To a tamne (12.05.22)
Sornu z kanala wuchowała je wohnjowa wobora w Augsburgu. Kedźbliwi pěšcy běchu zwěrjo na paralelnje wjeducej dróze něhdźe dwaj kilometraj na kolesu přewodźeli a wobornikow běžnje wo tym informowali, hdźe runje su, powołanska wohnjowa wobora zdźěla. Na kromje lěsneje kupjele, do kotrejež so kanal wuliwa, móžeše wohnjowy wobornik zranjenu sornu skónčnje z wody wućahnyć a skótnemu lěkarjej přepodać.
Z Kölna hač do Hamburga běžał je ćeknjeny psyk, doniž jeho skónčnje njepopadnychu. Wobydlerka w Hamburgu-Hausbruchu bě policiju informowała, po tym zo bě w socialnych medijach wo zhubjenym zwěrjeću zhoniła. Zastojnicy psa popadnychu, kiž skutkowaše na nich „derje kormjeny a čiły“ a přepodachu jeho zwěrjatowni, kotraž wobsedźerja wuslědźi. Psyk bě so 15. februara zminył.
Serbske mjenowe prawo budźe
Hišće we wobłuku podijoweje diskusije składnostnje pućowanskeje wustajeńcy „Was heißt hier Minderheit?“ spočatk apryla w zwjazkowym sejmje w Berlinje steješe prašenje w rumje, kak nastupajo reformu mjenoweho prawa w Němskej dale poběži. Wšako z lěta 2020 namjet ekspertoweje komisije předleži. Nětko zda so něšto hibać, zdźěli zapósłanc Južnoschleswigskeho wolerskeho zwjazka Stefan Seidler.
Berlin (SN/at). „To je wuběrna powěsć za Serbow: Zwjazkowe knježerstwo je signalizowało, zo budźe namjet ekspertoweje komisije z lěta 2020 zwoprawdźić, mjenowe prawo wotpowědnje serbskim tradicijam přiměrić“, zdźěli zapósłanc zwjazkoweho sejma Stefan Seidler (SSW).
Dalša pomoc Ukrainje z USA
Washington (dpa/SN). Dom reprezentantow USA we Washingtonje je wot prezidenta Joewa Bidena zapodaty pomocny paket za Ukrainu dale rozšěrił a z wulkej wjetšinu schwalił. Při tym hłosowachu zapósłancy Bidenowych Demokratow kaž tež opozicionelnych Republikanow za naćisk zakonja. Paket ma cyłkowny wobjim nimale 40 miliardow dolarow. Senat, druha komora parlamenta, dyrbi hišće přihłosować. Biden bě kongres wo 33 miliardow dolarow prosył.
Mało nadźije za wojowarjow
Kijew (dpa/SN). We woclowni Mariupola wobkruženi ukrainscy wojacy njesmědźa objekt po woli ruskich woblěhowarjow wopušćić. Ruske wójsko dotal wšitke namjety k cofnjenju wojakow wotpokazuje, rjekny ukrainski prezident Wolodymyr Zelenskyj medijam. Zdobom chwaleše statny šef wuspěch ukrainskeho wójska pola Charkiwa, hdźež móžachu wjacore wsy wróćo zdobyć a ruskich nadpadnikow wućěrić.
Dodatny etat wobjednawali
Palestinjenjo w Zapadnojordanskim kraju přewodźuja ćěło ...
Baerbock: Złóstnikow chłostać
Kijew (dpa/SN). Wonkowna ministerka Annalena Baerbock je na swojim prěnim wopyće w Ukrainje po zahajenju ruskeho nadpada šěroku podpěru při přepytowanju wójnskich złóstnistwow přilubiła. Zamołwitych za zawlečenja, mordarstwa a wumocowanja měli konsekwentnje chłostać, rjekny wona w Kijewje, hdźež bě ju jeje ukrainski kolega Dmytro Kuleba na rozmołwu přijał. „Tohodla chce Němska mjezynarodne přepytowanja předewšěm přez mjezynarodne chłostanske sudnistwo politisce, pjenježnje a tež z němskim personalom podpěrować“, rjekny politikarka Zelenych.
Inflacija wjace hač sydom procentow
Wiesbaden (dpa/SN). Přiběraca inflacija domjace budgety ludźi w Němskej dale poćežuje. W aprylu běchu płaćizny za přetrjebarjow wo 7,4 procenty wyše hač loni w aprylu. Tole je Zwjazkowy statistiski zarjad dźensa potwjerdźił. Bě to najwyša inflacija po znowazjednoćenju Němskeje w lěće 1990.
Předewšěm raznje zwyšene płaćizny energije inflaciju dale ćěrja, wójna w Ukrainje je wuwiće hišće zesylniła. Nadpřerěznje podróšili su so tež žiwidła (plus 8,6 procentow). Tule su wuskutki wójny wosebje widźomne. Hižo w měrcu běchu płaćizny wo 7,3 procenty rozrostli. Energija je so w aprylu přirunujo z lońšim aprylom wo 35,3 procenty podróšiła. Płaćizna za tepjenski wolij je so nimale podwojiła (plus 98,6 procentow). Tež za bencin a diesel (plus 38,5 procentow) a zemski płun (plus 47,5 procentow) dyrbjachu ludźo widźomnje wjace płaćić.
Ludźo w Němskej dyrbja so po měnjenju hospodarskich fachowcow najprjedy raz na přiběrace płaćizny nastajić a wočakuja za 2022 šěsć procentow inflacije.
Dale antižidowske předsudki
Přepytowanje wunjese razne nastajenje mjez muslimami a w rjadach AfD
Berlin (dpa/SN). Byrnjež wulka wjetšina ludźi w Němskej antisemitizm jako problem wobhladowała, su antižidowske předsudki po najnowšim přepytowanju dale jara rozšěrjene. To płaći za muslimow bóle hač za druhe skupiny wobydlerstwa, kaž woprašowanje instituta Allensbach w nadawku American Jewish Committee (AJC) wunjese. Při předstajenju wuslědkow wčera w Berlinje zasadźowaše so społnomócnjeny zwjazkoweho knježerstwa za bój přećiwo antisemitizmej Felix Klein za naprawy přećiwo hidy Židam napřećo předewšěm w mošejach. Tež přiwisnicy AfD zwuraznjeja wosebje často antižidowske předsudki.
Za studiju je so AJC w decembru a januaru 1 025 němskorěčnych ludźi nad 18 lětami a 561 němskorěčnych muslimow nad 18 lětami woprašeć dało. Po tym ma šěsć wot dźesać woprašanych antisemitizm w Němskej za daloko rozšěrjeny fenomen. Nimale dwě třećinje stej sej wěstej, zo je problem minjene dźesać lět přiběrał. Mjez woprašanymi muslimami ma 53 procentow problem za dale a wjetši.
Tunja jězdźenka ničo za wsy
Berlin (dpa/SN). Wot junija hač do awgusta planowana měsačna jězdźenka za dźewjeć eurow za busy a železnicy budźe po měnjenju sejma němskich wokrjesow w prěnim rjedźe na dobro ludźi we wulkich městach. Jako naprawa, kotraž ma něhdyšich a nowych wužiwarjow zjawneho bliskowobchada zdobyć, je zniženje tarifow we wjesnych kónčinach lědma kmane, rjekny prezident Reinhard Sager wčera w Berlinje. Akcija je časowje wobmjezowana a njewjedźe k rozšěrjenju poskitka. Lěpje by było, planowane miliardy za wutwar syće čarow a za krótše wotstawki mjez jězbami nałožować.
Wurjadna jězdźenka ma wot 1. junija po wšej Němskej jězby w blisko- a regionalnym wobchadźe zmóžnić – za dźewjeć eurow, a tak wo wjele tuńšo hač z normalnym měsačnym tiketom. To ma dźěl paketa amploweje koalicije k podpěrje ludźi drohich płaćiznow energije dla być. Runočasnje chcedźa ludźi po tutym puću pohnuć, zaso wjace z busami a železnicu jězdźić. Zwjazk poskitk financuje a přewostaja zwjazkowym krajam 2,5 miliardow eurow za wupadnjene dochody w zjawnym bliskowobchadźe.
To a tamne (11.05.22)
Wotpinjeneje miliny dla byštej so sotře w Indiskej bjezmała na wopačneho muža wudałoj. Žonje běštej na zhromadnej hosćinje samsnu njewjesćinsku drastu woblečenej. Jako nadobo milina wupadny, přewjedźeštej žonje wšelake kwasne wobrjady z wopačnym mužom. Hakle, jako so swěcy zaso zaswěćichu, swójby misnjenje widźachu. Duchowni na to kwasne wobrjady wospjetowachu – tónkróć w prawej zestawje.
Dospołnje nahi a k tomu hišće pjany šofer wosoboweho awta je w Dobrjoługu-Góstkowje (Doberlug-Kirchhain) na juhu Braniborskeje zasadźenje policije zawinował. Policistam wón napadny, dokelž jědźeše přespěšnje po seklojtej čarje a na signale zastojnikow njereagowaše. Hakle z pomocu hozdźikoweje deski móžachu jeho zadźeržeć. Drasty namakachu w kófrowej rumnosć. Test wunjese 1,62 promilow.
Žadataj sej přiměr w Ukrainje
Berlin (dpa/SN). Zwjazkowy kancler Olaf Scholz (SPD) a runje znowa wuzwoleny francoski prezident Emmanuel Macron žadataj sej zhromadne konkretne kročele do směra na přiměr w Ukrainje. „Štož chcemy docpěć, je přiměr, tak spěšnje kaž móžno“, rjekny Macron w Berlinje. „Jenož tak móža so jednanja mjez Ukrainu a Ruskej zakónčić, zo bychmy měr a cofnjenje ruskich jednotkow docpěli. To je naš zaměr.“ Ukrainje pak njesměli žadyn diktat nanuzować.
Mjeza bórze překročena
Genf (dpa/SN). Globalna přerězna temperatura lěta móhła hižo hač do 2026 prěni króć mjezu 1,5 stopnjow přirunujo z niwowom časa do industrializacije překročić. Tole je swětowa wjedrowa organizacija WMO dźensa w Genfje zdźěliła. To wšak njerěka, zo je mjeza potom dołhodobnje překročena, dokelž móže so wona tež zaso znižić. Powšitkownje pak wočakuja dale přiběrace temperatury w přichodnych lětach. Kraje běchu so w klimowym zrěčenju 2015 w Parisu zawjazali, mjezu 1,5 stopnjow dodźeržeć.
Wjace politiskich deliktow
