Podpěra za serwisowy běrow
Jednanja wo sakskim etaće 2023/2024 a z toho rezultowace polěpšenja za skutkowanje Serbskeje rady w Sakskej běchu někotre z temow, z kotrymiž je so gremij wčera zaběrał.
Drježdźany (SN). Čłonojo Rady za serbske naležnosće w Sakskej su swoje poslednje lětuše posedźenje wčera w Sakskim krajnym sejmje mjez druhim za to wužiwali, zo bychu sej přehlad wo dźěławosći za serbske prašenja přisłušneho fachoweho referata w statnym ministerstwje za wědomosć, kulturu a turizm (SMWKT) tworili, kaž gremij zdźěli.
Referentaj Stanisław Brězan a dr. Madlena Malinkec kaž tež nawodnica referata Dagmar Friede rozprawjachu wo nadawkach referata mjez druhim jako narěčenski partner w serbskich prašenjach za druhe ministerstwa, w zhromadnym dźěle ze Załožbu za serbski lud, při zestajenju rozprawy wo połoženju serbskeho ludu w swobodnym staće a na dalšich polach. Najwjetši projekt, kotryž ze stron knježerstwa hłownje tu wobdźěłaja, je tuchwilu Serbski forum wědy při Lawskich hrjebjach w Budyšinje.
Dyrbi podłožki předpołožić
Washington (dpa). Najwyše sudnistwo USA je puć za wudawanje dawkowych podłožkow něhdyšeho prezidenta Donalda Trumpa na kongresowy wuběrk zrunało. Supreme Court wotpokaza wčera próstwu Trumpowych prawiznikow, posrědkowanju dawkowych dokumentow zadźěwać. Republikan bě so přez lěta po prawniskim puću wudawanju podłožkow wobarał a nětko na najwyšim městnje zwrěšći.
Domowy tarif wujednali
Langenhagen (dpa). Po wjace hač 16 hodźinach intensiwnych jednanjow je Volkswagen po swójskich podaćach dźensa rano zakónčenje dojednanjow wo domowym tarifje docpěł. Dźěłarnistwo IG metal bě sej za něhdźe 125 000 tarifowych přistajenych zwyšenje mzdy wo wosom procentow žadało, podlěšenje tarifoweho zrěčenja wo starobnym dźělnym času, wjace swobodnych dnjow za čłonow dźěłarnistwa, kaž tež přewzaće semesterskich popłatkow za dualnje studowacych w předewzaću.
Wotćahnu wójsko z Malija
Korona-naprawy zdźěla nic po płaćiwym prawje
Lipsk (dpa/SN) Zwjazkowe zarjadniske sudnistwo je so prěni raz z prawosću korona-naprawow na spočatku pandemije zaběrało. Kontaktne wobmjezowanja w Sakskej běchu po prawje, zakaz wuchoda w Bayerskej pak nic. Tak rozsudźichu sudnicy wčera w Lipsku. Rozestajenje z maćiznu bě jim wěsta premjera. Wusudy płaća jako směrnicy nastupajo dalše podobne pady.
Sakske postajenja wobjimachu kontaktne wobmjezowanja, zawrjenje sportowych městnosćow a gastronomiskich zawodow. W padźe Bayerskeje bu striktny zakaz wuchoda pruwowany, kotrež dowoli wopušćenje bydlenja jenož „w nuznych padach“. Hižo w předchadnej instancy bě zarjadniske sudnistwo rozsudźiło, zo tuta naprawa přiměrjena njebě.
Sudnicy zwjazkoweho zarjadniskeho sudnistwa wopodstatnichu we woběmaj padomaj wusudy předchadneje instancy a wotpokazachu rewizije krajow přećiwo tomu.
Liči z přihłosowanjom unije
Berlin (dpa/SN). Šef CDU Friedrich Merz liči po kompromisu z amplowej koaliciju z tym, zo wot unije wobknježene kraje nětko wobydlerskemu pjenjezej přihłosuja. W posrědkowanskim wuběrku zwjazkoweho sejma a zwjazkoweje rady su so na kompromis dojednali. „Na tym njedwěluju“, wuzběhny předsyda CDU wčera w Berlinje. W jednanjach su so z potrjechenymi krajemi derje wothłosowali. Frakcija unije chce po jeho podaćach hišće dźensa wječor na wosebitym posedźenju wo móžnym rozsudźe posrědkowanja wuradźować.
Šef krajneje skupiny CSU Alexander Dobrindt zwurazni, zo nochcedźa wuslědk posrědkowanskeho wuběrka hnydom přiwzać, dokelž chcedźa móžnosć diskusije měć. „Ale přihotujemy so na to, zo móžemy potom tež w zwjazkowym sejmje rozsud wo tutym wuslědku tworić“, wuswětli wón hladajo na móžne přihłosowanje w posrědkowanskim wuběrku.
Branša ćerpi
Wiesbaden (dpa/SN). W Němskej dale a mjenje bydlenjow twarja. W septembru zamołwite zarjady 27 449 próstwow wo nowe bydlenje přizwolichu, zdźěli minjeny pjatk Zwjazkowy statistiski zarjad ze sydłom we Wiesbadenje. To je 9,1 procent mjenje hač loni w samsnym měsacu. Z tym zesylnja so negatiwny trend z předchadźacych měsacow. Po dźewjeć měsacach je ličba dowolnosćow z 272 054 nětko wo 3,7 procentow spadnyła.
Předewšěm jednoswójbne domy so mjenje twarja. Tam registrowachu statistikarjo spad wo 11 173 domow, štož wučinja něhdźe 15,4 procenty. Jedna přičina toho je, zo wuběži naprawa twarskeho pjenjeza za dźěći.
Ličba twarskich dowolnosćow je hladajo na pobrachowace bydlenja w mnohich městach wažny indikator. Dale pak je połoženje napjate, dokelž so dowolene bydlenja husto hnydom njetwarja, dokelž nimaja rjemjeslnicy a twarske firmy žane kapacity. Tež stupace płaćizny za twaršćizny a twarsku pódu situaciju přiwótřa. Nimo toho poćežuje domjacnosće a twarsku branšu energijowa kriza a inflacija. Nadawki woteběraja a twarske kóšty stupaja. Tuž wjele ludźi nadawki najprjedy raz cofnu a přesunu.
To a tamne (23.11.22)
Wosebje kipry hodowny štom před sławnej cyrkwju Našeje knjenje w Drježdźanach tuchwilu rozhorjenosć wubudźi. W socialnych medijach so ludźo štoma wusměšuja a maja jón za hańbu. Někotři ludźo su samo měnjenja, zo jedna so wo recyclowany štom. Tola za štomom tči chutny pozadk. Šmrěk wotbłyšćuje situaciju w sakskich lěsach, hdźež je suchota zachadźała a mjez druhim tež lěsne wohenje zawinowała. Organizatorojo wikow su so wědomje za regionalny štom ze sakskeho lěsa rozsudźili. Mjeztym su na šmrěku přidatne hałužki připrawili a jón hodownje wupyšili.
Sportowe črije Michaela Bloomberga, bul za kopańcu Rudyja Giulianija a wobćežowak Davida Dinkinsa: Milionowa metropola New York přesadźuje něhdźe 50 darow, kotrež su měšćanosća města w zašłych lětdźesatkach dóstali. Dary měšćanostow New Yorka słušeja mjenujcy městu a njesmědźa so po kóncu zastojnstwa sobu domoj wzać. Awkcija traje hišće hač do 11. decembra.
„Zerničku“ na adwentničce předstaja
Premjera nowych ewangelskich spěwarskich „Zernička“ budźe 2. adwenta w Budyšinje. Wo tym je Serbski wosadny zwjazk informował. Před štyrjomi lětami zrodźichu mysl za projekt.
Budyšin (SN). Nowe serbske ewangelske spěwarske „Zernička“ změja na druhej adwentnej njedźeli na Michałskej farje w Budyšinje swoju premjeru. Po kemšach w 14.30 hodź. w Michałskej cyrkwi předstaji so na slědowacej adwentničce zběrka z wjace hač sto načasnymi kěrlušemi kaž tež z modlitwami za dźěći a młodźinu zjawnosći. Mjez druhim předleži w „Zerničce“ znaty němski kěrluš „Von guten Mächten“ Dietricha Bonhoeffera prěni raz w hornjoserbskim přełožku. Ilustrowała je „Zerničku“ w Serbach znata grafikarka a molerka Jutta Mirtschinowa. Podate gitarowe akordy kaž tež přimkowa tabulka zmóžnja lochki instrumentalny přewod kěrlušow.
„Spěwnik budźe w přichodźe naše swójbne dźěło wobohaćić“, rjekny njedawno předsyda Serbskeho ewangelskeho towarstwa (SET) Mato Krygaŕ w tutej nowinje wo nowych spěwarskich, kotrež chcedźa zaměrnje tež na zarjadowanjach za swójby wužiwać.
Mnohotnosć idejow wuznamjenili
Pytaja za zasypanymi
Jakarta (dpa/SN). Dźeń po zahubnym zemjerženju na indoneskej kupje Java je rozměr škodow dźeń a jasniši. Po informacijach tamnišich zarjadow je znajmjeńša 162 ludźi zemrěło. Sta dalšich su zdźěla ćežko zranjeni. Wjele domow so sypny, nimo toho dóńdźe k zesunjenju zemje. Ličba woporow móhła tohodla hišće dale stupać. Hač je hišće zasypanych mjez rozpadankami njeje jasne.
Winowatosć snano wuběži
Berlin (dpa/SN). Winowatosć za personal w chorownjach a hladarnjach so přećiwo koronje šćěpić dać ma prawdźepodobnje kónc lěta wuběžeć. Přičina je dominanca wosebitych korona-wariantow, rěkaše wčera ze stron zwjazkoweho strowotniskeho ministerstwa. Tute rozbudźaki móža so imunosći ludźi, kotřiž su šćěpjeni a/abo wustrowjeni, lěpje wuwinyć hač jich předchadnicy. Zwjazkowy minister za strowotnistwo Karl Lauterbach (SPD) njeje so konkretnje wuprajił, hač na zarjadnišćo poćahowaca so winowatosć šćěpjenja wuběži abo podlěši, a chcyše nazymu a zymu wočaknyć.
Namołwja Zelenych a SPD
Wolóženja wot januara planowane
Berlin (dpa/SN). Płunowe płaćizny za wobydlerjow a předewzaća maja so hižo wot januara wobmjezować. Poprawom bě tole hakle wot měrca hač do nalěća 2024 předwidźane. Kaž z předležaceho zakonskeho naćiska wuchadźa, ma so za měsac měrc zwěsćena suma wolóženja za měsacaj januar a februar přewzać.
Planowane je tajke wobmjezowanje tež nastupajo płaćizny za milinu. Zwjazkowe knježerstwo reaguje z tym na sylnje stupace energijowe płaćizny a chce poćeženja za priwatne domjacnosće a předewzaća trochu złahodnić. W prěnjej kročeli běštej zwjazkowy sejm a Zwjazkowa rada jónkrótne płaćenje w decembrje wobzamknyłoj. Zwjazkowe knježerstwo je hladajo na wobmjezowanja płaćiznow fachowu komisiju zasadźiło.
Planowane wolóženja za industriju su na wuměnjenja wjazane. Tak njesmědźa so za čas naprawy stabilizacije zasadnje žane diwidendy wupłaćić, rěka w naćisku zakonja.
