Tibetski hudźbnik Loten Namling nastaji so wčera na sněhakach a ze ...
Wo šćěpjenju naležnje debatowali
Berlin (dpa/SN). Wukazanje powšitkowneje winowatosće šćěpjenja přećiwo koronawirusej je w zwjazkowym sejmje dale horco diskutowana tema. W prěnjej wobšěrnej debaće wo tymle towaršnostnje brizantnym prašenju su měnjenja přiwisnikow a přećiwnikow do so zrazyli. Prominentni přiwisnicy kaž Karl Lauterbach (SPD) widźachu w tym jenički puć, pandemiju přewinyć.
Přećiwnicy, kaž wiceprezident zwjazkoweho sejma Wolfgang Kubicki a Gregor Gysi wot Lěwicy, maja šćěpjensku winowatosć za njekmanu, njepoměrnu a strašnu za dowěru ludźi do demokratije. W naležnej, ale w dalokej měrje wěcownej debaće bě jenož AfD zasadnje přećiwo winowatostnemu šćěpjenju.
Minister Lauterbach zasadźowaše so doraznje za šćěpjensku winowatosć a warnowaše před tym, naležnosć dale wotstorkować. Šćěpjenje móhło ludźi před přichodnej žołmu infekcijow w nazymje škitać, wón rjekny.
Tež přećiwnicy winowatostneho šćěpjenja, kaž Wolfgang Kubicki, wuznachu so wuraznje k šćěpjenju. „Mamy dobre argumenty za šćěpjenje. Te za winowatostne šćěpjenje pak mje njepřeswědčeja.“
Žada sej nowe formy wopominanja
Berlin (dpa/SN). Społnomócnjeny zwjazkoweho knježerstwa za bój přećiwo antisemitizmej Felix Klein žada sej nowe formy, zo by so dopominanje na złóstnistwa nacionalsocialistow zachować hodźało. „Wopominanje njesměło w formulach a ritualach sprostnyć, njesměło jenož hłowu narěčeć, ale tež wutrobu a začuća“, rjekny Klein powěsćerni dpa. Empatija je rozsudna „w časach přiběracych hrubosćow a relatiwizacije holocausta“. Raznje zasudźa wón w tym zwisku antisemitizm při koronaprotestach.
Dźensa, 27. januara, dopominaja w Němskej na wuswobodźenje nacistiskeho zaničowanskeho lěhwa Auschwitz 1945 a na wopory nacionalsocialistow. Mjez nimi běchu Židźa, Sintojo a Romojo, homoseksualni a politiscy přećiwnicy nacistiskeho režima. W zwjazkowym sejmje su ze swjatočnosću wopory nacionalsocializma wopominali. Tam rěčeštaj Inge Auerbacher, kotraž bě holocaust přežiwiła, a prezident israelskeho parlamenta Mickey Levy. Tež w dalšich městach su na wopory holocausta spominali.
Diferency mjez Kijewom a USA
Denys Trubeckoj rozprawja za Serbske Nowiny z ukrainskeje stolicy
Kijew. Sekretar ukrainskeje wěstotneje rady Oleksij Danilow je tele dny rjekł, zo njewidźi najebać koncentraciju ruskich wojerskich jednotkow podłu mjezy žane pokazki na to, zo planuje Ruska nadpad na Ukrainu. Porno tomu su USA a Wulka Britaniska ze swojim rozsudom, napjateho połoženja dla dźěl personala swojeju wulkopósłanstwow wotćahnyć, w Kijewje hněw zbudźili. Oleg Nikolenko, rěčnik ukrainskeho wonkowneho ministerstwa, mjenowaše rozsud „přechwatany. Wěstotne połoženje njeje so zasadnje změniło. Strach noweje žołmy ruskeje agresije wobsteji wot lěta 2014, a koncentracija ruskich jednotkow traje wot apryla 2021.“
To a tamne (27.01.22)
Po tym zo stej tołčene běrny na so mjetałoj a so hišće biłoj, su dwě žonje z jastwa w šwabskim Aichachu znowa zasudźili. Wobydlerce samsneje cele běštej so loni w juliju zwadźiłoj a jědź na so mjetałoj – tón dźeń sydachu tołčene běrny. Při ćělnym rozestajenju so wobě žonje zraništej. Augsburgske sudnistwo zasudźi jednu z njeju k pokuće 2 700 eurow. Tamna ma 1 800 eurow płaćić.
Hnujace zasowidźenje španiskeje swójby ze swojim sydom lět zhubjenym psom je w interneće wjele kedźbnosće zbudźiło. Sobudźěłaćerka tankownje Pepe Tenorio bě pastyrskeho psa Dica před dnjemi při awtodróze wuhladała a sobu wzała. Dźakowano jeho plakeće při šiji móžeše skótna lěkarka wobsedźerjow spěšnje wuslědźić a jim psa wróćić. Tući ze sylzami we wočach wbohe skoćo domoj witachu. Dico bě wot lěta 2015 zhubjeny.
Ottu z CDU wuzamknu
Berlin (dpa/SN). Předsyda jara konserwatiwneje „Unije hódnotow“ Max Otte ma po woli CDU stronu wopušćić. Přičina je, zo kandiduje za zastojnstwo zwjazkoweho prezidenta po namjeće AfD. Ottemu čłonske prawa sćazaja a jednanje k jeho wuzamknjenje ze strony zahaja. To je generalny sekretar CDU Paul Ziemiak dźensa po posedźenju zwjazkoweho předsydstwa strony zdźělił. Otte bě poskitk AfD za kandidaturu zwjazkoweho prezidenta přiwzał, rěčo wo „wulkej česći“.
Nižozemska z wolóženjemi
Den Haag (dpa/SN). Najebać wulku žołmu natyknjenjow z omikronom je Nižozemska wobmjezowanja přećiwo wirusej zdźěla zběhnyła. Hosćency, dźiwadła, muzeje a kina smědźa po wjace hač pjeć tydźenjach wot dźensnišeho zaso wotewrjene być, wšědnje hač do 22 hodź. To zdźěli dźensa ministerski prezident Mark Rutte. Tež na sportowych zarjadowanjach, kaž w kopańcy, smě so zaso wěsta ličba wopytowarjow wobdźělić.
Čakaja na rozprawu
Na dźěłowu rozmołwu w statnej kencliji zetkali su so wčera sakski ...
Mnozy šćěpjenja dla wahaja
Wočakujawjele wustupow
Ukraina a Ruska za jednym blidom
Paris (dpa/SN). Prěni króć po wudyrjenju napjatosćow mjez Ukrainu a Ruskej su so zastupnicy wobeju krajow dźensa w Parisu k rozmołwam zetkali. Na wuradźowanju wobdźěleni běchu tež zastupnicy Němskeje a Francoskeje, kotřiž skutkowachu jako poradźowarjo we wobłuku tak mjenowaneho Normandijoweho formata. Wobaj krajej w konflikće posrědkujetej.
Na zetkanju w Parisu dźěše po informacijach prezidentskeho palasta wo humanitarne naprawy a wo přichod Ukrainy. Nimo toho chcychu za datumom pytać, na kotrymž Ukraina z Krjemlej swěrnymi separatistami na wuchodźe kraja wo wurjadnym statusu Donbasa jedna. Ukraina to dotal oficialnje wotpokazuje. Wona wobhladuje Moskwu a nic separatistow jako jednanskeho partnera.
Zastupnik Ukrainy Andrij Jermak je do jednanjow potwjerdźił, zo chcył zajimy swojeho kraja ze wšej mocu přesadźić. Wón Ruskej wumjetuje, zo planuje nadpad na Ukrainu, štož Moskwa dale prěje.
