Bywši ministerski prezident Japanskeje Shinzo Abe (ležo) je so ...
Sadźeja zaso na wuhlowe milinarnje
Berlin (dpa/SN). Hladajo na redukowane dodawanje płuna z Ruskeje chcedźa mjenje zemskeho płuna za produkciju miliny zasadźić. Město toho chcedźa so zaso sylnišo na wuhlowe milinarnje zepěrać. Zwjazkowy sejm je wčera wječor wotpowědnje změnjeny zakoń schwalił. Wužiwać chcedźa přichodnje wuhlowe milinarnje, kotrež su jenož we wobmjezowanej formje wužiwajomne, kotrež chcychu bórze zawrěć abo kotrež steja jako rezerwa k dispoziciji. Nowy zakoń chcychu hišće dźensa w Zwjazkowej radźe schwalić.
Lawrow wjeršk dočasnje wopušćił
Nusa Dusa/Moskwa (dpa/SN). Ruski wonkowny minister Sergej Lawrow je wjerškowe zetkanje G20 wodźacych a wuwiwacych so hospodarskich mocow na indoneskej kupje Bali dočasnje wopušćił. „Lawrow wjedźe hišće někotre bilateralne rozmołwy, potom chce so na medije wobroćić a wotjěć“, zdźěli rěčnica ruskeho wonkowneho ministerstwa Maria Sacharowa powěsćerni dpa. Na zhromadnym wobjedźe a na popołdnišim wuradźowanju so Lawrow hižo njewobdźěli.
Minjenu nóc bě Lawrow po swojej narěči na wjerškowym zetkanju na Bali swjedźensku žurlu wopušćił. Na tute wašnje je so wón kritice němskeje wonkowneje ministerki Annaleny Baerbock (Zeleni) wuwinył, kotraž bě jako přichodna rěčnica předwidźana a kotraž chcyše wójnu Ruskeje přećiwo Ukrainje z jasnymi słowami zasudźić.
Mjeztym je ruski prezident Wladimir Putin zapad před dalšej eskalaciju nastupajo wójnu w Ukrainje warnował.
To a tamne (08.07.22)
Pječena jatrowa pasteta je paducha w cuzym domje w Badensko-Württembergskej přeradźiła. Muž bě so přez wokno w delnim poschodźe do bydlenskeho domu w Stimpfachu zadobył a sej tam rjenje zarjadował. Spočatnje spřihotowa sej městno k spanju, potom dušowaše a dźěše do kuchnje w delnim poschodźe. Jako mjaso pječeše, wobydlerjej w delnim poschodźe wotućištaj. Hłódny paduch so zminy. Policija podarmo za nim pytaše a nadźija so swědkow.
Curryjoweje kołbasy dla staj so hósć a korčmar w piwowej zahrodźe w Neu-Ulmje zwadźiłoj. 56lětny hósć bě so spjećował, kołbasku zapłaćić, policija zdźěli. Pinčnik bě jemu město čerwjeneje kołbasy z kožu běłu bjez kože přinjesł. Mužej so tak dołho wurěčowaštaj, doniž policiju njezawołachu. Tola tež zastojnicy njemóžachu problem rozrisać.
Wjac hač milion eurow wróćili
Budyšin (SN/JaW). Załožba za serbski je wjace hač milion eurow njepřetrjebanych spěchowanskich srědkow z lěta 2021 ze serbskich institucijow wróćo dóstała. Wo tym informowaše załožbowy direktor Jan Budar nowinarjow předwčerawšim po pokročowanju wuradźowanja załožboweje rady z 24. meje w Budyšinje.
Hłowna přičina, zo su serbske institucije njewšědnje wjele njepřetrjebanych personalnych pjenjez wróćili je koronapandemija, kotraž je loni tež w Hornjej Łužicy chětro howriła. „Najwjace smy ze Serbskeho ludoweho ansambla wróćo dóstali. Tam wšak mějachu wjacore měsacy krótkodźěło, za čož su pjenjezy wot stata dóstali“, rozłoži Budar w prezency a online přitomnym žurnalistam. Kaž wón dale zdźěli, daja wjetšinu sumy do rezerwy, „zo by financowanje załožby hač do lěta 2025 zawěsćene było“, tak Budar.
Johnson přihotuje wotstup
London (dpa/SN). Britiski premierminister Boris Johnson chce po informacijach medijow jako předsyda britiskich konserwatiwnych wotstupić. Z tym by wón tež swoje zastojnstwo jako šef knježerstwa přisadźił, rozprawja sćelak BBC, powołujo so na informaciju z rjadow knježerstwa. Hišće w běhu dnja chcyše so Johnson na zjawnosć wobroćić. Ćišć na njeho bě minjene dny masiwnje přiběrał, po tym zo běchu wjacori ministrojo wotstupili, žadajo sej jeho wotstup.
Hišće raz hoberski program
Berlin (dpa/SN). Krótko do parlamentariskeje dowoloweje přestawki je so zwjazkowy sejm dźensa hišće raz k mamutowemu posedźenju zešoł. Tak mějachu mjez druhim wobšěrny zakonski paket za spěšniši wutwar ekologiskeje miliny z wětřika a słónca na dnjowym porjedźe. Nimo toho chcychu přepytowanski wuběrk zasadźić, kotryž ma chaotiske cofnjenje zwjazkoweje wobory z Afghanistana w lěće 2021 přepytować.
Proces mosta dla zahajeny
Při prěnim ćěrjenju bykow je so dźensa w Pamplonje na sewjeru ...
Drustwa: Stat měł skónčnje zapřimnyć
Drježdźany (dpa/SN). Zwjazk sakskich bydlenskich drustwow (VSWG) widźi hladajo na stupace energijowe płaćizny zwjazk we winowatosći. „Trjebamy nětko spěšnje skutkowne statne naprawy, kotrež bjezposrědnje bydlenske předewzaća a jich čłonow kaž tež podružnikow podpěraja. Ćišć dyrbi so pomjeńšić“, wuzběhny wčera šefina VSWG Mirjam Philipp w Drježdźanach. Wona žada sej nachwilne procentualne wobmjezowanje wudawkow za tepjenje a ćopłu wodu, kotrež so na podruži orientuja. Tak hodźa so socialne rozdźěle direktnje wobkedźbować.
Ukraina ruski nadpad wotwobarała
Kijew (dpa/SN). Ukrainske jednotki su po swójskich informacijach ofensiwu ruskeho wójska w Donbasu na wuchodźe kraja zadźerželi. „Ukrainscy wojowarjo su njepřećela při nowym pospyće njedaloko Wjerchnjokamkanki porazyli a w toho rjadach wulke straty zawinili. Wjes leži dźesać do 15 kilometrow zapadnje wulkoměsta Lysyčanska, kotrež su ruske jednotki minjeny kónc tydźenja zdobyli. Tež južnje toho je so poradźiło, nadpady ruskich jednotkow wotwobarać a nowe zakitowanske linije natwarić.
Ruske wójsko wozjewja, zo je dwaj rakety mjetacej systemaj USA typa Himars zničiło. „Njedaloko wsy Malotaranowi w ludowej republice Donjeck su swójske jednotki dwaj systemaj USA Himars a k tomu słušacu municiju z pomocu wulce dokładnych raketow zničili“, zdźěla rěčnik zakitowanskeho ministerstwa Igor Konašenkow w Moskwje. Njewotwisne přepruwowanja informacijow z Kijewa a Moskwy njejsu móžne. Po informacijach medijow je Ukraina dotal štyri systemy typa Himars dóstała.
Wočakuja napjatu atmosferu
Wjerškowe zetkanje G 20 na kupje Bali z wobdźělenjom Ruskeje
Bali (dpa/SN). Na indoneskej kupje Bali su dźensa zetkanje wonkownych ministrow skupiny G20, wodźacych a wuwiwacych so hospodarskich mocow, zahajili. Němska wonkowna ministerka Annalena Baerbock (Zeleni) zasadźowaše so do wotlěta k zetkanju za zhromadnu reakciju na ruski wojerski nadpad na Ukrainu. „Smy wšitcy na tym zajimowani, zo so mjezynarodne prawo respektuje, to nas wšitkich jednoća. To je přičina, čehodla njesměli Ruskej jewišćo zetkanja přewostajić“, wona rjekny.
Na zetkanju na Bali wočakuja nimo Baerbock a wonkowneho ministra USA Tonyja Blinkena tež ruskeho wonkowneho ministra Sergeja Lawrowa a toho chinskeho kolegu Wanga Yija wosobinsce. Skupinje G20 přisłušeja tež awtoritarnje nawjedowane kraje kaž Ruska, China a Sawdi-Arabska. Ruska ma tuchwilu prezidentstwo skupiny a wustupuje tuž jako hosćićel.
