Europske zjednoćenstwo dźenikow MIDAS wobsteji 25 lět

Bozen (SN/BŠe). Europske zjednoćenstwo dźenikow mjeńšinowych a regionalnych rěčow (MIDAS) je wot minjeneho štwórtka do wčerawšeho w južnotirolskim Bozenje generalnu zhromadźiznu přewjedło. W samsnym měsće bu organizacije před 25 lětami załožena. Serbske Nowiny běchu wot spočatka z jeje čłonom. Byrnjež so čłonojo na samsnym městnje kaž před štwórć lětstotkom zešli, njezhladowachu do zašłosće a na stawizny, ale do přichoda. Zastupjerki a zastupjerjo mjeńšinowych medijow z cyłeje Europy maja tuchwilu wulke wužadanja zmištrować, předewšěm hladajo na zasadźenje kumštneje inteligency w redakcijach. Pjatk dopołdnja zarjadowa MIDAS w slědźenišću Eurac Research zjawnu konferencu pod hesłom „Mjeńšinowe rěče a kumštna inteligenca“. W srjedźišću stejachu šansy a riziki KI za žurnalizm a předewšěm za medije w mjeńšinowych rěčach. Přinoški su Ismael Nafría z Španiskeje, Daniel Fazlić ze Słowjenskeje a Vicent Partal z Katalanskeje přihotowali.