36. wolejbulowy turněr Serbskeho Sokoła wo pokal Domowiny
Zaso raz w serbskich rukach běše sobotu wulka sportowa hala na Budyskim Třělnišću. 15 wolejbulowych mustwow bě přichwatało, dokelž chcychu wo pokal Domowiny wojować. Hladajo na ličbu přizjewjenjow bě drje to w minjenym lětdźesatku najmjenje, za to pak bě turněr jedyn z najwurunanišich scyła. Faworita wubědźowanje tuž žanoho njeměješe, a hač do poslednjeje sekundy bě napjatosć wulka, komu drje předsyda Domowiny lětuši pokal přepoda. Hižo při zahajenju pak dósta Měrko Šmit z Worklec wot předsydstwa Serbskeho Sokoła wopismo, dokelž je so mjeztym 35. raz jako hrajer na najwjetšim serbskim wolejbulowym turněrje wobdźělił.
W třoch staflach wojowachu wobdźělnicy po pjeć mustwach najprjedy wo prěnjej městnje w tabulkach. Po dlěšim času njejsu sobotu na čas hrali, ale wo stajnje dwě dobyćerskej sadźbje hač do 15 dypkow. Serbski Sokoł bě modus na próstwu někotrych hrajerjow změnił. Hry běchu tuž měrniše, mustwa njemějachu časowy ćišć a móžachu so bóle na swójsku hru koncentrować.