Suma so podwojiła
Stare wuměłstwo traje
Ludźi bóle wabić
Drježdźany (dpa/SN). Města a gmejny w Sakskej kaž tež rjemjeslniske organizacije Swobodneho stata chcedźa wo dorost wabić. Wotpowědne wozjewjenje su nawodnistwa gremijow sakskeho zwjazka městow a gmejnow (SSG) kaž tež sakskeho zwjazka rjemjeslnikow w Kamjenicy wobzamknyli. „Jeli chcemy młodych ludźi jako fachowcow zdobyć, trjebamy zajimawe a lochce přistupne poskitki – w městach kaž tež we wjesnych kónčinach“, zwurazni wčera prezident SSG Bert Wendsche. Poradźowarjo w praksy a powołanske praktika měli młodym čłowjekam pokazać, zo rjemjeslnistwo a komunalne zarjadnistwo napjaty přichod skićitej.
To a tamne (06.05.22)
Skawtow w Šwicarskej chcedźa nětko na wosebite wašnje počesćić. Šwicarska póšta chce listowu znamku wudać, kotraž budźe na spěwy a přećelstwa dopominać a budźe za lěhwowym wohenjom wonjeć, póšta wčera zdźěli. Znamka ma wosebitu hornju worštu, rybuja-li ludźo z porstom po njej, so wóń wupřestrěwa. Marka ma 1,06 eurow płaćić a w comicowym stilu wuhotowane być.
Dokelž njebě prěni oficěr swoje pilotowe wukubłanje hišće zakónčił, dyrbješe so pasažěrske lětadło, kotrež bě po puću wot Londona do New Yorka, nad Irskej zaso zawróćić. Lětarske předewzaće Virgin Atlantic rěčeše wčera wo wopačnym słužbnym planje. Airbus bě póndźelu hižo štyrceći mjeńšin po puću, jako sej zamołwići w cockpiće wuwědomichu, zo njeje prěni oficěr hišće swój posledni treningowy lět wotměł.
Wobydlerjow wobdźělić
Karlsruhe (dpa/SN). Wobhospodarjow wětrnikowych parkow smědźa zakonsce k tomu zawjazać, zo maja potrjechenych wobydlerjow a komuny financielnje na dobytkach wobdźělić. Dźensa je zwjazkowe wustawowe sudnistwo w Karlsruhe wotpowědny zakoń z Mecklenburgsko-Předpomorskeje z lěta 2016 wopodstatniło. Wobdźělenje přisporja akceptancu wobydlerjow za wětrnikowe parki, we wopodstatnjenju sudnistwa rěka.
Załožbu rozpušćić
Schwerin (dpa/SN). W zwadźe wo rozpušćenju załožby Nord-Stream předleži nowy posudk, kiž wopodstatni měnjenje krajneho knježerstwa w Mecklenburgsko-Předpomorskej. Załožbu měli rozpušćić, zwurazni ministerska prezidentka kraja Manuela Schwesig (SPD) wčera w Schwerinje. Wona je so ruskeho nadpada dla na Ukrainu za to wuprajiła. Załožba bu spočatk lěta 2021 załožena a z pjenjezow Nord-Stream koncerna financowana. Nimo spěchowanja klimy ma załožba zwoprawdźenje płunoweje pipeline zawěsćić.
Straty trochu narunali
Situacija w ukrainskim měsće Mariupol je dale napjata. Mjeztym zo su ...
Ratarjo žadaja sej pomoc
Podstupim (dpa/SN). Braniborske ratarske zawody ćerpja po informacijach prezidenta krajneho burskeho zwjazka Henrika Wendorffa přiběrajcy pod wysokimi energijowymi a płaćiznami hnojiwa. „Tohodla kóšty za zhotowjenje stupaja“, Wendorff wčera we wuběrku za ratarstwo, wobswět a škit klimy braniborskeho krajneho sejma wuswětli. Wyše płaćizny za wobhospodarjenje zawodow měli hišće financować móc. „Prašenje je: Móžemy to z wyšimi płaćiznami wudźěłkow narunać abo w kotrej časowej dobje bychmy móhli płaćizny dale dać?“
Braniborski burski zwjazk wočakuje zhromadnje wothłosowane postupowanje Zwjazka a krajow nastupajo podpěru ratarskeho wobłuka. Zwjazkowe ratarske ministerstwo je w swojim dodatnym etaće 120 milionow eurow za pomocne naprawy w zwisku ze sćěhami wójny w Ukrainje zaplanowało. Braniborski ratarski minister Axel Vogel (Zeleni) žada sej, zo měli srědki sčasom wupłaćić. Kriterij za rozdźělenje měł wšelakora potrjechenosć zawodow być.
Z raketowym systemom zwučowali
Kaliningrad (SN). Ruske wojerske jednotki su wčera zwučowanje w Kaliningradźe wotměli, rozprawja zakitowanske ministerstwo w Moskwje. Jednotki zwučowachu nadpady wojerskich stejnišćow njepřećela, při čimž zasadźichu mobilne raketowe systemy typa Iskander, z kotrymiž móhli tež atomowe brónje wužiwać. Něhdźe sto wojakow je so na simulaciskim zwučowanju wobdźěliło.
Hižo wot spočatka nadpada na Ukrainu hrozy ruski prezident Wladimir Putin taktiske atomowe brónje zasadźić. Kónc februara je hižo wotpowědny alarmowy schodźenk zahajił.
Po informacijach wobkedźbowarjow je ruska statna telewizija zjawnosć wo pozitiwnych kajkosćach tajkich brónjow informowała. „Hižo dwaj tydźenjej słyšimy, zo měli atomowe sila wotewrić“, wuswětli zawčerawšim ruski žurnalist Dmitri Muratow.
Raketowy system Iskander-M zamóže rakety hač do 500 kilometrow daloko třěleć. Wot Kaliningrada móhli tak tež Waršawu, Berlin a dalše města docpěć.
Płaćizny zwyšili
Prěni program bórze zahaja
Berlin (dpa/SN). Prěnje dźěle pomocneho paketa zwjazkoweho knježerstwa za předewzaća, kotrež su wot ukrainskeje wójny potrjechene, su nětko přihotowane. Wosebity program za kredity statneje spěchowanskeje banki KfW zahaja po wšěm zdaću hižo přichodnu póndźelu, zdźělištej zawčerawšim zwjazkowej ministerstwje za hospodarstwo a za financy. Program měł krótkodobnje likwidnosć předewzaćow zaručić. Mjeztym tež hižo zahajeny je program za rukowanje.
Dalše dźěle pomocneho paketa dale přihotuja. Jedyn wobłuk toho su přiražki energijowych kóštow na přikład za firmy. Zwjazkowy hospodarski minister Robert Habeck (Zeleni) a zwjazkowy financny minister Christian Lindner (FDP) staj spočatk apryla pomoc předewzaćam připowědźiłoj, kotrež pod sćěhami wójny w Ukrainje ćerpja. Předewšěm energijowe kóšty su drastisce stupali, ale tež dodawanske rjećazy hižo njefunguja. Habeck pak zwurazni, zo njeńdźe w programje wo to, dospołne kóšty přewzać. Dale wón wuzběhny, zo dźěła zwjazkowe knježerstwo na tym, hospodarski wobłuk tež w ćežkich časach škitać.
