„Domojnik/domojnica“ je Hornjoserbske słowo lěta 2025 (HSSL). Wopřijeći wopisujetej wobdźělnikow rěčneho projekta Domoj, kotryž je syć za serbsku rěč a regionalnu identitu ZARI lětsa prěni raz wuhotowała. 22 z dohromady 145 wothłosowacych – porno lońšemu lětu je to jasny minus něhdźe 30 procentow – je so za tónle terminus rozsudźiło. Na druhim městnje slěduje ze snadnym wotstawkom jenož dweju hłosow kandidat „słuchožračk“, kotryž bu jako serbski ekwiwalent němskemu „Ohrwurm“ namjetowany. Podest wudospołnja z 15 wotumami „darnička“, w kotrejž chowaja so trjebane nastroje, hrajki abo drasty, kotrež su „přeškoda za wotpadki“. Jenički pobrachowacy hłós je tomu zadźěwał, zo by so třeće městno dwójce wobsadźiło – „sotrowšćina“ pak ma runja načolnej trójce potencial, so dołhodobnje z krutym wobstatkom ertneje kaž tež pisomneje rěčneje praksy stać, wšako wujewjeja wuslědki přełožowanskeje aplikacije „sotra“ častodosć konstrukty, kotrež sej swójsku klasifikaciju bjezdwěla zasłužeja.Na kóncu dohromady dwanaće namjetow wopřijaceje lisćiny stejitej wopřijeći „přiměr“ z dwěmaj hłosomaj a „wohnjowa murja“ ze žanym. Hač pokazuje tónle wuslědk na přesłapjenu nadźiju w zwisku z wójnu w Ukrainje abo na njedowěru wolerjow nastupajo přilubjenja tak mjenowaneho křesćansko-demokratiskeho politiskeho lěhwa, njehodźi so z wotedatych wotumow wučitać. Snadny wothłós pak njerěka, zo njeměli ani zakitowarjo totalneho pacifizma ani zastupjerjo ludu wo swojich pozicijach rozmyslować.
