Nócna třěleńca je dźensa rano wobydlerjow Mainza nastróžiła a zasadźenje policije zawinowała. Wobydlerjo běchu policiju wutřělow dla alarmowali. Zastojnicy na to z wjacorymi policajskimi awtami bliski lěs přeslědźichu. Na kromje wojerskeho zwučowanišća USA zetkachu woni ameriskich wojerskich policistow, kotřiž rozłožichu, zo je třělenje dźěl zwučowanja. Zo tam wodnjo třěleja je mjeztym normalne, rano w 4 hodź. skerje nic.

Překřiwjenja šulskich pjenjez dla dyrbi bywša nawodnica katolskeje zakładneje šule w Kaliforniskej lěto a jedyn dźeń do jastwa. Mjeztym 80lětna rjadniska sotra njeskutki naležnje wobžaruje. Po jeje wotchadźe na wuměnk bě při pruwowanju zličbowanskich knihow napadnyło, zo pobrachuje 730 000 eurow. Pjenjezy bě žona z dalšej sotru w kazinach w Las Vegasu přečiniła a knihi falšowała.

Brüssel/Njebjelčicy (SN). Zwjetša wot Serbskeho sejma a Brüsselskeje załožby Slavonic Europe (słowjanska Europa) nadźěłana iniciatiwa za europsku integraciju Lusatia Glow (łužiske swěćenje) předstaji so dźens dopołdnja w Brüsselskim medijowym klubje zjawnosći. Iniciatiwa chce europske regionalne kultury jako zwjazowacy element mjez čłonskimi statami EU zesylnić a tak k tomu přinošować, konfrontatiwne nacionalistiske politiske koncepty přewinyć, kotrež integritu europskeje unije wohrožuja. Po medijowej konferency Serbskeho sejma, Slavonic Europe a zastupjerjow čěskeje a pólskeje Łužicy je so dźěłarnička přizamknyła, w kotrejž su dalšim zastupjerjam regionalnych kulturow z mnohich kónčin Europy wobsahowy program iniciatiwy předstajli. Po słowach iniciatiwy su wot statow dotal často njedosahacy hódnoćene regionalne kultury wosebje pokazane na dodźerženje čłowjeskich a juristiskich prawow a demokratije.

Berlin (dpa/SN). Předsyda FDP Christian Lindner je kritiku swojeje strony nastupajo wobzamknjenje Roberta Kochoweho instituta k skrótšenju statusa wustrowjenych potwjerdźił a tak ćišć na šefa instituta Lothara Wielera dale zwyšił. Wón ma „wulke dwěle“ na tutym njepřipowědźenym a překwapjacym rozsudźe, rjekny Lindner wčera wječor w sćelaku RTL. Lindner mjenowaše rozsud instituta „přewšo njezbožowny“.

Financny minister wotstupił

Waršawa (dpa/SN). Po chaotiskim zazběhu dawkoweje reformy je pólski financny minister Tadeusz Kościński wotstupił. Hač k pomjenowanju naslědnika chce ministerski prezident Mateusz Morawiecki nawodnistwo financneho ressorta přewzać. Kościński přewozmje tak „politisku zamołwitosć za njedostatki při zawjedźenju noweho dawkoweho rjadowanja“. Dawkowa reforma „Pólski porjad“ měješe ludźom wjace dochodow wunjesć. Statni přistajeni pak mějachu naraz wjace dawkow płaćić hač do reformy.

Wočakuja ludźi z Afghanistana

Po wšej Němskej su wčera zaso tysacy ludźi přećiwo naprawam w zwisku z koronawirusom demonstrowali. Při tym hrožachu z městnami tež konflikty z přećiwnymi demonstrantami, kotrymž pak policija zadźěwa. Protesty měrjachu so – kaž tule w Magdeburgu – tež přećiwo planowanemu winowatostnemu šćěpjenju w strowotnistwje. Foto: pa/Thomas Schulz