Zelenskyj sćele posoła do Berlina
Kijew (dpa/SN). Ukrainski prezident Wolodymyr Zelenskyj je sej hladajo na mjeztym sto dnjow trajacu rusku inwaziju w swojim kraju doraznje status Ukrainy jako čłonski kandidat Europskeje unije žadał. „To njeje rozsud za Ukrainu, ale za cyły europski projekt“, rjekny hłowa stata w swojim wšědnym widejowym poselstwje. Přistup Ukrainy tež wo tym rozsudźi, hač ma EU přichod abo nic.“ Komisija EU chce hišće w juniju wo tym rozsudźić, kak z ambicijemi wot Ruskeje nadpadnjeneho kraja wobchadźa.
Mjeztym je Zelenskyj wurjadneho posoła do Berlina pósłał, kiž ma ze zwjazkowym knježerstwom wo perspektiwach nastupajo móžny přistup Ukrainy k EU jednać. Minister za regionalne wuwiće Oleksij Černyšow chcyše so dźensa a jutře z wjacorymi ministrami zetkać. Zwjazkowe knježerstwo je wospjet potwjerdźiło, zo njebudźe nastupajo Ukrainu wuwzaća w procesu přistupa k EU akceptować. Ukraina bědźi so mjez druhim z masiwnej korupciju. Wona ma so boja přećiwo Ruskej dla za kwalifikowanu.
Scholz wopyta Baltikum
Zwjazkowy kancler chcył wuchodnu flanku NATO dale zesylnić
Vilnius (dpa/SN). Do wopyta zwjazkoweho kanclera Olafa Scholza (SPD) w Litawskej su sej baltiske kraje sylnišu wojersku prezencu NATO we wuchodnej kónčinje aliancy žadali. Wjerškowe zetkanje NATO kónc měsaca dyrbjał „wjeršk rozsudow“ być a wolu zwjazka k zasakłemu zakitowanju signalizować, rjekny litawski prezident Gitanas Nauseda powěsćerni dpa do přijězby Scholza. Nimo lětadła wotwobaracych systemow nadźija so Nauseda zaměstnjenja cyłeje brigady NATO w swojim kraju, što bě něhdźe 5 000 wojakam wotpowědowało. Tuchwilu je 1 600 wojakow w kraju, wjace hač tysac přisłušeja Zwjazkowej woborje.
Tež letiski prezident Egils Levits wočakuje wot wopyta Scholza „konkretne namjety“ za sylniši škit wuchodneho teritorija NATO. „Wočakujemy, zo Němska wěstotu wšeho teritorija NATO wobkedźbuje a zo zesylnjenje prezency NATO w tutej kónčinje podpěruje“, rjekny Levits dpa. „Baltiske staty a Němska su sej přezjedne, zo dyrbjała so wuchodna flanka NATO jako reakcija na agresiwne zadźerženje Ruskeje dale sylnić.“
Němska z dobrej kwalitu wody
Kopenhagen (dpa/SN). Štóž chcył so w tutym lěću w němskich jězorach, rěkach abo w morju kupać, njetrjeba sej nimale nihdźe žane starosće bakterijow dla činić. Kaž z najnowšeje rozprawy Europskeje wobswětoweje agentury EEA wuchadźa, přeswědča woda w Němskej z jara dobrej kwalitu. Tak su w 90,5 procentach lěta 2021 přepytowanych wodźiznow Němskeje wuběrnu kwalitu wody zwěsćili. Po wšej Europje wučinja tutón podźěl nimale 85 procentow, něhdźe 95 proc. europskich wodźiznow spjelnja znajmjeńša minimalne naroki EU.
Jeničce 14 z cyłkownje 2 291 analyzowanych němskich kupanskich městnosćow su jako njedosahace zastopnjowali. Z tutej kwalitu zabjerje zwjazkowa republika w přirunanju z druhimi europskimi krajemi městno w hornim srjedźnym polu. Na načolnym městnje je Awstriska z nimale 98 procentami kupanskich městnosćow z wuběrnej kwalitu wody. Slěduja Malta, Grjekska a Chorwatska. W Kopenhagenje zasydlena EEA je za swoju kóždolětnu rozprawu 21 859 wodźiznow Europy přepytowała, a to hladajo wosebje na bakterije, kiž móža chorosće zawinować.
To a tamne (07.06.22)
Psyk sankoweho zapřaha, kiž bě so při wubědźowanju Iditarod w Alasce nadobo zhubił, je po třoch měsacach zaso pola swojeho wobsedźerja. Tón dźakuje so wšěm, kiž su při pytanju pomhali. Tři lěta stary Husky bě so 13. měrca w małym sydlišću Ruby zminył, jednej z etapow 1 800 kilometrow dołheje čary. Tydźenje dołho podarmo za nim pytachu. Kónc meje wobydlerjo wotležaneje wsy psa wuhladachu a z picu přiwabichu.
Za jenož 25 dnjow chce Joseph Heß z Kamjenicy Ryn přepłuwać, wot žórła hač k wuliwej, zo by nowy rekord nastajił. „Prudy w rěce su jara strašne“, rjekny 34lětny. K tomu přińdźe sylny wobchad łódźow a zanjerodźenje wody. Sobotu chce Heß w Šwicarskej do Ryna zalězć a wšědnje wosom do dźesać hodźin płuwać. 6. julija chce wón płuwajo wuliw ryna w Rotterdamje docpěć.
Lěwica w sejmje zwrěšćiła
Berlin (dpa/SN). Lěwica je w zwjazkowym sejmje ze swojim žadanjom zwrěšćiła, wothłosowanje wo pakeće sto miliardow eurow na dobro zwjazkoweje wobory přestorčić. Nimo Lěwicy bě tež AfD za to, nic hižo dźensa wo tak mjenowanym wurjadnym zamóženju a z tym zwjazanej změnje zakładneho zakonja wothłosować. Zapósłanc Lěwicy Jan Korte rjekny: „Wy chceće w běhu 78 mjeńšin wo změnje wustawy rozsudźić.“ Zapósłancy koalicije a unije namjet wotpokazachu.
Boža słužba bjez kralowny
London (dpa/SN). Swjatočnosće k jubilejej krónowanja britiskeje kralowny Elizabeth II. dyrbjachu so dźensa bjez jubilarki wotměć. Wona bě swoje wobdźělenje na dźaknej Božej słužbje w katedrali St. Paul’s strowotnych přičin dla wotprajiła, po tym zo běchu jej lěkarjo k temu radźili. Wčera bě so 96lětna statysacam ludźom na balkonje kralowskeho palasta pokazała a bě hoberskeho nawala wopytowarjow dla wočiwidnje zahorjena.
Lěkarja bolosćow dla morił
Zwjazkowy kancler Olaf Scholz (SPD) je dźensa prezidenta ukrainskeho ...
Bencin hižo zaso dróši
Mnichow (dpa/SN). Jenož dźeń po zniženju dawkow su płaćizny bencina a diesela wčera hižo zaso přiběrali. Tak płaćeše bencin typa E10 w 10.50 hodź. po wšej Němskej přerěznje 1,896 eurow. To je 3,7 centow wjace hač 24 hodźin do toho. Diesel płaćeše 1,951 eurow, 3,3 centy wjace. Při tym njebě zniženje dawkow – pola bencina 35,2 centaj a pola diesela 16,7 centow – hižo srjedu přetrjebarjow w połnej měrje docpěło. „Poprawom bychu płaćizny wo wjele niše być dyrbjeli, nětko pak samo hižo zaso stupaja“ rjekny fachowc ADAC za ćěriwowe wiki Christian Laberer. Přiběrace płaćizny njejsu woprawnjene, wšako płaćizny nafty na swětowych wikach woteběraja. Hižo do zniženja dawkow běchu płaćizny po jeho měnjenju přewysoke. Liter superbencina njesměł po jeho wobličenjach dróši hač 1,60 eurow być.
Prezident Zwjazkoweho karteloweho zarjada Andreas Mundt chcył wolijowe koncerny nětko dokładnje wobkedźbować, wón rozhłosownikam rjekny. Wón chce jim hladajo na płaćizny „jara njepřijomne prašenja“ stajeć a tež rafinerije a wikowarjow dohladować.
Ukraina čaka dale na němske brónje
Berlin (dpa/SN). Ukrainski wulkopósłanc w Němskej Andrij Melnyk je sej znowa žadał, zo Němska přilubjene ćežke brónje spěšnje do Ukrainy sćele. Wón je spokojom z najnowšim připowědźenjom zwjazkoweho kanclera Olafa Scholza (SPD), Ukrainje moderny lětadła wotwobaracy system Iris-T přewostajić, rjekny wón dźensa rano w sćelaku ZDF. „Smy-li pak sprawni: sto dnjow wójna, hač do dźensnišeho njeje Němska ani jenički ćežki nastroj do Ukrainy pósłała.“
Prěnje ćežke brónje wočakuja tam drje hakle kónc junija.
Kancler bě srjedu připowědźił, zo chcyła Němska Ukrainje system Iris kaž tež specielny radar přewostajić, z kotrymž hodźa so pozicije artilerije wuslědźić. Hižo před tydźenjemi bě zwjazkowe knježerstwo připowědźiło, Ukrainje ćežke brónje pósłać: 50 lětadła wotwobaracych tankow typa Gepard a moderne tankowe hawbicy. Dotal w Ukrainje na wšitke tute brónje hišće čakaja.
Zaso nahubnik?
To a tamne (03.06.22)
Samsny dźeń dźěćo porodźiłoj stej sotře-dwójnikaj w Israelu. 31lětnej běštej wutoru do chorownje přišłoj, dokelž so porod bližeše a stej samsny dźeń syna porodźiłoj. Za wobě žonje bě to štwórte dźěćo, kóžda z njeju ma hižo dwě dźowce a syna. Wobě sotře ležitej nětko w samsnej stwě w porodowej chorowni.
Ničeji kenguru zaběra ludźi we Wegbergu w Heinsbergskim wokrjesu njedaloko nižozemskeje mjezy. Policija prosy wobsedźerja, so spěšnje přizjewić. Roznošowar nowin bě zwěrjo minjenu njedźelu wuhladał, jako po dróze skakaše. Policija njemóže sej rozkłasć, zwotkel kenguru přińdźe, wšako nimaja tam daloko a šěroko zwěrjency abo parki dźiwiny. Póndźelu su wobydlerjo kenguru znowa wuhladali a fotografowali. Zwěrjo pak je so w bliskim lěsu zminyło. Tam pak podarmo za nim pytachu.
