W awstriskim Hochfilzenu wotměwaja so tuchwilu swětowe mišterstwa w biatlonje. Z cyłeho swěta přebywaja tam žurnalisća, zo bychu wo wubědźowanjach najwoblubowanišeje zymskeje sportoweje družiny rozprawjeli. Mjez wjacorymi stami ludźi, kotřiž wšědnje wo biatlonje rozprawjeja, je tež čěski žurnalist Petr Slavík. Za Serbske Nowiny je so z nim Jan Hrjehor rozmołwjał.
Móžeće so čitarjam Serbskich Nowin prošu skrótka předstajić? Štó sće, što dźěłaće ...?
P. Slavík: Pochadźam z Uherskeho Hradiště, města we wuchodnym dźělu Čěskeje republiki. Třeću sezonu dźěłam jako teamowy fotograf čěskeho narodneho biatlonoweho mustwa. Připódla sym specializowany za jězdźenje z hórskimi kolesami a dyrdomdeje w přirodźe.
Biatlonowa sezona BMW IBU započina so w nowembrje a kónči so w měrcu. Sće Wy cyły čas po puću, abo maće tež raz přestawku doma?
P. Slavík: Sezona je do tak mjenowaneho trisemestra rozrjadowana. To rěka, zo sym tři tydźenje za sobu na swětowych cupach, potajkim tři njedźele z mustwom w hotelach a stadionach a jednu njedźelu doma. To mam chwile so wočerstwić (směje so).