Znowa „test warnowanja“
Berlin (dpa/SN). Po wšej Němskej chcedźa 8. decembra znowa test warnowanja přewjesć. Z tym chcedźa tež móžne njedostatki systema wotkryć. Tole staj prezident Zwjazkoweho zarjada za škit wobydlerjow a za pomoc w padźe katastrofy Ralph Tiesler a zwjazkowa nutřkowna ministerka Nancy Faeser (SPD) wčera zdźěliłoj. W decembru chcedźa prěni króć testowe warnowanje najwyšeho schodźenka mobilnym telefonam pósłać a tak zwěsćić, kak system funguje.
Při prěnim wšoněmskim warnowanskim dnju 10. septembra 2020 bě so něštožkuli nimo kuliło. Tak su někotři informaciju z połhodźinskim zapozdźenjom dóstali, sireny njeběchu fungowali. Zwjazkowe nutřkowne ministerstwo rěčeše tehdy wo „zwrěšćenym“ probowym alarmje. W septembrje 2021 planowany warnowanski dźeń běchu wotprajili, zo bychu so na 2022 přihotowali.
Atentatnicy počesćeni
Dalše brónje Ukrainje přilubjene
Washington (dpa/SN). Knježerstwo USA chce wot Ruskeje nadpadnjenej Ukrainje dalše brónje přewostajić. „W běhu tutoho tydźenja chce knježerstwo přichodny paket brónjow a techniki prezidenta za Ukrainu wozjewić“, rjekny direktor za komunikaciju narodneje wěstotneje rady w Běłym domje John Kirby nowinarjam. Paket ma mjez druhim rakety mjetacy system Himars wopřijeć, kiž su Ukrainjenjo hižo dosć efektiwnje zasadźili. Nimo toho chcedźa municiju za Himars a artileriju pósłać, Kirby zdźěli.
Knježerstwo USA chce „tež přichodnje wšitke plany Ruskeje wotkryć, zo by swět zhonił, zo je kóžda pozdatna aneksija wotpohladna, ilegalna a njesprawna“, wón praji. Wot Ruskeje zasadźene „marionety a zastupnicy“ w kónčinach Ukrainy, kotrež steja pod kontrolu Ruskeje, dyrbja ze sankcijemi ličić. Zakitowanski minister Lloyd Austin chce hišće tutón tydźeń posedźenje kontaktneje skupiny Ukrainy dla zwołać. Wón z tym liči, zo tež dalše kraje wojersku pomoc na dobro Ukrainy přinošuja.
Kühnert: Zrudna wěrnosć
Generalny sekretar SPD warnuje před zawrjenjom ruskeho płunowoda
Berlin/Drježdźany (dpa/SN). Dołhodobne zawrjenje płunowoda Nord Stream 1 w Baltiskim morju by Němsku po słowach generalneho sekretara Kevina Kühnerta wo wjele raznišo trjechiło hač ruskeho prezidenta Wladimira Putina. Zwjazkowe knježerstwo je wšitko za to činiło, zo „njeby Ruska žadyn techniski argument přećiwo tomu měła, płunowód zaso aktiwizować, tež přez zasadźenje w Kanadźe porjedźeneje turbiny k zhusćenju płuna“, rjekny politikar SPD wčera w rozhłosu. Nichtó pak „nochcył ruku do wohenja połožić za politiske mocy we wokolinje Wladimira Putina“, Kühnert wobmjezujo doda. Najwjetša starosć Němskeje tuchwilu je, zo Ruska po zakónčenju planowanych dźěłow płunowód Nord Stream I wjace njeaktiwizuje a płunowy honač doskónčnje zawjertnje.
Prěnje tanki USA za Pólsku
Waršawa (dpa/SN). Pólska je z USA prěnje z cyłkownje 366 bojowych tankow typa Abrams dóstała. 28 trjebanych tankow je na wojerskim zwučowanišću pólskeho wójska dojěło, piše zakitowanski minister Mariusz Błaszczak w interneće. Wukubłanje wojakow chcedźa přichodny čas zahajić. „Smy zwólniwi, hdyž nam prěnich 250 cyle nowych tankow přepodadźa, kiž smy skazali“.
Nakup nowych tankow M1A2 Abrams za cyłkownje wjace hač štyri miliardy eurow běchu Pólska a USA w aprylu dojednali. Dóstać ma Pólska je wot lěta 2023 krok po kroku. Nimo toho dóstanje kraj 116 trjebanych tankow Abrams. Wone słuža wukubłanju, maja pak tež starše sowjetske tanki narunać, kiž bě Pólska jako wojersku pomoc wot Ruskeje nadpadnjenej Ukrainje přewostajiła. Pólska chce swoje składy bróni hišće lětsa z lětadła a rakety wotwobaracym systemom USA Patriot a z turkowskimi bojowymi trutami Bayraktar wudospołnić, Błaszczak we Waršawje připowědźi. Wuchodny čłon EU a NATO ma so za wažneho zwjazkarja USA a je jedyn z najaktiwnišich wojerskich a politiskich pomocnikow Ukrainy.
To a tamne (20.07.22)
Z powětrom pjelnjeny papagaj je w Bayerskej pomocnikow a samo helikopter zaběrał. Wobydlerka bě na rěce Regen pola města Cham spodźiwny objekt na wodźe wuhladała. Dokelž móhło so tež wo znjezboženy gumijowy čołm jednać, wołachu wohnjowu woboru, wodowu stražu a helikopter policije. Pomocnicy namakachu gumijowu hrajku, nic pak jeje wobsedźerja.
Hnydom cyły kilogram drogi crystal měješe dealer při sebi, jako jeho policija w Kamjenicy lepi. Zastojnicy namakachu wopojny jěd w nachribjetniku 42lětneho, jako jeho kontrolowachu. Drogi běchu w plastowych tyzach a titkach schowane. Dealer transportowaše drogi z elektriskim rolerom. Sudnik je bjezposrědnje na to zajeće 42lětneho wukazał. Jeho dowjezechu do jastwa, wumjetujo jemu wikowanje z drogami we wulkim stilu.
Zelenskyj ludźi pušća
Kijew (dpa/SN). Ukrainski prezident Wolodymyr Zelenskyj chce 28 sobudźěłaćerjow ukrainskeje tajneje słužby SBU pušćić. Potrjechene su wšelake zastojnstwa a funkcije, „přičiny pak su podobne: njespokojace dźěłowe wuslědki“, rjekny Zelenskyj wčera wječor w swojim wšědnym widejowym poselstwje. Hakle wčera bě wón nawodu tajneje słužby a přećela Iwana Bakanowa a generalnu statnu rěčnicu Irynu Wenediktowu pušćił, připowědźiwši zasadne reformy w SBU.
Za wyši dźěćacy pjenjez
Berlin (dpa/SN). Zwjazkowa ministerka za swójby Lisa Paus ma zwyšenje dźěćaceho pjenjeza za kmany srědk, staršim w časach stupacych płaćiznow pomhać. „Nimo zwyšenja popłatkow za přijimarjow Hartza IV by tole puć był, staršich hladajo na inflaciju zaměrnje podpěrować, rjekny politikarka Zelenych nowinarjam. Amplowa koalicija chcyła dołhodobnje zakładne zawěsćenje dźěći zwoprawdźić. Wotpowědne nowe rjadowanja tuchwilu „intensiwnje“ zdźěłuja.
Rabat jenož za domoródnych
