 2018 znowa zasadźić“, Matthes rjekny.
Wočakowanja ratarjow na nowy agrarny zakoń EU su wulke. Lětsa w lěću ma naćisk předležeć. Předewšěm wuchodoněmscy burja pak so prašeja, hač přewažuja lěpšiny abo njelěpšiny.
Podstupim (dpa/SN). Wuchodoněmscy ratarjo boja so móžneho kaženja wikow. „Wobsteji strach, zo zhromadna europska agrarna politika wjace na prěnim městnje njesteji a kraje po swójskich zajimach postupuja“, rjekny prezident Braniborskeho krajneho burskeho zwjazka Henrik Wendorff powěsćerni dpa.
W lěću ma naćisk zakonja předležeć. Po ćežkim połoženju ratarstwa w minjenych lětach chce komisija EU agrarne spěchowanje reformować. Kraje maja potom wjace móžnosćow swójskeho jednanja dóstać. Wendorff pak ma to za „krok dozady. Wjele za přichod wotmysleneho wupada kaž zapłatany přestrjenc.“ Problematiske je, hdyž na přikład jedyn kraj wěste formy plahowanja skotu z premijemi spěchuje, tamny pak nic. „Kraje móža potom tež rozsudźić, hač direktne dochodowe pomocy płaća abo hinaše programy preferuja“, Wendorff warnuje.
Drježdźany (SN). Sakscy burja dóstawaja mjez hodami a Nowym lětom swoje tak mjenowane direktne płaćenja Europskeje unije. Na to skedźbni wčera ministerstwo za wobswět a ratarstwo w Drježdźanach. Dohromady 247 milionow eurow z hornca EU ma nimale 7 300 ratarjam w swobodnym staće likwiditu jich zawodow zawěsćić a jim planowansku wěstotu zaručić, kaž ratarski minister Thomas Schmidt (CDU) wuzběhny.
Gmejna Slepo žada sej za potrjechenych wjesnjanow njewotwisnu wujednawarnju, kotraž hórniske škody wobdźěłuje. To pisa komuna w stejišću nastupajo hłowny zawodny plan Wochožanskeje brunicoweje jamy 2018/2019. Z jednym napřećiwnym hłosom je wjetšina gmejnskeje rady stejišćo na posedźenju spočatk měsaca schwaliła.
Slepo (AK/SN). „Prjedy hač hórnistwo płoniny wužiwa, maja so wosebje ležownostne mjena dokumentować“, přispomnja Domowinska župa „Jakub LorencZalěski“. Za přichodne generacije maja so serbske woznamjenjenja w kartach a z wopisowanjemi zawěsćić a so „potrjechenym gmejnam, Serbskemu institutej a nam jako rěčnikam narodneje mjeńšiny přewostajić“.
Drježdźany (dpa/SN). Ludźo w Sakskej produkuja dale wjele mjenje wotpadkow hač přerězny zwjazkowy wobydler. W lěće 2016 bě to w swobodnym staće něhdźe 1,35 milionow tonow wotpadkow z domjacnosćow, štož rěka 330 kilogramow na wosobu, kaž wobswětowe ministerstwo w Drježdźanach informuje. W Němskej bě to 462 kilogramow, při čimž njemóžeš wobě ličbje direktnje přirunać. Sakska ličba złožuje so na zjawne wotstronjowanje přez wokrjesy, bjezwokrjesne města a wotpadkowe zwjazki. Hódnotne maćizny a biowotpadki pak runje tak na powšitkownowužitnej a priwatnej bazy zběraja. Za zwjazkowu statistiku podawaja někotre kraje jenož zjawne wotstronjowanje wotpadkow.
„Wotpadkam zadźěwać rěka resursy lutować“, rjekny wobswětowy minister Thomas Schmidt (CDU). Mnóstwo na wobydlerja wučinja 125 kg zbytnych wotpadkow, 123 kg hódnotnych maćiznow, 56 kg biosmjećow, 25 kg spěrawych wotpadkow a nimale kilogram wotpadkow ze škódnymi maćiznami.
Biskopicy (SN/at). Zawod za zhotowjenje technologisce přewšo inowatiwnych grafitowych elektrodow nastanje na 21 kopanišćow wulkim arealu Biskopičanskeju přemysłownišćow sewjer a sewjer 2. Skupina Maxa Aicherowych předewzaćow trjeba je za swójske zhotowjenje wocla. Kaž bě na njedawnym posedźenju Biskopičanskeje měšćanskeje rady zhonić, ma tale produkcija njewotwisnosć wot chinskich twarcow elektrodow zaručić, kotrež wiki wobknježa a tak płaćizny zwyšeja. „Naš česćelakomy zaměr je, twornju kónc lěta 2018 wotewrěć“, rjekny projektowy nawoda prof. dr.-ing. Klaus Krüger ze skupiny Maxa Aicherowych předewzaćow, jako předstaji projekt w měšćanskej radźe. W prěnim wotrězku inwesticije chcedźa 140 dźěłowych městnow wutworić. „Dźěłowe mocy pytamy bjez wobmjezowanja tule, aktualnje je to dźesać inženjerow za planowanje a natwar produkowanišća“, Krüger doda.