Zelenskyj: Rusku terora dla zasudźić
Kijew (dpa/SN). Ukrainski prezident Wolodymyr Zelenskyj je swět namołwjał, Rusku jako statneho podpěraćela terorizma zasudźić. Nichtó na swěće njeinwestuje wjace do terorizma hač Ruska, rjekny Zelenskyj minjenu nóc w swojim widejowym poselstwje. Tole žada sej wotmołwu na globalnej runinje: Rusku měli jako statneho sponsora terorizma zastopnjować, sej wón žadaše. W USA su senatorojo hižo wotpowědnu rezoluciju nastorčili. Woni chcyli Rusku na lisćinu terorizm podpěrowacych krajow sadźić, na kotrejž steja tuchwilu Syriska, Iran, Kuba a Sewjerna Korea. Zelenskyj rozprawješe wo zetkanju ze stabom najwyšeho rozkazowarstwa ukrainskeje armeje. Tam rěčachu wo trěbnych brónjach a wo zwoprawdźenju plana zakitowanja Ukrainy.
Samsny čas je Ruska wčera „cyły rjad strategisce bjezzmysłowych a brutalnych nadpadow na Donbas“ přewjedła. Tež w stolicy Kijewje rujachu jenož prěnju połojcu dnja štyri króć sireny powětroweho alarma dla. Ruska je wjacore města zwonka Donbasa wobtřělała.
To a tamne (29.07.22)
Wjacore kilogramow mjasa su cłownicy na Mnichowskim lětanišću sćazali. Wulkoswójba, kotraž bě z afriskeho Toga přilećała, měješe sydom kilogramow mjasa w swojich kófrach, nimo toho howjazu kožu, kopyta a zuby, cłowny zarjad zdźěla. Mjaso bě hižo połne insektow. Cłownicy je sćazachu, zo móhli je zničić.
Dospołnje nahi je pjany pacient intensiwneje stacije w posaarskim Sulzbachu chorownju wopušćił a tak zasadźenje policije zawinił. Jako zastojnicy jeho nańdźechu, dowjezechu jeho do jastwa, dokelž předležeše wukaz zajeća. Lěkar bě zastojnikow informował, zo je so pacient zminył, byrnjež jeho alkohola dla lěkować dyrbjeli. Nahi pacient bě spěšnje namakany, dokelž bě w swojim kostimje kedźbnosć ludźi zbudźił. „W jastwje dóstanje wón nowu drastu“, policija piše. Přičina zajeća njeje znata.
Dań widźomnje zwyšena
Washington (dpa/SN). Měnowa banka USA ze swojim agresiwnym kursom přećiwo spěšnje přiběracej inflaciji w kraju z dalšim kedźbnosć zbudźacym krokom pokročuje: Druhi króć zasobu je Fed wčera wječor wodźacu dań wo 0,75 procentow zwyšiła. Nawoda banki Jerome Powell dalše zwyšenje njewuzamkuje. W USA so přiběrajcy wulkeje hospodarskeje krizy boja. Dań ma kredity podróšić a tak naprašowanje za nimi podusyć.
Baerbock w Athenje a Istanbulu
Berlin (dpa/SN). Wonkowna ministerka Annalena Baerbock je so dźensa na tři dny trajacy wopyt do Grjekskeje a Turkowskeje podała. W Athenje wočakowaštaj politikarku Zelenych ministerski prezident Kyriakos Mitsotakis a wonkowny minister Nikos Dendias. W Turkowskej su jutře rozmołwy z wonkownym ministrom Mevlütom Çavuşoğluwom planowane. W srjedźišću rozmołwow steji wójna Ruskeje přećiwo Ukrainje a jeje sćěhi.
Ratarscy ministrojo wuradźuja
Ze spektakularnej akciju su burja w Nižozemskej wčera přećiwo ...
Zelenskyj skića EU milinu
Woheń so dale rozpřestrěł
Blinken a Lawrow chcetaj so zetkać
Washington (dpa/SN). Prěni króć po ruskim nadpadźe na Ukrainu chce wonkowny minister USA Antony Blinken přichodne dny ze swojim ruskim kolegu Sergejom Lawrowom rěčeć. Při tym chcetaj wo pušćenju ameriskeje basketbuloweje sportowče Brittney Griner a jeje krajana Paula Whelana rěčeć, Blinken na nowinarskej konferency připowědźi. Knježerstwo USA bě Moskwje hižo před tydźenjemi „substancielne namjety“ předpołožiło. Amerisku sportowču běchu 17. februara na Moskowskim lětanišću Šeremetjewo zajeli, dokelž měješe wona drogi při sebi. Griner argumentowaše, zo wužiwa marihuanu jako lěkarski srědk přećiwo bolosćam. USA kritizuja, zo bě proces přećiwo njej politisce motiwowany.
Paula Whelana, kiž ma wjacore staćanstwa, běchu 2018 w Ruskej zajeli, wumjetujo jemu spionažu. W juniju 2020 zasudźichu jeho k 16lětam jastwa z móžnosću, čas w dźěłowym lěhwje přetrać. Whelan kritizowaše sudniski proces jako politisku inscenaciju. Poměr mjez Ruskej a USA je chětro napjaty.
Nowe srědki přećiwo hłodej
Pomocny skutk „Chlěb za swět“ žada sej raznu změnu ratarskeje politiki
Berlin (dpa/SN). Hladajo na swět wopřijacu krizu hłodu dla žada sej ewangelski pomocny skutk „Chlěb za swět“ dale zwyšenje statneje pjenježneje pomocy kaž tež zasadnu změnu dotalneje ratarskeje politiki. „Nimo wójny, inflacije a korony słuša skepsana ratarska politika k najwjetšim zawinowarjam zežiwjenskeje krizy“, skoržeše prezidentka organizacije Dagmar Pruin wčera w Berlinje.
Hižo nětko trada po najnowšich informacijach Swětoweje hłodoweje pomocy UNO po wšěm swěće 828 milionow ludźi hłód. Zjednoćene narody su hakle njedawno před najwjetšej hłodowej krizu minjenych lětdźesatkow warnowali, dokelž je ruski nadpad na Ukrainu eksport žita přidatnje masiwnje haćił.
Žně hromaka njespokojace
Podstupim (dpa/SN). Plahowarjo hromaka a truskalcow w Braniborskej maja njerjanu sezonu za sobu. Lětuši wunošk žnjow hromaka je z 18 100 tonami najniši po lěće 2015, Berlinsko-braniborski statistiski zarjad zdźěla. Płonina za plahowanje hromaka bě lětsa z něhdźe 3 800 hektarami runje tak wulka kaž minjene lěta. Při wšěm je wunošk žnjow wo 14 procentow na 18 100 tonow woteběrał. Ratarjo skorža špatneho wobrota a zlutniwych kupcow dla. W lońšej sezonje běchu hišće 21 500 tonow tuteje zeleniny w Braniborskej nakałali. Zwjazkowy kraj je najwjetši plahowar hromaka we wuchodnych zwjazkowych krajach.
Tež žně truskalcow njeběchu spokojace, ratarjo skorža. Płonina plahowanja pod hołym njebjom bě lětsa z 220 hektarami wo 90 hektarow mjeńša hač loni. Tak mało płoniny za truskalcy mějachu naposledk 1998. Wunošk na hektar wšak bě wo 17 procentow lěpši hač 2021.
Płonina za plahowanje słónčnych róžow je lětsa wo 16 600 na 29 600 hektarow rozrostła, dokelž je import wolija słónčnych róžow z Ukrainy wójny dla masiwnje woteběrał, zarjad zdźěla.
To a tamne (28.07.22)
Pjenjezy na dróze leželi su předwčerawšim, wutoru, w sewjerorynsko-westfalskej gmejnje Kranenburg. Swědcy informowachu policiju, zo je dróha mjez Kranenburgom a Gochom połna pjenjez. Zastojnicy zwěsćichu, zo jedna so wo napodobnjene pjenjezy, kotrež wužiwaja w dźiwadle abo filmach: Mały nalěpk na bankowkach tole přeradźa. Wotkal pjenjezy pochadźeja, njeje znate.
Z awtom nana a bjez jězbneje dowolnosće je 17lětny w Berlinje-Spandauwje spytał, so policajskej kontroli wuwinyć. Policisća chcychu awto kontrolować, młodostny pak jědźeše dale. Na ćěkancy ignorowaše wón wjacore čerwjene ample, smaleše na chódniku a by skoro žonu přejěł. Jězba skónči so w slepej hasy. Třo sobujěducy w starobje 16 a 17 lět spytachu ćeknyć, buchu pak dosahnjeni. Šofera policija nachwilnje zaja.
