Bustu molerja wotkryli
Chce poćahidale redukować
Berlin (dpa/SN). Dla kruteho postupowanja iranskich zarjadow přećiwo tamnišemu protestnemu hibanju chce Němska swoje poćahi z Teheranom dale wobmjezować. Njeje žane „dale tak“ w bilateralnych poćahach móžne, zdźěli wčera zwjazkowa wonkowna ministerka Annalena Baerbock (Zeleni). Nastupajo na runinje EU wobzamknjene sankcije maja so přidatne narodne zapućowanske wobmjezowanja postajić. Tak a tak hižo wobmjezowane hospodarske kontakty maja so dale redukować, tež hladajo na hišće wobstejace poćahi z iranskimi bankami.
Wuskutk masowych protestow w Iranje bě smjerć 22lětneje Mahsa Amini. Policija bě ju zajała, dokelž njeje jeje drasta islamskim předpisam wotpowědowała. Młoda žona 16. septembra w policajskej jatbje zemrě. Wot toho časa sem demonstruja po cyłym kraju tysacy přećiwo represiwnemu kursej knježerstwa kaž tež islamskemu knježerstwowemu systemej. Protestow dla buchu po informacijach iranskich statnych medijow wjacore sta ludźi wobskoržene. Štyrjom wosobam samo „wójnu přećiwo Bohej“ wumjetuja, čehoždla hrozy jim smjertne chłostanje.
To a tamne (27.10.22)
W Sakskej dale mało šćěpjenych
Drježdźany (dpa/SN). Sakska steji w cyłoněmskim přirunanju najebać wšěch prócowanjow a namołwow přeco hišće na poslednim městnje nastupajo šćěpjenje přećiwo koronawirusej. Dotal je po šćěpjenskim monitoringu Roberta Kochoweho instituta hakle 66,3 procentow wobydlerstwa znajmjeńša jónu šćěpjenych. Tež nastupajo druhe šćěpjenje kaž tež wobnowjenje tutoho leži Sakska procentualnje cyle zady – w absolutnych ličbach pak w delnim srjedźnym polu. Po statistice, kotraž bu zawčerawšim wozjewjena, je 65 procentow wobydlerstwa zakładnje imunizowanych a ma nimo prěnjeho a druheho šćěpjenja tež třeće šćěpjenje. W Budyskim wokrjesu leži incidenca dźensa pola 356,4. W Zhorjelskim wokrjesu mjenowaše RKI dźensa incidencu 274,7.
Hladajo na dalše wuwiće wabi Sakska ministerka za strowotnistwo Petra Köpping (SPD) dale za škit šćěpjenja přećiwo koronje. „Pandemija njeje nimo“, wona wuzběhny. Köpping je so dźensa k štwórtemu razej šćěpić dała.
Žony měli widźomniše być
Drježdźany (SN). Sakska chce žónske dorostowe nawodne mocy podpěrać, zo bychu so zaměrnje na nadawki nawjedowanja přihotowali. Tomu słuži lěto trajacy pilotowy program „Sakska digitalna – Ze žonami w načolnistwje“. Wusměrjene je wón na wony žónski personal, kotryž wotpohladuje w bliskim přichodźe nawjedowansku zamołwitosć we wobłuku digitalneje transformacije přewzać. Program skići žonam móžnosć, so intensiwnje z temami nawjedowanja specielnje w IT-branši zaběrać, so z druhimi wuchadźišćemi a perspektiwami zeznajomić, nowe zabrać a so z kmótrami a dalšimi wobdźělnicami do zaměrneje wuměny podać. Społnomócnjena sakskeho knježerstwa za digitalne, statna sekretarka Ines Fröhlich, mjenuje to nastupajo njedostatk fachowcow a nawodnych mocow „wažnu naležnosć, zo budu žony we wobłuku digitalneje transformacije widźomniše a zo wone wjace nadawkow wokoło nawjedowanja přewozmu“.
Zajimče móža so hač do 21. nowembra 23.59 hodź. pola Digitalneje agentury Sakskeje w Drježdźanach resp. pod emailowej adresu požadać.
Konop legalizować?
Berlin (dpa/SN). Něšto dnjow po wozjewjenju prěnich detailow k planowanej legalizaciji konopje w Němskej chce zwjazkowy minister za strowotnistwo Karl Lauterbach (SPD) dźensa zwjazkowemu kabinetej hłowne dypki k tomu předpołožić. To pak njeje hišće konkretny naćisk zakonja. Tak rěka w naćisku na přikład, zo nima so přichodnje hižo přiswojenje a wobsydstwo mnóstwa 20 do 30 gramow k swójskemu konsumej, njewotwisnje wot konkretneho podźěla a pochada THC, chłostać.
Na kompromis so dojednali
Berlin (dpa/SN). Zwjazkowy kabinet je so w zwadźe nastupajo Chinu a kontaineroweho terminala w Hamburgskim přistawje dorozumił. Chinski koncern Cosco smě so na terminalu jenož ze 24,9 procentami, město planowanych 35 procentow, wobdźělić. Kompromis je w amplowej koaliciji dwělomny. Njedawnych nazhonjenjow z Ruskej dla a wotwisnosće wot dodawanja płuna je so politiska zwada wuwiła. Zwjazkowy hospodarski minister Robert Habeck (Zeleni) warnowaše před nowymi wotwisnosćemi.
Němska banka z dobytkom
Na krótkodobnym wopyće wčera w Kijewje dyrbješe so zwjazkowy ...
Směrnica podpěruje digitalizaciju
Drježdźany (SN/dpa). Wjace šulerkow a šulerjow ma so za wukubłanje abo studij w branši informaciskeje technologije motiwować. Na to měri so nowa spěchowanska směrnica „Iniciatiwa digitalna šula Sakska“, na kotruž je so sakski kabinet wčera dorozumił. „Ze spěchowanjom chcemy šulerki a šulerjow na wočakowane přeměnjenje dźěłoweho swěta přez digitalizaciju přihotować. Nimo toho ma so z tym njedostatk fachowcow w powołanjach informaciskeje technologije wotpopadnyć“, wopodstatnja kultusowy minister Christian Piwarz (CDU) spěchowanje. Ze směrnicu hodźa so šulske a zwonkašulske projekty a poskitki z wobłukow informatiki, robotiki a programěrowanja spěchować. Štyri miliony eurow steja po zdaću lětnje k dispoziciji. Šule w zjawnym a swobodnym nošerstwje móža próstwu wo spěchowanske srědki runje tak stajić kaž towarstwa, zwjazki, załožby abo wysoke šule. Wosebje šulerkam a šulerjam we wjesnych kónčinach ma so přistup k temam kołowokoło informatiki na zwonkašulskich wuknjenskich městnach zmóžnjeć.
