Póšta z ćežemi
Wočakuja hišće hórše połoženje
To a tamne (03.11.22)
Pjeć lawow je so w zwěrjencu awstralskeje metropole Sydney krótkodobnje ze swojeho hajnišća zminyło. K „nuzowej situaciji“ je wčera rano dóšło, zdźěli zwěrjenc Taronga. Dorosćeny law a štyri młodźata su z terena ćeknyli. Krótko po tym su sobudźěłaćerjo zwěrjenca rubježne zwěrjata bjezposrědnje w bliskosći našli a móžachu je bjez wulkich ćežow zaso do za nje postajeneho hajnišća wjesć.
Nowa družina mórskeho raka nosy přichodnje mjeno politikarki Lěwicy Sahry Wagenknecht. Wědomostne pomjenowanje čerwjeneho raka jako cherax wagenknecht je zwěrjeću Christian Lukhaup z Waiblingena pola Stuttgarta spožčił, kiž bě zwěrjo při přebywanju w Indoneskej prěni raz našoł. Politikarka bě jeho inspirěrowała, wón swój rozsud wopodstatni.
Netanjahu před wuspěchom
Tel Aviv (dpa/SN). Israelski prawicarskokonserwatiwny nawoda opozicije Benjamin Netanjahu je swój wuspěch při wólbach parlamenta jako „dobry spočatk“ hódnoćił. Doskónčny wukónc wólbow pokaza pak so hakle po wuličenju wšitkich hłosow, rjekny předsyda strony Likud wčera wječor na zetkanju z přiwisnikami. Dotal pak cyle za tym wupada. Přiwisnicy strony Likud běchu do wólbow wo pozdatnych pospytach sfalšowanja rěčeli.
Frederiksen wotstupi
Kopenhagen (dpa/SN). Danska ministerska prezidentka Mette Frederiksen je po wčerawšich wólbach parlamenta připowědźiła, zo chce hišće dźensa próstwu wo wotstup knježerstwa kralownje Margrethe II. zapodać. To zdźěli 44lětna dźensa rano před přiwisnikami strony w Kopenhagenje, hačrunjež bě jeje zwjazkarstwo při wólbach w poslednjej mjeńšinje tola hišće prawdźepodobnu wjetšinu dóstało.
Chce chorownje podpěrać
Wuradźuja wo wolóženjach
Berlin (dpa/SN). Do rozmołwow wo financowanju wolóženjow w zwisku z inflaciju a energijowej krizu je Zwjazk napřećo krajam zrozumjenje signalizował. Kaž z předłohi wobzamknjenja za dźensnišu konferencu krajowych šefow ze zwjazkowym kanclerom Olafom Scholzom (SPD) wuchadźa, poskića zwjazkowe knježerstwo wjace pjenjez za zjawny bliskowobchad kaž tež za přiwzaće a integraciju ćěkancow. W srjedźišću rozmołwow pak steja plany Zwjazka, naposledk enormnje stupace płaćizny za płun a milinu wobmjezować. Wobě stronje stej sej přezjednej, zo měłoj so dźensa skónčnje dojednać. Na minjenym zetkanju spočatk oktobra běchu so Zwjazk a kraje bjez wuslědkow rozešli.
Hessenski ministerski prezident Boris Rhein (CDU) chce, zo zwjazkowe knježerstwo nětko winowatosć přewza. „Zwjazk dyrbi so dźensa pohibować, zo móhli dojednanje docpěć“, wón redakciskej syći Němskeje (RND) rozłoži.
Stawačkojo sprawa
To a tamne (02.11.22)
Dokelž je so šoferka awta minjeny pjatk w Badensko-Württembergskej wulkeho pawka nabojała, je wona policiju zawołała. Wona trjeba nuznje pomoc a njemóže hižo dale jěć, 33lětna rozprawješe. Zastojnicy přepytowachu jeje awto, ale zwěrjo njenańdźechu. Wočiwidnje pak je to dosahało, žonu změrować, wšako móžeše po tym dale jěć.
Bywši britiski strowotniski minister Matt Hancock wobdźěli so na britiskim wudaću telewizijneho dźungloweho campa. Tohodla jeho nětko z frakcije konserwatiwneje strony wuzamknychu. Simon Hart z wjednistwa frakcije wčera wuswětli, zo je naležnosć chutna. Dokładne wopodstatnjenje wón njemjenowaše. Kritikarjo Hancockej wumjetuja, zo chce z wustupom swój image ponowić. Wón zasłuži přidatne pjenjezy, město toho zo by so wo swojich wolerjow starał.
Žane nowe dopóznaća zwěsćili
Zapalerstwo na Budyski Sprjewiny hotel dale dokładnje přepytuja
Budyšin (dpa/SN). Po zapalerstwje na planowany dom za požadarjow azyla w Budyšinje njeje hladajo na přepytowanja krajneho kriminalneho zarjada (LKA) žanych nowych dopóznaćow. Politiski ćišć je mjeztym wysoki, přiwšěm móže hišće něšto dnjow trać, doniž nowe detaile njepředleža, wuswětli rěčnik LKA wčera powěsćerni dpa. Mjeztym su njeznaći tež w Lipsku přebywanišćo nadběhowali. Tež tam njemóže policija politiski motiw wuzamknyć. Tak su skućićeljo w Neukieritzschu w Lipšćanskim wokrjesu praskotak na ležownosć přebywanišća ćisnyli. Na zbožo so nichtó njezrani. Tež dom njeje wobškodźeny.
Lajkow sylnišo zapřijeć
Bonn (B/SN). Bamž Franciskus je swětowy synodalny proces wo lěto podlěšił, zo bychu so lajkojo sylnišo do wuradźowanjow zapřijeli. Žurnalist katolskeje powěsćernje Christoph Paul Hartmann wočakuje, zo bychu so tež tajke temy kaž seksualita, namóc, róla měšnikow a žonow we wobłuku swětoweje cyrkwje wobjednali. Kaž pak wón wobkedźbuje, ma bamž na tajkej diskusiji lědma zajim.
Wólbu njepřipóznał
Rom (B/SN). Hižo w awgusće su mniša w Montecassino Němca Mauritiusa Wilde jako 193. naslědnika Benedikta z Nursije wuzwolili. W tutym klóštrje bě swjaty Benedikt rjadniske prawidła žiwjenja napisał. Dokelž chce bamž sam postajić, štó ma abt być, njeje wón wólbu připóznał. Wot lěta 2014 njepodsteja wokolne wosady wjace klóštrej a wólba abta maja so wot bamža wopodstatnić.
Bamž na narodninach
Bolsonaro wólby přěhrał
Brasília (dpa/SN). Po tym zo je Luiz Inácio Lula da Silva wólby w Brazilskej dobył, hotuje so jeho team na to, knježerstwo přewzać. „Nadźijam so, zo změjemy w Brazilskej zaso normalitu“, rjekny dźensa předsydka dźěłaćerskeje strony a nawodnica wólbneje kampanje Gleisi Hoffmann. „Změna knježerstwa je zakonsce rjadowana. To nam přepodaće zmóžnja“. Wotwoleny prezident Jair Bolsonaro swoju poražku njepřizna a njeje tuchwilu k docpěću.
Wólby w Danskej zahajene
Kopenhagen (dpa/SN). W Danskej su dźensa wólby parlamenta zahajili. Wjace hač štyri miliony wólbokmanych maja składnosć, swoj hłos wotedać. Prěnje prognozy wočakuja tam bjezposrědnje po zawrjenju wólbnych lokalow. Kaž hižo při minjenych wólbach w lěće 2019 budu prawdźepodobnje socialdemokraća ministerskeje prezidentki Mette Frederiksen najsylniša móc. Mjenje jasne porno tomu je, kak budu poměry mjez stronami wupadać.
Žito dale transportuja
