Rozmołwa z trenarjom za atletiku pola FC Energije Choćebuz Mauricom Ehmku
Wot wonka hladajo sej mysliš, zo wšitke kolesa pola FC Energije tučasnje steja. Korona je zhromadny trening zakazała, wo hrach prěnjeho mustwa w regionalnej lize tu najprjedy raz docyła ničo pisać njetrjebamy. Zaćišć pak z wobrazom prawje wobchadźeć njemóže. Na poslednim treningowym dnju je mjenujcy kóždy hrajer treningowy časnik dóstał, zo by swoje indiwiduelne treningowe wukony měrił a na centralny ličak pósłał. Jedyn z tych, kiž ličby wuhódnoća, je trenar za atletiku Maurice Ehmke. 35lětny je w sćěhowacym interviewje tež wo swojim času powědał, jako bě so wón wo fitnes serbskich balokoparjow starał. Georg Zielonkowski je so z nim rozmołwjał:
Knježe Ehmke, za Waše powołanske skutkowanje njetrjebaće tučasnje samo žanu sportowu drastu. Waše dnjowe dźěło wothrała so před ličakom. Na nim zaběraće so z treningowymi wukonami hrajerjow FC Energije Choćebuz ...