Wiesbaden (dpa/SN). Němska sadźa nastupajo produkciju miliny dale přede­wšěm na wuhlo. W třećim kwartalu lěta je wjace hač třećina (36,3 procenty) cyłeho w Němskeje produkowaneho mnóstwa miliny něhdźe 118,1 miliardy kilowattowych hodźin na zakładźe fosilneho paliwa nastało, zdźěli dźensa Zwjazkowy statistiski zarjad ze sydłom we Wiesbadenje. Přirunujo to z lońšimi ličbami je to 13,3 procenty wjace. Najebać wysoke płaćizny je so nimo toho tež wjace zemskeho płuna za produkciju miliny wužiwało. Tule zwyši so podźěl wot 4,5 na 9,2 procentaj.

Wobnowjomne energije, kotrež so z wětrnikami, solarnymi a biopłunowymi připrawami produkuja, su po informacijach statistikarjow w třećim kwartalu 44,4 procenty domjacej produkciji miliny přinošowali. Lěto do toho bě podźěl ze 43 procentami hišće trochu mjeńši. Njewšědnje wjele słónčnych hodźin je so tež na produkciju miliny solarnych připrawow wuskutkowało. Tam statistikarjo jasne zwyšenje registrowachu.

Berlin (dpa/SN). Z apelom wobroća so zwjazkowy zarjad za škit wobydlerjow a před katastrofami (BBK) na ludźi w Němskej a skedźbnja na dźeń warnowanja, kotryž so jutře po wšej Němskej wotměje. Prezident BBK Ralph Tiesler je wčera wužiwarjow šmóratka namołwił, zo njech wšitke trěbne aktualizowanja systema Cell-Broadcoast přewjedu. Zo móhli wužiwarjo warnowace powěsće dóstawać, ma šmóratko zapinjene być a nic na lětanski modus nastajene. Štóž ma starši handy, móže so na internetnych stronach zarjada wobhonić, kak móhł warnowace powěsće dóstawać.

Z probowym dnjom warnowanja chcedźa zamołwići zwěsćić, kak techniska infrastruktura w Němskej funguje a po kotrych pućach su ludźo informacije dóstali. Cofnjenje warnowanja je za 11.45 hodź. předwidźane. Ideja je, zo so po wšelakich pućach warnuje. Tak słyša je ludźo w radiju abo telewiziji abo dóstanu je z app. Přidatnje so sireny zapinu. Tež informaciske systemy Němskeje železnicy warnowanja pokaza, zwjazkowy zarjad rozjasni.

Dokelž běchu swoje rubjenstwo w interneće prezentowali, poradźi so wčera policiji w Pritzwalku, paduchow lepić. Objekt požadosće běše 50 kilogramow ćežka, z pěskom pjelnjena plastika rumpodicha. Fota plastiki w přirodnej wulkosći nadeńdźechu sobudźěłaćerjo města a policije w socialnych syćach a móžachu tak identitu skućićelow zwěsćić.

Takle kancler Olaf Scholz zawěsće zymu njemrěje: Lěwica w Choćebuzu je jemu 70 metrow dołhi šawl napletła! Pisany šawl symbolizuje angažement Lěwicy přećiwo socialnej zymje w towaršnosći, kotruž amplowa koalicija po jeje měnjenju zawinuje. Zapósłanc zwjazkoweho sejma Christian Görke chce šawl w Berlinje kanclerej Scholzej přepodać. Wobstatk akcije su tež dopisnicy ze zdźělenkami wo stupacych finančnych poćežowanjach Choćebužanow.

Budyšin/Sulšecy (SN/MWj). „Wonječesćowanje swjatych křižow w Sulšecach a wokolinje wobhladuju kaž dyr do wutroby tule bydlacych ludźi.“ Takle wopisuje sakski statny minister za nutřkowne ­naležnosće Armin Schuster (CDU) swoje začuća, jako je sej wčera we wobłuku swojeho wopyta Domowiny hromadźe z jeje předsydu Dawidom Statnikom městnosće pola Sulšec wobhladał, hdźež běchu njeznaći w nocy na 22. oktobra wjacore swjate křiže wonječesćili. Sobu na městnje běchu zastupjerjo Zhorjel­skeje policajskeje direkcije. Wot nich je sej nutřkowny minister aktualny staw ­přepytowanja najnowšich padow rozłožić dał.

Kaž Armin Schuster po tym w nowinarskej rozmołwje w Budyskim Serbskim domje rjekny, je wón wo tym přeswědčeny, zo mějachu skućićeljo po jeho měnjenju nabožne a napřećo Serbam so měrjace politiske motiwy. „Tohodla je statny škit sobu zapřehnjeny“, rjekny minister. „Njemóžemy při kóždym swjatym křižu policajskeho zastojnika stražować dać. Wšitke pady pak dale přepytujemy a njebjerjemy je na lochke ramjo“, ­Schuster přilubi.