Žadaja sej kónc brónjenja na Ukrainje!
Moskwa (dpa/SN). Ruska je USA a jich zwjazkarjow namołwjała, Ukrainje žane dalše brónje njedodawać. Hewak je wěstota Ruskeje wohrožena, rjekny zastupowacy wonkowny minister Sergej Rjabkow na diskusijnym forumje w Moskwje. „Połoženje na polu europskeje wěstoty je kritiske, štož je wina Washingtona a NATO, kotrejž Ukrainu w prěnim rjedźe jako srědk ćišća přećiwo Ruskej wužiwatej“, rjekny wiceminister, kiž je mjezynarodnje na jednanjach wo žadanjach Ruskeje za wěstotnymi garantijemi wobdźěleny.
USA po słowach Rjabkowa połoženje zaměrnje z informacijemi wo pozdatnym ruskim nadpadźe na Ukrainu přiwótřeja, Rjabkow měnješe. Tež Krjeml bě kritizował, zo USA zas a zaso informacije wo planowanym nadpadźe Ruskeje šerja, bjez toho zo bychu jenički dopokaz předpołožili. Ruska wšědnje twjerdźi, zo nadpad na Ukrainu njeplanuje. Wona NATO wumjetuje, zo wužiwa napjatosće wokoło Ukrainy, zo by swoju eksistencu wusprawniła, wosebje po chaotiskim cofnjenju z Afghanistana.
Kritizuja złahodnjenje holocausta
Berlin (dpa/SN). Składnostnje 80. róčnicy konferency nad jězorom Wannsee na kromje Berlina stej Němska a Israel prěće a złahodnjenje holocausta šwikałoj. W hóstnym přinošku za nowinu Tagesspiegel a za israelsku nowinu Maariv kritizujetaj němska wulkopósłanča w Israelu Susanne Wasum-Rainer a israelski wulkopósłanc w Němskej Jeremy Issacharoff, zo někotři holocaust přeco hišće prěja a jeho historiski wuwzaćny charakter relatiwizuja. Zaprěwanje a złahodnjenje tohole złóstnistwa na čłowjestwje njeje jenož mjez politisce radikalnymi rozšěrjene, ale je towaršnostny a mjezynarodny fenomen. Z teje přičiny stej Israel a Němska dźensa rezoluciju nastorčiłoj, kotruž měła UNO wobzamknyć.
Na tak mjenowanej Wannseeskej konferency 20. januara 1942 běchu wysokorjadni zastupnicy nacionalsocialistiskeho režima wuradźowali, kak móhli hač do jědnaće milionow europskich Židow systematisce morić. Zaměr konferency bě ludomordarstwo pospěšić. Konferenca bě za to wažny měznik.
Schodźenkowy plan z krizy
Sakska z nowej přehladku wo móžnosćach hladajo na incidency
Drježdźany (dpa/SN). Sakske ministerstwo za strowotnistwo je schodźenkowy plan nastupajo naprawy přećiwo koronawirusej wozjewiło, kiž je wotwisny wot wuwića ličby infekcijow. Wón złožuje so so na tuchwilu płaćiwy škitny koronowy wukaz a na poručenja Roberta Kochoweho instituta, kaž ministerstwo informuje. Tabelariski přehlad pokazuje, kotre prawidła dyrbjeli při wotpowědnych incidencach přesadźić. Přehlad ma orientaciju a perspektiwy skićić, njeje pak juristisce zawjazowacy. Namjetowane naprawy maja zakład dalšich diskusijow ze Sakskim krajnym sejmom a z krajnym knježerstwom być.
Při incidency pod sto móhli kontaktne wobmjezowanja zběhnyć. Winowatosć wužiwanja nahubnika typa FFP2 móhli na sobudźěłaćerjow a wopytowarjow starownjow a chorownjow wobmjezować. Wulkozarjadowanja z wjacorymi tysacami wopytowarjow dyrbjeli za šćěpjenych, wustrowjenych a testowanych zaso móžne być.
To a tamne (20.01.22)
Ćopłota, čaj a mandariny – zamyleny wobydler starownje je w buddhistiskim templu posaarskeho Losheima na zbožo škit před zymskim wjedrom namakał. Buddhist je jako zhubjeneho přizjewjeneho muža tak dołho zastarał, doniž njejsu jeho wohnjowi wobornicy zaso do starownje dowjezli. Lochce zdrasćeny muž bě so ze starownje wotsalił, ale so njewróćił a tak pytansku akciju zawinił. Tak su wobornicy tež wo durje templa kłapali a zhubjeneho skónčnje našli.
Wjace hač 200 awtowych klučikow su njeznaći w awtowym logistiskim centrumje w Bremerhavenje pokradnyli. Nastata škoda wučinja wjacore statysacy eurow. Jězdźidła njemóža kupcam přepodać, ale dyrbja je najprjedy raz znowa programěrować. Na terenje steja tysacy nowych awtow za transport ke kupcam. Motiw skućićelow dotal znaty njeje.
„Fatalny signal“ serbske projekty nastupajo
Amplowe knježerstwo SPD, Zelenych a FDP serbske projekty we wobłuku strukturneje změny, kotrež maja so lětsa zahajić, dlijaceho so nastaća etata Zwjazka dla do wuskosćow přinjese.
Podstupim (SN/at). Start serbskich projektow we wobłuku změny strukturow w Braniborskej je akutnje wohroženy. Na to skedźbni referent za naležnosće Serbow w braniborskim ministerstwje za wědomosć, slědźenje a kulturu Měto Nowak wčera na digitalnje přewjedźenym posedźenju tamnišeje Rady za naležnosće Serbow. Kaž wón rjekny, je zwjazkowe ministerstwo nutřkowneho wo postupowanju nastupajo zdźěłanje lětušeho zwjazkoweho etata informowało. W měrcu chce knježerstwo naćisk parlamentej přepodać, a jako posledni krok budźe so Zwjazkowa rada z nim w lěću zaběrać. „To rěka, zo nachwilne hospodarjenje hač do lěća traje. Projekty strukturneje změny móža so najzašo w awgusće zahajić“, Nowak rozłoži. Hdyž pjenjezy potom skónčnje budu, dyrbja přizwolene srědki hač do kónca lěta přetrjebane być, hewak zbywace sumy spadnu.
Wjace hač 100 000 infekcijow
Berlin (dpa/SN). Prěni króć po wudyrjenju koronapandemije su w běhu dnja wjace hač 100 000 dalšich infekcijow zličili. Strowotniske zarjady přizjewichu Roberta Kochowemu institutej 112 323 nowych padow w běhu 24 hodźin. Tydźenja bě jich 80 430 było. Miłeho wotběha infekcije dla so ličby natyknjenych na połoženje na intensiwnych stacijach njewotbłyšćuja. Tam ličby pacientow a smjertnych padow woteběraja.
Johnsonej hrozy rokoćenje
London (dpa/SN). Přećiwnicy britiskeho premierministra Borisa Johnsona w jeho stronje planuja rokoćenje. Kaž wjacore britiske medije rozprawjeja, chcedźa zapósłancy konserwatiwneje strony šefej knježerstwa njedowěru wuprajić. „Jeho čas je wotběžał“, cituja nowiny jednoho z parlamentnikow. Hižo dźensa wječor hrozy Johnsonej w parlamenće „D-Day“. Wumjetuja jemu, zo je za čas kruteho lockdowna w kraju w swojim słužbnym sydle wjacore swjedźenje wotměł.
Macron směrnicy předstajił
Hnydom tři pjenježne awtomaty su njeznaći minjenu nóc w ...
Lěwica: Ćěkancow njewotsunyć
Podstupim (dpa/SN). Frakcija Lěwicy w Braniborskim krajnym sejmje je krajne knježerstwo namołwjała, ćěkancow do Pólskeje dlěje njewotsunyć. Jich tam nimale bjez wuwzaća w lěhwach interněruja, bjez dosahaceho lěkarskeho zastaranja a bjez zwiska do kónčin zwonka lěhwa, zapósłanča Lěwicy Andrea Johlige wčera kritizowaše. Do toho bě wona zhromadnje z politikarjemi Lěwicy Europskeho parlamenta, zwjazkoweho sejma a druhich krajnych sejmow pólsko-běłorusku pomjeznu kónčinu wopytała.
Wotsunjenja do Pólskeje su po tak mjenowanym Dublinskim postupowanju móžne, hdyž su ludźo tam prěni króć wo azyl prosyli. Krajne knježerstwo měło so pola zwjazkoweho knježerstwa za to zasadźeć, zo ćěkancow z lěsow podłu pólsko-běłoruskeje mjezy wuchowaja, sej Johlige žada. W bahnojtych lěsach dyrbja woni w zymje při zmjerzkach pod surowymi wobstejnosćemi žiworić, rjekny wona k wobkrućenju. Na pólskej stronje mjezy je jich něhdźe 600, na běłoruskej stronje rěča wo něhdźe 800 ludźoch.
Dale a wjac wopačnych wupokazow
Düsseldorf (dpa/SN). Ilegalne wikowanje z falšowanymi šćěpjenskimi wupokazami dale přiběra. Policija přepytuje mjeztym po wšej Němskej w 12 000 padach. Ličba bě předewšěm loni w decembru raznje přiběrała, rozprawjeja policajske zarjady na naprašowanje powěsćernje dpa. Na čole ilegalneho wikowanja steji Bayerska ze 4 000 přepytowanskimi jednanjemi sćazanych wupokazow dla. Slěduje Sewjerorynsko-Westfalska z wjace hač 3 500 jednanjemi. „Dyrbimy bohužel z toho wuchadźeć, zo je woprawdźita ličba falšowanjow wo wjele wjetša“, zdźěli krajne knježerstwo w Mnichowje.
Přepytowarjo běchu w interneće cyły rjad „poskitkow“ namakali, kotrež přećiwnikow šćěpjenja wabja. Tući su zwólniwi, wjele pjenjez za falšowane wupokazy wudać, hačrunjež bychu original a srědk přećiwo wirusej zadarmo měć móhli.
