Kijew (dpa/SN). Ukrainski prezident Wolodymyr Zelenskyj je hladajo na pomoc zapadnych krajow nastupajo moderne brónje optimistiski za dalši wotběh wójny. „Okupanća su mjeztym nazhonili, što je moderna artilerija. Woni njezměja nihdźe w našim kraju, kiž su wobsadźili, wjace wěste kónčiny“, rjekny Zelenskyj minjenu nóc we widejowym poselstwje. Minjene tydźenje su ukrainscy wojowarjo po informacijach medijow wjacore zepěranišća a składy bróni a municije ruskich jednotkow daloko za frontu zničili.

Přihłosuja přistupej k NATO

Den Haag (dpa/SN). Nižozemska je tomu přihłosowała, zo Šwedska a Finska NATO přistupitej. Prěnja komora parlamenta – podobnje Zwjazkowej radźe – w Den Haagu je wčera z wjetšinu wotpowědnemu naćiskej zakonja přihłosowała. Minjeny tydźeń bě hižo prěnja komora přihłosowała. Nordiskej stataj běštej po ruskim nadpadźe na Ukrainu wo přistup k zapadnej wojerskej aliancy prosyłoj.

FDP za atomowe milinarnje

Berlin (dpa/SN). Frakciski šef SPD w zwjazkowym sejmje Rolf Mützenich je planowane dodawanje porjedźeneje ruskeje turbiny za płunowód Nord Stream I zakitował. „Smy přeswědčeni, zo je dodawanje turbiny prawnisce kaž tež politisce woprawnjene“, rjekny wón powěsćerni dpa. Přez Nord Stream I hižo wot póndźele žadyn ruski zemski płun wjace njedochadźa, dokelž dyrbja turbinu za zhusćenje płuna wuporjedźić. Mnozy so ­boja, zo Ruska tole jenož jako wurěč wužiwa, zo móhła płunowód dospołnje zawrěć. Zwjazkowe knježerstwo zasadźenje porjedźeneje turbiny zakituje, wšako njeje wona wot sankcijow potrjechena.

Porno tomu je ukrainski prezident Wolodymyr Zelenskyj zasadźenje turbiny raznje kritizował. „Hdyž móže złóstniski stat tajke wuwzaće přesadźić, što móže sej wón jutře a zajutřišim dowolić?“.

Drježdźany (dpa/SN). Sakske knježerstwo je škitne naprawy přećiwo koronawirusej hladajo na přeco hišće přiběrace ličby infekcijow wo štyri tydźenje podlěšiło. Tuchwilne zakładne škitne naprawy wostanu z tym hač do 31. awgusta płaćiwe, socialna ministerka Petra Köpping (SPD) wčera w Drježdźanach připowědźi. Přiwšěm so tež něštožkuli změni. W chorownjach a lěkarskich praksach trjebaja ludźo jenož hišće operaciske nahubniki město dotalnych nahubnikow FFP 2. Tež winowatosć testowanja za šćěpjenych a wustrowjenych mjez přistajenymi a wo­pytowarjemi wotpadnje. W hladarnjach płaća snadne wolóženja za šćěpjenych a wustrowjenych.

Hladajo na nazymu wostanje šćěpjenje najwažniši srědk, Köpping rjekny. Ministerstwo wočakuje přiběracy zajim ludźi mjez druhim tež tohodla, dokelž je třeće šćěpjenje wot oktobra jako zakładny škit za pućowacych wukazane. Nimo toho wočakuja, zo je wot nazymy štwórte šćěpjenje trěbne. Statne šćěpjenske centrumy chcedźa dale wutwarić.