Budyšin/Smochćicy (SN/BŠe). Ratarjo w Němskej su hladajo na mało spadkow a wysoke temperatury minjenych mě­sacow mało žnjowych wunoškow měli. Dołho wojowachu burske zjednoćenstwa a zwjazkowe kraje wo financnu podpěru potrjechenym. W awgusće je zwjazkowe knježerstwo potom připowědźiło, 170 milionow eurow pomocy přewostajić. Samsnu sumu měło šěsnaće zwjazkowych krajow nałožić. Cyłkownje 340 milionow eurow ma so potajkim nětko po­trje­chenym ratarjam rozdźělić. Zo nje­bu­dźe to lochko, móže sej kóždy před­stajić, wšako běchu ratarske zawody w jed­notliwych regionach wšelako po­trjeche­ne. Nadźija na spěšnu, njeběrokratisku a efek­tiwnu pomoc bě wulka.

17. łužiske rybowe tydźenje so nachileja. Tež hdyž su hosćencarjo a turistikarjo z lětušim wotběhom jara spokojom, zhladuja woni starosćiwje do přichoda. Hač drje móža klětu zarjadowanje w zwučenym ramiku zaso přewjesć, dotal­ jasne njeje.

Budyšin (SN/BŠe). W přichodnymaj dwěmaj tydźenjomaj su hišće wjacore poskitki we wobłuku 17. łužiskich rybowych tydźenjow předwidźane. Tak při­hotuja na Ramnowskim hrodźe wosebite barokne předstajenje – kulinariski wječork na temu rybu. We Wichowje pola Wósporka poskića přichodnu njedźelu swojim hosćom rybowy bifej. Na reformaciskim swjedźenju přeproša hatarstwo Hóznica (Petershain) na wułójenje rybow. Nimo zarjadowanjow pak maja turistikarjo a hatarstwa dalše zarjado­wanja a wodźenja předwidźane. „Lětsa mamy 35 wobdźělnikow z najwšelako­rišimi poskitkami“, wuswětla projektna managerka Marketingoweje towaršnosće Hornja Łužica-Delnja Šleska (MGO) Antje Lehmann. Ličba je minjene lěta konstantna a dopokazuje wulki wuznam a připóznaće, kajkež su sej rybowe tydźenje mjez ludźimi zdobyli.

Připowědźeny pomocny program ratarskim zawodam, kotrež su pod lětušej dołhej suchotu ćerpjeli, je skónčnje zestajany. A kaž burja hižo z nazhonjenjow wědźa, maja za njón wjele formularow wupjelnić. Hłowy budu so tuž chětro kurić, a tón abo tamny potrjecheny drje wótku prawdźepodobnje do žita ćisnje. Najpozdźišo hač do 16. nowembra maja podłožki sakskemu ministerstwu za ratarstwo, wobswět a geologiju w Drježdźanach předležeć. Zo su formulary wobšěrne a komplikowane, zwěsćichu tež ratarjo w Smochćicach, kotrymž běchu fachowcy zawčerawšim kriterije pomocneho programa rozłožili. Nimo wunoškow minjenych třoch lět maja ratarjo wšo swoje priwatne zamóženje, wšitke inwesticije a kredity podać a so takrjec „cholowy zuć“. Pawšalne rozrisanje by jednanje wolóžiło. Ale čehodla měło so w Němskej něšto zjednorić, kotraž je mišter běrokratije a ćežkich jednanjow? Bianka Šeferowa

Jedne z centralnych zarjadowanjow we wobłuku łužiskich rybowych tydźenjow bě minjenu sobotu při Ballackec haće w Złyčinje. Ryby a rjane wjedro postarachu so tam wo hotowy wopytowarski magnet.

Złyčin (JoS/SN). Słónčne a měrne nazymske wjedro, apetit na rybu a dobra swójbna nalada – takle prezentowaše so rybarski swjedźeń hatarstwa Karstena Ring­pfeila minjenu sobotu při Złyčinskim Ballackec haće. Lědma štó mysleše hišće na horce lěćne dny z mało wodu, a tak móžachu tež rybarjo swoje tehdyše starosće do wěsteje měry zabyć. Něhdźe wosom tonow ryby su sobotu z hata wułójili. Zwjetša běchu to karpy, mnohe hač do tři kilogramy ćežke. Dale mějachu šćuki, liny a sandaki w syći. Hižo při prěnim łójenju bě wulki sum pódla, kotrehož dyrbjachu třo rybarjo pod kontrolu přinjesć. Jeho pušćichu do wosebiteho bazenka, hdźež móžachu sej jeho wopytowarjo bliže wobhladać. Přičinu dosć dobreho wunoška z Ballackec hata widźi Karsten Ring­pfeil w tym, zo Mała Sprjewja hat sobu z wodu zastaruje a zo so lětuša horcota tule tak jara wuskutkowała njeje.