Myslić za generacije po nami
Towarstwo Sukuma Arts skići Njebjelčicam filmowu platformu
Trajnje hospodarić – filmowe premjery 2018, tak rěkaše hesło zarjadowanja na Dnju němskeje jednoty 3. oktobra w Drježdźanskim kinje Schauburg. Tam předstajene krótkofilmy we wobłuku projekta Stories of Change powědaja wo rjekach a rjekowkach w dobje změny na polu hospodarstwa. Mjez wopytowarjemi zarjadowanja běchu tež wjacori, kotřiž su paskej wo Njebjelčicach mjezwočo dali. Towarstwo Sukuma Arts je nošer projekta. We filmach skutkowacy hladaja z přeswědčenjom a trěbnym widom přez płót a kroča socialnje a ekologisce po trajnych pućach. Nimo Sukuma Arts je Stab za škit klimy filmowe zarjadowanje we wobłuku Umundu-festiwala za trajne wuwiće wuhotował. „Wšitke nam wažne naroki smy w Njebjelčicach namakali a so tuž po rešeršach poměrnje spěšnje rozsudźili tam film wjerćeć“, rjekny koordinatorka projekta Stories of Change Anne Schuster. Mjeztym rozmysluja wo tym, dlěšu dokumentaciju z nahrawaneho filmoweho materiala zhotowić.
Prapremjera za serbsku gmejnu
Wobydlerjo a hosćo su jurorojo
Hosćencow je w Hornjej Łužicy tójšto, a su tež derje wopytane. Štó dźě njeda so rady wot kucharjow ze słódnymi kreacijemi zapleńčić. Hač słódka, eksotiska abo domjaca kuchnja, kóždy ma zawěsće faworita, hdźež sej rady jědź popřeje. Wot spočatka nowembra móža ludźo wo swojim najwoblubowanišim hosćencu w Hornjej Łužicy wothłosować.
Budyšin (SN/BŠe). Turisća a domoródni stajeja často prašenje za najlěpšimi hosćencami w Hornjej Łužicy. Poskitki wšak su mnohostronske. Hač bara, kofejownja abo restawrant, za jedyn z nich so rozsudźić njeje scyła tak lochko.
Mjeztym hižo pjaty raz pyta Hornjołužiska app zhromadnje z kooperaciskim partnerom, Drježdźanskej DeHoGa, najwoblubowaniši hosćenc. Wobydlerjo a hosćo Hornjeje Łužicy maja sami rozsudźić a su tak zdobom jurorojo. Wothłosować smědźa wobdźělnicy pod www.oberlausitz-app.de, hdźež su tež wšitke trěbne informacije podate. Kóždy ma jenož jedyn hłós. Požadanski čas za hosćency je lětsa hač do 25. nowembra předwidźany. Hač do 2. januara maja potom ludźo wothłosować.
Z wuměny wuspěšne płody žnjeć
Na temu strukturna změna we Łužicy přewjeduja tuchwilu wjacore zarjadowanja. Stajnje zaso fachowcy twjerdźa, zo su wědomostne institucije za region bytostne, dokelž zmóžnjeja wuměnu mjez wědomosću a praksu. Zo móža wuspěch a płody z toho žnjeć, pokazuje Łužiske transferne myto.
Choćebuz (SN/BŠe). Hospodarstwo a wědomosć wuspěšnje zwjazać je wažny zaměr za přichod Łužicy. „Hižo něšto lět pokazuja to napjate a kedźbyhódne projekty, prezentowane w minjenych wubědźowanjach“, wuzběhnje tež jednaćel Łužiskeje hospodarskeje iniciatiwy (WiL) Klaus Aha. WiL je tónle zaměr potajkim hižo dlěje spóznała. Mjeztym wosmy raz chcedźa tak mjenowane wědomostne transferne myto spožčić. Wotnětka hač do klětušeho 31. januara móža so kooperacije mjez uniwersitami, slědźenskimi institucijemi a předewzaćemi wo nje požadać a 10 000 eurow dotěrowane myto dobyć.
Emocionalna reakcija hnuła
Sobudźěłaćerjo energijoweho koncerna hłuboki zaćišć zawostajili
Janšojce (SN/BŠe). Za škit klimy su zawčerawšim po cyłej Němskej tři bloki brunicoweju milinarnjow přistup k milinarnej syći wotpinyli. Wot njedźele stej dwaj blokaj milinarnje Niederaußem energijoweho koncerna RWE w porynskim rewěrje na wěstotnu rezerwu šaltowanej. Łužica z Janšojskej milinarnju bě prěni raz potrjechena. Cyłkownje wosom blokow po cyłej Němskej njebudźe přichodnje wšědnje milinu do syće dawać. Na wěstotnu rezerwu šaltowane su hižo milinarnja w delnjosakskim Buschhausu kaž tež dwaj blokaj milinarnje w Frimmersdorfje. Wobhospodarjerjo mjenowaneju zawodow dóstanu za to financne wurunanje.
Wot połnocy we wěstotnej rezerwje
Blok F Janšojskeje milinarnje LEAG je wot połnocy w tak mjenowanej wěstotnej rezerwje, milinowej syći dlěje njepřipinjeny. Za wobhospodarjerja je tójšto techniskich a organizatoriskich naprawow trěbnych, zo móhł na krótkodobny start k zawěsćenju zastaranja Němskeje z milinu přihotowany być. Porno tomu žadatej sej Klimowa alianca Němskeje a Zelena liga, Janšojsku milinarnju bórze dospołnje wotšaltować.
Janšojce/Choćebuz (SN/at). Krok njebě wobdźělenym w Janšojskej milinarni wčera lochki, hdyž su něhdźe w 17 hodź. 500megawattowy blok F ze syće wotpinyli. Z měrnym protestom, k čemuž bě koncernowa zawodna rada namołwiła, přewodźachu sobudźěłaćerjo tule proceduru. Dalše dźěła běchu trěbne, zo bychu wo połnocy status wěstotneje rezerwy docpěli, kaž nowinski rěčnik LEAG w Choćebuzu Thoralf Schirmer zdźěli. „Lěto pozdźišo na samsnym dnju wospjetujemy wotběhi za blok E.“ Móže być, zo je blok F wčera posledni raz milinu produkował, njeje-li w přichodnych štyrjoch lětach hotowostneje doby trjeba jón wužiwać. 2022 slěduje doskónčne zawrjenje.
Zniža płaćiznu
Wojuja zhromadnje přećiwo drogam
Zhorjelc (SN/BŠe). Něhdźe 100 zastojnikow policije wojewódstwow Dolny Śląsk a Lubuskie kaž tež zastupjerjo Zhorjelskeje policajskeje direkcije su so dźensa tydźenja na zhromadnej konferency zetkali. W kulturnej piwarni rozjimachu wuslědki zhromadneho projekta k wojowanju přećiwo drogowej kriminaliće. Zmóžnił bě so projekt přez Europski spěchowanski program Interreg Pólska-Sakska. Minjenej dwě lěće běchu zhromadnje projekt pod hesłom „Ně k drogam!“ přewjedli a tak eficientnje na mjezy mjez Němskej a Pólskej hromadźe dźěłali.
Sakski sekretar za nutřkowne naležnosće prof. dr. Günther Schneider so wobdźělnikam za intensiwne prócowanja dźakowaše. Konsum drogow a z tym zwisowacu kriminalitu wobstaranja policija wšědnje we woběmaj krajomaj dožiwja. Maršal wojewódstwa Dolny Śląsk Cezary Przybylski zwurazni, zo je angažement zastojnikow přewšo wažny, skutkownje napřećo drogam kaž crystal, cannabis abo tak mjenowanych legal highs wojować.
Ze 110 metrami najwyši wuheń Budyšina bu wčera z pomocu 30 ...
Rybarstwo łužisku kónčinu charakterizuje
Podpěra wobhospodarjam wodźiznow wažny stołp Leaderoweho regiona Hornjołužiska hola a haty
Wot časa pomjenowanja Leaderoweho regiona Hornjołužiska hola a haty před dźesać lětami su hižo mnohe projekty zwoprawdźili. Wobłuki toho su najwšelakoriše a sahaja wot infrastruktury přez turizm hač k hospodarstwu a bydlenjam předewšěm za młode swójby, kotrež chcychu twarsku substancu na wsy zachować a dale wužiwać. Při tym su hłowne zaměry regionalne tworjenje, žiwjenska kwalita, kooperacija a dwurěčnosć, skrućenje zhromadnosćow a wuwiće přirody. Serbske Nowiny chcedźa so spěchowanym wjerškam přichodnje wěnować a je bliže předstajić.
Kaž mjeno Leaderoweje kónčiny Hornjołužiska hola a haty hižo přeradźa, wodźizny region charekterizuja, štož měło so wězo tež přichodnje zachować. Přiroda dźě słuša k žiwjenskej kwaliće wobydlerjow a zaruča zdobom wěsty dźěl hospodarstwa kaž rybarstwo. Njezadźiwa tuž, zo so tomu tež spěchowanski program wěnuje.
Za dwě lěće 200 nowych dźěłowych městnow
Symbolisce z prěnim zarywom je předewzaće Hamburger Rieger tzwr wčera w Čornopumpskim industrijnišću započało druhu papjercowu mašinu twarić. Z inwesticiskej sumu 370 milionow eurow ma 200 nowych dźěłowych městnow nastać.
Čorna Pumpa (JoS/SN). Nowu připrawu PM 2 chcedźa w druhim połlěće 2020 startować. Z njej rjećaz wudźěłkow a rozrost předewzaća dale wjedu, kaž managing direktor Hamburger Containerbord Harald Ganster zawodnje wuzběhny. „Tak zwyšimy w produkciskim segmenće suroweho běłožłobičkateho papjerca kapacitu na jedyn milion tonow. Nimo toho je bruny žłobičkaty papjerc, wšo na zakładźe sto procentow stareje papjery.“ Ganster mjenuje nowu papjercowu mašinu „najwjetši jednotliwy projekt w stawiznach předewzaća“.
