Berlin (dpa/SN). Zarjadowarjo koncertow a wikow w Němskej sej žadaja wšitke wobmjezowanja koronawirusa dla spěšnje zběhnyć. Do přichodneje konferency ministerskich prezidentow zajutřišim, srjedu, k połoženju korony dla wočakuje wšoněmski zwjazk organizatorow koncertow a zarjadowanjow „hnydomne a dospołne zběhnjenje“. Tež zarjadowarjo wikow njewidźa žanu přičinu wjace, zetkanja branše wotprajić. „Dyrbimy nětko rozsudźić, hač so naše zarjadowanja nazymu wotměja abo nic“, rjekny prezident zwjazka Jens Michow nowinarjam. Kulturne zarjadowanja trjebaja chwile za přihoty a dyrbja planujomne być, tež za wopytowarjow. „Nichtó nochce sej zastupny lisćik kupić a riziko na so wzać, zo koncert tři dny do toho tola zaso wotpraja.“ Michow žada sej kónc wobmjezowanjow ličby přihladowarjow dla, preč z dopokazom šćěpjenja a kónc nahubnikow.

Zwjazkowy kancler Olaf Scholz w Kijewje a Moskwje

Berlin (dpa/SN). Znowa wuzwoleny zwjazkowy prezident Frank-Walter Steinmeier widźi dale dobre šansy, konflikt mjez Ruskej a Ukrainu diplomatisce rozrisać. Rusojo kaž tež Ukrainjenjo maja wulki zajim na tym wuspěchi docpěć, rjekny wón wčera w telewiziji ARD. „Dołhož je zajim na woběmaj bokomaj widźomny, móže tež Němska k tomu přinošować, zo najhóršemu zadźěwamy.“ Steinmeier je sej wěsty, zo zwjazkowe knježerstwo wšitko za to čini.

W znamjenju dramatiskeho přiwó­třenja krizy Ukrainy dla je so zwjazkowy kancler Olaf Scholz (SPD) dźensa do tamnišeje stolicy Kijewa podał. Tam woča­kowaše jeho prezident Wolodymyr Zelenskyj. Ryzy formalnje je to ­nastupny wopyt Scholza na Ukrainje. Wopyt je pak zasćinjeny wot přiběracych napjatosćow mjez Ruskej a Ukrainu a wot warnowanjow ze stron USA před móžnym wojerskim nadpadom Ruskeje. Jutře chce so Scholz w Moskwje z ruskim prezidentom Wladimirom Putinom zetkać.

„Wuznawamy so Jězusej, nic cyrkwi. Bóh ­je wěčny, cyrkej nic.“ To běštej jenož dwě z wjacorych wuprajenjow, z kotrymiž je Drježdźansko-Mišnjanski biskop Heinrich Timmer­evers młodostnym we wobłuku digitalneje rozmołwy dopokazał, zo njesłuša runjewon ke konserwatiwnemu lě­hwu katolskeho klerusa. Tež jeho nastajenje k homoseksualiće a „diwersnym“ swědči wo woli, zo njech so cyrkej skónčnje na puć do 21. lětstotka nastaji. A jeho měnjenje celibat, fararki a seksualitu nastupajo tak hišće słyšeli njejsmy. Byrnjež Timmerevers na někotrežkuli kritiske prašenje młodostnych njewotmołwił, je jako podpěraćel synodalneho puća cyle jasnje signalizował, zo tak kaž dotal prosće dale njepóńdźe. A byrnjež próstwa biskopa wo sćerpnosć zrozumliwa a derje wobkrućena była: Namołwu foruma měł klerus chutnje brać. Wjacekróć tam rěkaše: „Najrjeńše słowa a woporam seksualneje namocy a diskriminacije wěnowana swěčka w barbach tučele njedosahaja. Je načasu jednać!“ Bosćan Nawka

Waršawa (dpa/SN). Po warnowanju knježerstwa USA před móžnym ruskim nadpadom wusměrja so Pólska na přiwzaće ćěkancow z Ukrainy. Hladajo na situaciju w susodnym kraju přihotuja wšelke scenarije, pisaše pólski minister za nutřkowne naležnosće Mariusz Kamiński wčera w socialnej syći Twitter. „K tomu słušeja tež přihoty ze šefami zarjadnistwow, ­kotrež dyrbja na móžny přichad škit pytacych ćěkancow z Ukrainy reagować“, wón wuzběhny.

Staćenjo z Ukrainy smědźa tuchwilu jeno z turistiskich přičin 90 dnjow bjez wizuma do Pólskeje a Schengenskeho ruma přichadźeć. Nimo toho dźěła w Pólskej tež wjele Ukrainjanow. Po informacijach pólskeho wukrajneho zarjada ma 300 000 ludźi z Ukrainy přebywansku dowolnosć, kotraž je na tři lěta wobmjezowana. Ličba přebywacych bjez dowolnosće pak je po wšěm zdaću wo wjele wjetša.