Regionalne žiwidła prašane
Podstupim (dpa/SN). Koronapandemija je zajim wobydlerjow Braniborskeje za regionalne žiwidła zesylniła. Tole zwěsća wobswětowy minister kraja Axel Vogel (Zeleni). Wuwiće pokazuje, kak wažne je, so na zakładne zastaranje ze žiwidłami ze stron derje nastajenych předewzaćow ratarskeho a žiwidłoweho hospodarstwa spušćić móc, rjekny Vogel składnostnje wčerawšeho předstajenja programa 27. braniborskeje jězby po kraju, kotraž wotměwa so jako regionalne wukładne wokno druhi kónc tydźenja junija. Cyłkownje 150 ratarskich a plahowanskich předewzaćow wjesneho ruma so z dnjom wotewrjenych duri prezentuje, a tak wopytowarjam swoje wudźěłki a wašnje dźěła předstaja.
Po najnowšej rozprawje zwjazkoweho ratarskeho ministerstwa je 82 procentam ludźi wažne, zo pochadźeja žiwidła z regiona a zo dźěłaja ratarske předewzaća po prawidłach škita přirody a wobswěta. Vogel na to pokaza, zo dyrbja ludźo napjateho hospodarskeho połoženja a wójny w Ukrainje dla z dale z přiběracymi płaćiznami ličić, zo pak zaručeja regionalni poskićowarjow wěstu stabilitu.
To a tamne (31.05.22)
Ze 103 lětami swětowy rekord nastajiła je parašutistka w Šwedskej. Jako dotal najstarša žona je Rut Larsson njedźelu popołdnju 200 kilometrow južnje stolicy Stockholma tandemowy skok zmištrowała. Na lětanišću čakachu pomocnicy z jeje rolatorom. „Bě krasnje tam horjeka“, wona rjekny. Larsson bě lěta 2009 hižo raz tandemowy skok zmištrowała. Najnowši po boku parašutista Joackima Johnssona bě tuž druhi w jeje žiwjenju. Wo oficialny dźěl rekorda staraše so zastupjerka Guinnessoweje knihi rekordow.
Na wšě 230 kilogramow twarožka pokradnyli su njeznaći w Posaarskej. Skućićeljo spakosćichu kónc tydźenja cyłkownje 15 wulkich paketow Edamskeho. Za to su durje připowěšaka wotewrěli, kiž steješe na parkowanišću při awtodróze A 62. Kak su twarožk wotwjezli a kak wulka je škoda, dotal hišće njewědźa.
Na wopyće w Ukrainje
Kijew (B/SN). Vatikanski zamołwity za wonkowne naležnosće arcybiskop Paul Gallagher je njedawno Buča, małe to předměsto Kijewa, wopytał. „Dźensniši wopyt bě złe dožiwjenje. Budźe dołho trać tele rany hojić, wodaće namakać a na procesu wujednanja dźěłać“, praji wón powěsćowemu portalej Vatican News. W rozmołwje z komunalnymi politikarjemi w Lwiwje podšmórny wón, zo so Vatikan za teritorialnu integritu Ukrainy zasadźuje. Dale poskići vatikanski diplomat ukrainskemu wonkownemu ministrej Dmytrej Kulebje pomoc Swjateho stoła při jednanjach mjez Ukrainu a Ruskej.
Institut oficialnje wotewrjeny
Kraje EU wuradźuja
Brüssel (dpa/SN). Statni a knježerstwowi šefojo čłonskich krajow EU su so dźensa w Brüsselu na wurjadny wjeršk zešli. Zaměr dwaj dnjej trajacych wuradźowanjow su mjez druhim plany, kak móhli z inwesticijemi wjacorych miliardow eurow spěšnje njewotwisnosć wot ruskich energijowych žórłow docpěć. Nimo toho dźe wo naprawy přećiwo wysokim płaćiznam energije a wo dalšu podpěru na dobro Ukrainy. Tamniši prezident Wolodymyr Zelenskyj chcył so po puću widejoweje konferency wobdźělić.
Lawrow: Ruska chce Donbass
Moskwa (dpa/SN). Ruski wonkowny minister Sergej Lawrow je wobsadźenje wuchodneho ukrainskeho Donbassa „bjezwuměnitu prioritu“ mjenował. Dźe wo to, ukrainske wójsko a bataljony z kónčiny Donjecka a Luhanska wutłóčić, rjekny Lawrow francoskim nowinarjam. Wón rěčeše wo „wuswobodźenju“ Donbassa wot „Kijewskeho režima“. W tamnych kónčinach ruskeje „wojerskeje operacije“ měli ludźo sami wo swojim přichodźe rozsudźić, Lawrow rjekny.
Zahaja koaliciske jednanja
Něhdźe 15 000 ludźi je so wčera wječor na dobroćelskim ...
Jasne wuprajenja hladajo na wuhlo
Berlin (dpa/SN). Wobswětowi a energijowi ministrojo statow G7 su po wuprajenju zwjazkoweje ministerki za wobswět Steffi Lemke (Zeleni) na swojim zetkanju w Berlinje konkretne dojednanja wo zakónčenju wudobywanja wuhla wujednali. „Tak su cyle konkretne dojednanja za wutwar wobnowjomnych energijow, ale tež na přikład k wustupej z wudobywanja wuhla“, politikarka Zelenych w rańšim wusyłanju telewizijneju sćelakow RTL a ntv minjeny pjatk wuswětli. Kónčne wozjewjenje zhromadneho schadźowanja wusměrja so „jara sylnje na škit klimy, biologisku mnohotnosć w přirodźe, ale tež na angažement přećiwo zanjerodźenju nastupajo plastiku.“
Nětko spěšnje brónje wobstarać
Heil za klimowy pjenjez
Minister chcył ludźom ze snadnymi dochodami pomhać – reakcije wšelake
Berlin (dpa/SN). Wobydlerki a wobydlerjo Němskeje z měsačnymi dochodami pod 4 000 eurow brutto maja po woli zwjazkoweho socialneho ministra Hubertusa Heila (SPD) přichodnje „socialny klimowy pjenjez“ dóstawać. Wupłaćić chcedźa pjenjezy po móžnosći wot lěta 2023 jónu wob lěto, zo bychu přiběrace płaćizny energije wurunali, Heil nowinarjam připowědźi. Nimo toho planuje minister wyše sadźby za rentnarjow, kiž su na zakładne zawěsćenje pokazani. Zeleni, dźěłarnistwo ver.di a paritetiski dobroćelski zwjazk plany Heila witaja. FDP reaguje skeptisce a z městnami wotpokazujo. Unija CDU/CSU namjety ministra zasadnje wotpokazuje.
