We Łužicy budu wučerjow wukubłać
Podstupim (dpa/SN). Braniborska chce wučerjow za zakładne šule přichodnje tež w Złym Komorowje wukubłać. Z tym wutworja nimo Podstupimskeje uniwersity druhe wukubłanske stejnišćo. Kaž ministerstwo za wědomosć w Podstupimje wčera zdźěli, maja prěni studenća wučerstwa hižo w zymskim semestrje 2023/24 w Złym Komorowje studować započeć. Z přidatnymi studijnymi městnami krajne knježerstwo na wulku potrjebu wučerjow reaguje.
Braniborska ministerka za wědomosć Manja Schüle (SPD) ma zaměr za jara naročny. „Ale trjebamy wučerjow a trjebamy jich spěšnje“, wona wuzběhny. Za nowe wukubłanske kapacity chcedźa klětu přidatnje něhdźe 5,2 milionaj eurow a lěto na to něhdźe 7,1 milion eurow přewostajić. Ličba studowacych w Złym Komorowje budźe wobstatk koncepta, kotryž nětko zestajeja, kaž z wědomostneho ministerstwa rěkaše.
Dypkowy system za zapućowanje
Nürnberg (dpa/SN). Zwjazkowa agentura za dźěło (BA) plany zwjazkoweho knježerstwa za směrnicowu papjeru wo zjednorjenymu zapućowanju fachowcow wita. Němska hač do lěta 2035 sydom milionow dźěłowych mocow zhubi, strata měła so přez naprawy w tu- a wukraju wurunać. „Tež hdyž w Němskej kóždu móžnosć za potencialom pytać wučerpamy, njebudźe to dosahać“, wuswětli čłonka předsydstwa BA Vanessa Ahuja. Tukrajne napinanja wudospołnjejo su wukrajni fachowcy trěbni, zo bychu němske dźěłowe wiki dale derje fungowali. „Wšitko štož tomu dopomha, přićah dźěłowych a fachowych mocow wolóžić, je wažne“, Ahuja wuzběhny. Zapućowanske prawo dyrbi moderniše, spěšniše, njeběrokratiske a fleksibelniše być.
Zwjazkowy kabinet chce dźensa směrnicowu papjeru wobzamknyć, na kotrejež zakładźe ma so zapućowanje kwalifikowanych dźěłowych mocow wolóžić. Předwidźane je, zo móža ludźo přez dypkowy system do Němskeje zapućować, tež hdyž hišće dźěłowe městno nimaja.
Dobra šansa!
To a tamne (30.11.22)
Němska je na fanowym turněrje na „Němskej mjezynarodnej šuli Doha“ z dobyćom 1:0 přećiwo Costa Rice třeće městno wobsadźiła. Přiwisnicy ze šěsć krajow wobdźělichu so minjenu sobotu na zarjadowanju kluba narodnych mustwow w Doha. Z dobyćerjom turněra sta so Jendźelska. Na turněrje wobdźělichu so fanojo kopańcy z Jendźelskeje, Waliziskeje, Costa Rica, Japanskeje, Nižozemskeje kaž tež Němskeje.
Španiski narodny trenar Luis Enrique je přeradźił, što jeho hrajerjo płaća, jeli interne směrnicy teama njedodźerža. „Štóž přepozdźe přińdźe, dyrbi płaćić. W jědźerni je zakazane šmóratka wužiwać. To započina pola sto eurow, a so stajnje podwoji hač do njeskónčneho“, rozkładźe 52lětny w streamje z fanami.
Němska dóstanje płun z Katara
Doha (dpa/SN). Energijowy koncern Qatar Energy je po słowach katarskeho energijoweho ministra Saada al-Kaabija zrěčenja wo dodawanju běžiteho płuna do Němskeje wotzamknył. Płun předawaja US-ameriskemu předewzaću Conoco Phillips, kotrež jón dale do Brunsbüttela dodawa, rjekny minister dźensa w katarskej stolicy Doha. Dodawanje ma so w lěće 2026 zahajić a znajmjeńša 15 lět trać. Po tymle puću chcedźa lětnje hač do dweju milionow tonow płuna dodawać.
Steinmeier na Balkanje
Berlin (dpa/SN). Zwjazkowy prezident Frank-Walter Steinmeier je dźensa swoju štyridnjowsku jězbu do zapadobalkanskeju krajow Sewjerneje Makedonskeje a Albanskeje zahajił. Centralna tema jeho rozmołwow budźe planowane přiwzaće wobeju statow do Europskeje unije. Sewjerna Makedonska a Albanska hižo něhdźe lětdźesatkaj na tutón krok čakatej. Tež štyri zbytne kraje zapadneho Balkana – Kosowo, Bosniska-Hercegowina, Serbiska a Čornohórska sej to přeja.
Wuradźuja wo dalšej podpěrje
Předewzaća rabat dale dali
Tiket w meji?
Wjace personala za zjawnu słužbu
Berlin (dpa/SN). Předsyda Zwjazka zastojnikow dbb Ulrich Silberbach bu w swojim zastojnstwje wobkrućeny. 61lětny dósta na dźěłarnistwowym dnju dbb wčera w Berlinje 404 hłosy. Za napřećiwneho kandidata Silberbacha, předsydu Němskeho zwjazka realnošulskich wučerjow Jürgena Böhma hłosowaše 206 wólbokmanych.
Silberbach kritizowaše přiběracy njedostatk personala pola komunow, krajow a Zwjazka. Wón namołwi dbb k přezjednosći a zhromadnemu zasadźenju. „Politika wobzamknje nadawki bjez kónca, kóždy dźeń znowa a njewěmy, kak mamy je zmištrować“, wón wuzběhny. Hladajo na tuchwilne połoženje žadaše sej wón wjace personala za zjawnu słužbu.
Zhromadnje z dźěłarnistwom ver.di zastupuje dbb miliony přistajenych komunow, krajow a Zwjazka w tarifowych jednanjach. 24. januara zahaji so přichodne koło, při čimž žadaja sej dźěłarnistwa 10,5 procentow wjace mzdy.
Kupa z tójšto problemami
We Wulkej Britaniskej kopja so krizy a rozměry su dale a wjetše
London (dpa/SN). Brexit, koronapandemija, wójnske sćěhi a stajna změna na čole knježerstwa. Britojo so z krizami jara derje wuznaja. Mjeztym so lěto 2022 nachila a ćeže na kupje maja dale a wjetše rozměry.
Hospodarske połoženje je tak špatne kaž hižo dołho nic. Recesija je so oficialnje zahajiła, inflacija wučinja wjace hač jědnaće procentow, realne mzdy spaduja. Financny minister Jeremy Hunt chce z něhdźe 55 miliardami puntow (63 miliardow eurow) přez zwyšenje dawkow a skrótšenje wudawkow tuchwilu prózdnu kasu napjelnić. Přez zymu chce knježerstwo płaćizny za milinu a płun wobmjezować.
